Isikiel 9 - DAWAN BÎLA AISKA

Jerusalem pâtka dukiara diara aihka kaikan ba

¹ Baha ningkara, bîla baikra tara wal kiaima ra ai winan: “¡Tawan tara ra klala yaia ba pat balan sa, kumi bani ai mihta ra sauhki tikaia dukia kum brih aula!”

² Ningkara kaikri, waitna matlalkahbi pura durka yahbra tani ra kaiki ba bâk dimi aula sa, bara kumi bani ai mihta ra brih aula sauhki tikaia dukia kum. Bara tilara waitna kum linin kwalka dimi, ai maisa ra ulbaia dusa kum sin brih aula. Dimi balan ba ra, bras altarka lama kat buan sa.

³ Bara Ningkara Israel Gâdka prana tara ba kirubin nani ba pura kat uli wan, baha nani bâra kata ba kat, baha wina tempel dimaika ba kat wan. Bara Dawan waitna ba ra winan kwalka dimi kata ra, ai maisa ra ulbaia dukia nani bri kata ba.

⁴ Bara win: “Jerusalem lila bâk lui was, bara sain kum mangks upla nani lal purara, baha nani sari bri nani ra, baha saurka nani witin nani ai tilara dauki ba dukiara.”

⁵ Ningkara walri upla wala nani ra aisi kan: “Man nani lika witin ninara was tawan aiska ba taukaia, yang tempelki ba wina tâ kriks,

⁶ almuk nani, wahma nani, tiara nani, mairin kau waitna kaikras nani, tuktan nani, mairin nani ba iks, umpira kaikpara. Sakuna ani uplika sain bri kabia ba lika kangpara.” Bara witin nani tâ krikan tempel lamara almuk nani bâra kan wal.

⁷ Baha ningkara witin nani ra win: “Tempel ra was bara tâski dauks; pruan nani wal kutbanka painkira ba banhks.” Witin nani taki wan bara tâ krikan tawan ra upla ikaia.

⁸ Bara iki tiki kan ba ra yang yakan takaskri, ningkara maiwan ra bawri, bara bîli saki wini aisari: “Dawanki, ¿man kupiam baiwanka ba Jerusalem purara mangkaisma ki Israel kiamka nani takaskuya ba sut sauhki tikma kat?”

⁹ Dawan ba pana yang ra ai win: “Israel bara Juda uplika nani saurka ba tara pali sa. Kuntrika ba upla ikan lâka ni banhwan sa; bara tawan ba tanis lâka ni banhki takan sa; witin nani lukisa yang kuntrika ba lulki swiri bara yang ba kaikras sna witin nani dîa dauki ba.

¹⁰ Baku bamna, yang bui witin nani ra umpira kaikamna apia, ai daukanka tâwan yang yabrika aibapan kabia.”

¹¹ Baku ba ra waitnika linin kwalka dimi ba, ai maisa wilkaika ra ulbaia laya bri ba, bîla kum aisan naku: “Daukri sa, dîa daukaia ai blikatma kat.”