Isikiel 8 - DAWAN BÎLA AISKA

Aidul lâka Jerusalem ra

¹ Baha manka ra, kati matlalkahbi, yu matsip katka ra, yang waitla ra Juda wina almukka nani aikuki iwi katna ba ra, bahara Dawan ai mihta ba yang purira kahban,

² bara diara kum kaikri, kaiks upla baku lilka kum kata; ai maisa wina mâya tani ra, diara kum kaikri pauta klauhi baku kan; bara ai maisa wina pura tani ra lipi kan, bras klauhira baku.

³ Bara baha uplika ai mihta sakban, bara tâiwa ra alkan; bara Gâd karnika ba mita pâsa purara ai bukan, Gâd mita lilka nani daukan ba natka ra, Jerusalem ra ai brih wan, bara tawan bîla getka dimaia kat ai swin, baha wina yahbra tani ra tawi ba bahara sika aidul Dawan kupia tuski kupia baiki ba bâra kan.

⁴ Israel Gâdka prana ba, bahara kan sim yang twi ra yaprisauhkan ra kaikatna baku.

⁵ Bara ai win: “Namkra ba bukram yahbra tani ra.” Bara naikra bukri yahbra tani ra, bara dur altar lamara aidul ba kaikri Dawan kupia tuski bara kupia sauhki ba.

⁶ Baha ningkara ai win: “¿Kaikisma Israel luhpia nani diara saura dauki ba, baha nani wal sika, tempelki holikira wina laihura auya ba? Baku bamna, kau diara saura nani kaikma.”

⁷ Ningkara ai brih wan pliska bîla tara dimaika ba kat bara kutbanka ba ra unta kum bâra kata.

⁸ Ningkara yang ra ai win: “Kutbanka untika ba kau tara dauks.” Yang untika ba tara daukri bara dimaika kum wal prawri;

⁹ ningkara yang ra ai win: “Dims, bara kaiks, yamni kaikaia apia dukia saura nani naha nani dauki ba.”

¹⁰ Dimri, bara kaikri bara kaiks piuta lilka, bara yamni kaikaia apia daiwra talika lilka; bara Israel watla ra aidulka nani sut ba lilkika daukan kata kutban aiska ra.

¹¹ Bara witin nani mawanra, Israel almukka nani 70 iwi kata; bara Safán lupia Jaazanías sin witin nani tilara bâra kata; kumi bani sîka mâka kîa painkira angkaia ai mihta ra bri kata; bara kiasma siksa pali uli wi kata.

¹² Bara yang ra ai win: “¿Kaikisma ki, Israel almukka nani yukuwan ra diara dauki ba, kumi bani witin bâra ba lilka nani ulbi daukan ba? Kan witin nani lukisa yang ba kaikras, bara kuntri ba sin lulki swiri.”

¹³ Bara kau pura praki ai win: “Kau ban diara saura dauki kaka kaikma.”

¹⁴ Bara Dawan tempelka ra dimaika durka pali ba kat ai brih wan, baha yahbra tani ra yaba. Tila mairin nani bâra iwi kan, Tamuz gâdka dukiara ini kan.

¹⁵ Ningkara yang ra ai win: “¿Naha kaikisma ki? Kan kau ban diara saura nani kaikma.”

¹⁶ Bara Dawan tempelka baikanka, kau bîla ba kat ai brih wan; bara kaiks Dawan wal aisaia watla ba lamara, dimaika ba bara altar ba wal lilapas ra kutbanka ba kat 25 waitna nani bara kutbanka ba tani ra ai nina tawi bri kan; bara ai mawan ba lalma tani ra bawi ai lal tasba kat kangbi, bara lapta ra mayuni kan.

¹⁷ Bamna Dawan bui ai win: “¿Man kaikisma ki? ¡Juda uplika nani baha diara nani saura dauki ba wal kau aitani apia sa, baha purkara kuntri na sin saurka lâka wala ni banhkan! Natka kum wina natka wala ni yang kupi laikisa, kaiks baha kîa nani ba kâikma kat aula.

¹⁸ Sakuna pana sin yang kupi aisawanka wal daukamni: Naikra ba saurka swih tikbia apia, kupia pihni lâka sin kaikamna apia. Bara kisbi banhbia kiaima ra bîla baikra tara ni, sakuna yang walamna apia.”