Isikiel 7 - DAWAN BÎLA AISKA

Tnata yua ba baila sa

¹ Dawan bîla yang ra balan bara ai win:

² “Yang Dawan sna ba, Israel kuntrika ra wisni: Pat tnata ba aula, tasba aiska tnata ba aula.

³ Israel, piuam tnata ba pat aula, yang kupi baiwanka man mampara lulki swisna, man wina makabisna tânkam saura ba bara klala maikisna diara saura pali nani ba.

⁴ Umpira kaikan lâka ni mai kaikamna apia, klala maikaisna man daukankam ba dukiara, bara maikrika man saurkam nani tâka, dîa takan nani ba mana aibapma. Bara damra walma yang sika Dawan sna.

⁵ “Yang Dawan sna ba, naku wisni: Kaiks piua tnata ba pat aula.

⁶ Bara trabil saura ba aula ba ninara trabil saura wala aula; man yuam tnata ba pat baila aula.

⁷ Sauhki tikaia piua ba aula tasba ra iwi uplika nani ra piua ba balan sa; yua ba lamara sa, tanis lâka baman bâra kabia, lilia lâka ba il nani ra danh takbia.

⁸ Nanara isti pali kupi baiwanka ba, man nani puramra laikamni, yang âiyapah brimna kat man ra mamkabamni daukankam dukiara, bara klala maikamni daukankam saura nani ba tâwan.

⁹ Umpira kaikan lâka ni mai kaikamna apia; klala maikaisna daukankam ba kat, maikrika man diara saura pali nani daukram ba mana aibapma. Bara man nani tânka brima yang, Dawan, man nani ra klala maikisna ba.

¹⁰ “¡Yua ba nâra ki! ¡Pat balan na! ¡Sauhki tikaia yua balan! Saurka ba pura luisa plis bani ra, bara praut lâka ba manis sa.

¹¹ Lâ krikaia daukan ba wina, saurka lâka pâwisa, sakuna witin nani baha, yuyaka nani wina diara bribia apia ai kisbi winanka ba wina sin.

¹² Baha yua ba aula, piua ba pat balan. Wala ra diara atki ba dîa mata lilia kabia, atki bri ba sin dîa mata sari kabia. Yang kupi baiwanka ni Israel praut lâka bri ba klala yabaisna.

¹³ Ya diara upla wala ra atkan ba, kli witin ra tawi balbia apia; ai bisniska nani daukan ba sin sip slingbia apia. Watawikira nani ai rayaka ba sip yamni bribia apia.

¹⁴ “Trumpit puhbisa war ra waia paiwi; upla sut ba ridi takaia sa, sakuna upla kumi sin takras aiklabaia waia. Klala yabaisna kupi baiwanka wal Israel prautka lâka ba.

¹⁵ Latara war bâra sa, bara bilara siknis bara plun wahwan. Ya twi langni ra ba, war ra prubia, bara ya tawan bilara ba plun wahwan bara siknis mita ikbia.

¹⁶ Bara baha nani tila swakbia ba, il tara nani ra wabia bara twi langni butkuka nani sirang iwan baku, ai mamna lulki kabia, sakuna sut prubia saura daukan bamna.

¹⁷ Sut klahkla swapni takbia, bara sibrin mita lula ba pana pana pruki kabia.

¹⁸ Witin nani sari kwalka ni dimbia; wîna aiska tatatbi kabia bara mawan ba sin pauni takan kabia ai swira mita, bara lal tâwa ba sin kusban kabia.

¹⁹ Ai silbarka nani ba, yabal nani ra batakbia, bara gul nani ba bahki kulkbia. Dawan lawanka ba wina ai gulka bara silbarka sin sip swaki sâkbia apia.

²⁰ Walpa klauhira prana ba mita sinskas lâka ba banhwan, bara baha wal yamni kaikaia apia aidulka lilka nani paskan kan. Baha mita yang walpa klauhira ba bahki daukamni.

²¹ Yabrika tringsar nani balbia bara mai implikbia, upla kau saurakira tasba ra bâra ba balbia bara mai dakbia, bara diara tâski baku kulkbia.

²² Yang naha kuntrika wina tnaya ra tawamna bara swimna tempelka ba tâski daukbia, kan baha sika yang duki kukan. Tahplu nani balbia bara tâski daukan kabia.

²³ “Sîn kum dauks, kan tasba na tala laikan lâka ailal pali sa bamna, bara tawan ba lâ krikaia lâka manis pali sa.

²⁴ Yang mita yabrika upla tahplu nani balbia bara tawan watla nani dawanka takbia. Karnira prautka lâka nani ba danh daukamni; yabrika pliskam holikira nani ba tâski daukan kabia.

²⁵ Sibrin tara ba witin nani dawanka takan; kupia kumi lâka plikbia bara wal prawbia apia.

²⁶ Pât ba balbia ninara pât wala balbia; sturi yamni apia ba kumi ninara wala balbia. Bahki pali plikbia, Gâd prapitka kum, dahra yukukan kum param saki maikaia ba; prîs âpu kabia mai smalkaia, almuk nani sin âpu kabia man nani ra kupiam kraukaia.

²⁷ King ba sari kwalka dimbia, wihta tara ba sari lâka ra kauhbia bara tawan uplika ba tatatbia. Ai daukanka ba kat munamni bara lâka daukamni, witin nani nahki praiska lâ daukan ba. Baku ai dara walbia yang sika Dawan sna ba.”