Isikiel 39 - DAWAN BÎLA AISKA

Gog ra pura luan ba

¹ “Bara man, upla luhpia, yang nini ra Gog mapara aisas bara wis: ‘Dawan ba naha wisa: Gog, Mésec bara Tubal tâ brabrira, yang lika man waihlam takisni.

² Maikrika kli tawma; minam lulkanka kum kum ra yahbra tani kau laihura ba wina mai sakamna bara mai bri balamna Israel ilka bîla nani ra.

³ Bara pantamangka mihtam smihka ra bri kama ba yabrika kauhbia, trisbaya nani mihtam aihkika ra bri wama ba sin kauhaia daukamna.

⁴ Bara man, suldiarkam bara upla nani yulam kahbi nani ba aikuki, kauhma Israel ilka bîla nani ra. Bahara yabamna tnawira sât sut ra bara daiwan wail nani ra, pibia dukiara.

⁵ Aitniki takaskma plis langni ra. Yang, Dawan ba, aisari. Yang bîli yabri.

⁶ Pauta klauhan blikamna Magog purara bara lamni ba kabu lamara iwi nani purara. Baku mika ai dara wali banhbia yang sika Dawan sna ba.

⁷ Yang yabrika nini holikira ba upliki Israel kakaira takbia, bara yabrika ban tâski dauki kabia apia. Bara nisan tringsar nani ba kaikbia, yang, Dawan, holikira lâka marikisna ba Israel ra.

⁸ Baha yua dukiara aisisna ba balbia takaskras kira. Yang, Dawan, kasak aisisna.’

⁹ “Israel tawanka ra iwi uplika nani ba takbia, bara war aiklabaia dukia nani ba angkbia, kaina kahbaika sât sât nani ba, pantamangka, trisba, waisku bara dâka nani bara pauta aitani bri kabia mani matlalkahbi pura kum muki kaia.

¹⁰ Man nani pauta wahbaia insla ra wama apia, unta wina klakaia sin apia, kan baha aiklabaia dukia nani ba pauta baku yus munbia. Baku nanara ai dukia nani implikbia, upla wala dukia implikata ba baku, ai mihta dakbia; witin nani bui upla wala mihta dakbata ba. Yang, Dawan, kasak aisisna.

Gog ba raiti ra bikan

¹¹ “Baha piua ra Gog ra plis kum yabamna Israel ra, Impapakra Ilka Bîla ra, kabu lamara, bahara upla bikbia dukiara. Baha pliska bâk luaia apia lâka daukbia, bara bahara Gog bara war aiklaklabrika nani sut ba bikbia, bara nina mâkbia Gog war aiklaklabrika nani ilka langnika.

¹² Israel wina nani ba kati 7 piua briaia kabia, biki danh daukaia; kuntri ba klin daukbia ba kat.

¹³ Upla sut ba diara dauki kabia naha nani bikaia, bara kulkanka kum kabia witin nani mapara. Baha yua ra yang pranakira param takamna. Yang, Dawan, kasak aisisna.

¹⁴ Baha purkara, baha kati 7 ningkara, upla dakni kum mihta ra mangkbia kuntrika aiska ba laki kaikaia, bara ya kau tasba ra takaskan ba bikaia, klin swiaia dukiara.

¹⁵ Naha uplika nani tila wina kum kuntri ba, kaikbia upla dusa kum kaikbia kaka, lamara sain kum mangkbia, babikra nani ba Gog war aiklaklabrika nani ilka ra bikbia ba kat.

¹⁶ (Baku sin tawan kum bara nina war aiklaklabrika daknika.) Baku kuntri ba klin swibia.”

¹⁷ Dawan bui ai win: “Wis piawira nani sut ra, bara daiwan wail nani sut ra sin, plis kir wina asla takbia bara Israel ilka bîla ra balbia, sakripais witin nani dukiara daukuna ra. Sip kabia wîna piaia bara tala diaia;

¹⁸ suldiar nani wîna pibia bara tasba tâ brabrira nani tâlia dibia, sim sîp wainhka, sîp luhpia, guts, apia kaka Basán bîpka lupia batana wîna baku.

¹⁹ Baha sakripaiska witin nani dukiara daukuna ba wina, batanka pibia siknis takaia kat bara tâlia dibia bla takaia kat.

²⁰ Plun tara ridi daukamni aras wîna wal; bara aras âiulra, suldiar bara war aiklaklabra sâtka ba sut ba, plun pih aibanhbia ba kat. Yang, Dawan, kasak aisisna.

Israel kli Dawan brin ba

²¹ “Baku praina tara ba marikamni nisan tringsar nani ra. Nisan nani sut kaikbia nahki lâka daukri bara klala yabuna ba.

²² Baha yua wina ai tâura, Israel wina nani ba ai tânka bribia, yang sika ai Dawan Gâdka sna ba.

²³ Bara nisan tringsar nani ba nu takbia Israel luhpia nani ba alki upla wala tasbaya ra brih wan ba witin saura daukan ba tâwan, kan witin nani lika yang wal kasak apia kan; bara yang lika witin nani ra kaikras maiwan lakri bara swiri ai waihla nani ba mita pura luaia bara war ra sut ikaia.

²⁴ Yang ai saurka ba mapara buaia lâka tânka kat daukri, bara nini laki yabri.

²⁵ “Baha mita, yang Dawan sna ba, wisni: Nanara kupi pihni lâka brimni Israel uplika aiska dukiara, Jekob kiamka nani dukiara. Yabaisni nahki kaia ba, bara taibi munaia nini ba kulkanka tara yabia dukiara.

^26-27 Yang kli asla daukamni, nisan tringsar tila wina bara waihla kuntrika nani ba wina sin; baku mika lamni lâka ra iwbia, klauna ai tasbaya ra, upla kum sin sirang ikbia apia. Baku marikamna holiki lâka ba, bara nisan ailal nani sin kaikaia sip kabia. Israel wina nani ba bahki kulkan lâka wauhbia, yang wal kasak apia kan bamna.

²⁸ Yang mita blikri alki bri waia nisan tringsar nani tilara, bara yang kli asla daukamna aima wala ra ai tasbaya ra. Kumi sin ai tasbaya wina alki bri wabia apia. Baku mika ai dara walbia, yang sika ai Dawan Gâdka sna ba.

²⁹ Bara yang kli witin nani ra kaikras maiwan lakamna apia, kan karniki ba Israel uplika purara mangkri bamna. Yang, Dawan, kasak aisisna.”