Isikiel 38 - DAWAN BÎLA AISKA

Gog, Dawan yus munaia dukia

¹ Dawan ba yang ra balan bara ai win:

² “Man, upla luhpia, nanara Magog kuntrika tani ra taws, bara aisas yang nini ra Gog mapara, Mésec bara Tubal tâ brabrira tara pali ba.

³ Wis: ‘Naku wisa Dawan ba: Gog, Mésec bara Tubal tâ brabrira tara pali ba, yang lika man waihlam takuna,

⁴ Maikrika kli tawma, bîlam ra alingka mangkamna, man ra bara suldiar araska ba sut sakamna, aras âiulra ai kwalka prana nani ba wal, baha suldiar ailalkira nani ai sordka bâra kan kahbaika sât sât nani ba sut.

⁵ Persia, Etiopía bara Libia uplika aikuki yula kahbi wabia, witin nani sut kan kahbaika bara ai lal ra mangkaika ba wal,

⁶ bara baku sin Gómer bara Bet-togarmá suldiarka nani sin, kau laihura yahbra tani wina, nisan ailalkira nani aikuki asla takram nani ba.

⁷ Ridi taks, bara aiklabaia dukia bris, man bara suldiar nani man wal nani ba sut; man karnikam munhtara brima.

⁸ Mani ailal lubia ningkara adar brima, kuntri kum piua luan war ra kan ba purara kauhaia, kuna pat ai plamaika brin kabia ba; kuntri kum yakabrira kan ba nisan ailal tilara bara danh tikan kan ba, ban kaia ra, kuna pat kli asla takan ba Israel ilka nani ra. Baha piua ra, witin pat kuntri ailal wina tawi balan kabia, bara sut lamni ra iwi kabia.

⁹ Man wama dista tara baku, kuntri ba bikaia, bara purara kauhma lâ tara baku suldiarkam sut aikuki bara nisan ailal nani ba wal.

¹⁰ ‘Yang Dawan sna ba, naku wisni: Baha piua ra lukankam ra diara aihka saura nani balbia daukaia.

¹¹ Wima: Kuntri kum sip apia ba purara kauhamna, upla nani laman lâka ra, ai dara walras iwi nani ra, kuntri tara kutbanka âpu ra, get ba prakbia apia.

¹² Dukia nani dakbi brimna, implikamna; tawan nani sauhkan kan kli paskan nani ba purara kauhamna, tawan kum pat nisan ailal aikuki asla takan ba, bîp nani bara diara wala nani sin bri ba bara tasba aiska lila kat iwi ba sauhkamna.

¹³ Sabá bara Dedán uplika nani ba, bara Tarsis wina diara âiatkra nani ba bara tawan wala nani uplika sin, mamkabi walbia: ¿Implikaia balram ki? ¿Suldiarkam nani ba asla daukram diara nani ba dimi briaia bara gul, silbar nani bâra briaia, daiwan bara diara wala nani briaia, bara diara kukan tara pali aihwa kum brih waia?’

¹⁴ “Baku bamna, aitani sa, yang nini bri Gog ra aisas, bara wis: ‘Dawan naku aisisa: Upliki Israel ba laman lâka ra sâp iwi kabia ba ra, man yabal ra takma,

¹⁵ tasbayam wina, kau laihura yahbra tani wina, suldiar ailal karnakira ba aikuki, bara kwâra tara aras ra tauki nani ba

¹⁶ kira upliki Israel purara kauhma. Man, Gog, kasbrika siksa baku tasba na bikma. Baha piua nani ra yabrika tasba mapara balma, baku mika man bâk nisan wala nani ba ai dara walbia, yang sunuki lâka witin nani ra marikamna ba.

¹⁷ ‘Yang Dawan sna ba, naku wisni: Man ra sika piua luan ra aisi katna ba, duki dadaukra nani bâk, Israel prapitka nani; witin nani baha piua ra maisa pakan yang maikri balma Israel purara kauhaia.’

Gog klalka ba

¹⁸ “Yang, Dawan sna ba, kasak aisisni: Gog ba Israel purara kauhan kabia ba ra, kupi baiwanka tara pali takbia.

¹⁹ Kupi sauhkanka tara pali tilara swer takisni, baha piua ra, Israel ra tasba nikban tara pali bâra kabia.

²⁰ Kabu inskika nani ba, kasbrika ra piawira nani ba, daiwan wail nani kwasi ba maiwanra tatatbia, baku sin upla tasba ra nani ba sut. Il tara nani ba yakawbia, walpa nani ba kauhbia bara kutbanka nani sut ba tasba ra slingwi yakawbia.

^21-22 Yang yabrika balbia, Gog purara saurka sât sât sibrin ni banhbia dukiara. Siknis wal klala yabamna bara prura aihkakira karna pali sin. Yabrika witin, ai suldiar bara uplika ailal nani ai yula kahbi nani ba purara balbia, lî ailal auhi, lî klaswan nani, pauta bara sulpa lapta nani ba; bara upla nani sut ba pana pana ai mawanra kauhi kabia ai sordka nani wal. Yang, Dawan, kasak aisisna.

²³ Baku marikamni tawan ailal nani ra, yang tara pali bara holiki lâka ba marikamni. Yang bui yabrika witin nani ai kakaira takbia, bara ai dara walbia yang sika Dawan sna ba.