Isikiel 35 - DAWAN BÎLA AISKA

Seír ilka mapara dahra aisin ba

¹ Dawan ba yang ra balan, bara ai win:

² “Seír ilka ra kli tawi was bara witin mapara aisas yang nini ra.

³ Bara wis: ‘Naku wisa Dawan ba: Yang waihlam takisni, Seír ilka, bara klala maikisna upla iwras tasbaya ra sauhki tikan ba baku.

⁴ Tawankam nani ba sauhki tiki swimna, bara man upla iwras tasbaya ra mai swimni. Bara baku man damra walma yang sika Dawan sna ba.

⁵ ‘Man ba Israel wal ban kaia ra waihlam sa, bara man nani bui witin nani mapara war bukram, witin nani ai klalka bri kan piua ra saurka tâwan.

⁶ Sakuna yang, Dawan ba, rayaki wal swer takisna prura mihta ra mai mangkamna, bara prura ninam blîkbia.

⁷ Kuntrikam ba upla iwras tasbaya daukamna, bara sauhki tikamna, Seír ilka ra; bara yabrika upla kum sin man puram bâk lubia apia.

⁸ Ilkam tara nani bara sirpi nani ba, il langnika nani ba awalkam nani ba upla nani war ra pruan nani man banhki kaia daukamna.

⁹ Ban kaia ra upla iwras tasbaya mai daukamna bara upla kum sin kuntrikam ra iwbia apia. Bara baku man nani damra walma yang sika Dawan sna ba.

¹⁰ ‘Man wiram: Israel kuntrika ba, ai kingka lâka wâl kira yang duki kabia; yang ai dawanka kamna, Dawan bâra iwi ban kabia.

¹¹ Sakuna yang, Dawan, rayaki ni swer takisni, yang bui man ra sin kupi baiwanka ra baku mai munaisna, tuman lâka ni misbara lâka ni Israel ra munatma ba baku. Yang klala maikamna ba ra, witin nani ai dahra wali ai kaikbia.

¹² Baha ningkara man bui yang ra ai kaikma yang, Dawan, man lahtuban bîla nani sut Israel ilka nani mapara aisisatma ba yang walri ba, Man wiram: ¡Upla iwras tasbaya takan; nanara yawan sip sa baha âpu daukaia!

¹³ Bîlam kwâkram maipara buan lâka wal, bara twisam lanhwan yang maipara aisaia. Yang walri.

¹⁴ ‘Bamna naku wisni, yang, Dawan ba: Tasba aiska lilia takbia, mai sauhki tikamna piua ra.

¹⁵ Man lilia takram Israel mita kuntri wala nani dakbi ai dukia bri kan ba sauhkan ba ra, sakuna man nani ra sin baku takbia: Man upla iwras tasbaya takma, Seír ilka, Edom kuntrika. Baha ningkara ai dara wali banhbia yang sika Dawan sna ba.’