Isikiel 33 - DAWAN BÎLA AISKA

Aihwawakra nani warkka pali ba

¹ Dawan ba yang ra balan, bara ai win:

² “Man, upla luhpia, aisas tawankam uplika nani ra, bara wis: ‘Yang kuntrikam ra war blikuna ba ra, baha kuntri uplika nani ba wahbi sakisa aihwawakra ba.

³ Bara aihwawakra ba, suldiar ai waihla nani ba tawan lamara aula ba ra, trumpit ba puhbisa upla ra kaina manis maisa pakaia dukiara.

⁴ Upla kum walbia trumpit puhban ba bara baha ba kulkras sa, bara waihla nani ba, balbia bara ikbia, witin ai pruanka pâtka ba, klauna takisa;

⁵ kan walan trumpit puhban kuna bîla walras kan bamna; sakuna baha ba wali kulkan kan kaka ai rayaka ba swaki sakaia kan.

⁶ Sakuna aihwawakra ba kaikuya, suldiar nani ai waihla ba aula bara trumpit ba puhbras kaka, kaina manis upla nani ra maisa pakaia, bara waihla nani ba balbia bara upla nani ra ikbia kaka, naha na pruan kabia ai saurka ba tâwan; kuna yang aihwawakra ra makabamna baha pruanka nani dukiara.’

⁷ “Kan man ra, upla luhpia, yang aihwawakra baku mai mangkri, Israel tawanka dukiara. Man sturi mai wisna ba walaia sma, bara maisa pakaia kupia kraukanka ba.

⁸ Upla watawikira kum mapara aisamna witin pruaia wimna kaka, bara man bui witin ra aisaras sma kaka witin ra maisa pakaia ai rayaka ba natka wala daukaia, bara witin sin daukras kaka, baha saurakira ba ai saurka tâwan prubia, sakuna yang bui man ra mamkabamni ai pruanka ba dukiara.

⁹ Sakuna man natka wala ra, saurakira ra maisa pakma kaka ai rayaka ba natka wala ra lakaia, bara witin daukras sa kaka, witin prubia ai saurka mita prubia, kuna man swaki sâkma rayakam ba.

Klauna daukaia dukia ba

¹⁰ “Man, upla luhpia, Israel luhpia nani ra wis: ‘Man nani wisma: Pât nani bara saurka lâka nani ni yawan na wan pura paskan sa. Baha mita wan rayaka na aisawisa. ¿Yawan nahki raya kaia sip kabia?

¹¹ Kuna yang, Dawan, rayaki ba mata, swer takisni, watawikira nani pruanka ba brinki apia sa, witin ai rayaka natka ba lakbia bara raya kabia want sna, lâka saura brisma ba swis. ¿Dîa muni pruaisma?’

¹² “Man, upla luhpia, tawankam uplika nani ra wis: ‘Upla yamni kum saura daukbia kaka, ai kupia yamnika kanra bri kan ba mita swaki sâkbia apia, bara saurakira kum ba saurka daukaia lâka swibia kaka, ai saurka kanra dauki kan ba tâka mita prubia apia. Upla yamni ba saurka daukbia sa kaka, ai kupia yamnika lâka bri kan ba tâka mita lika raya kabia apia.

¹³ Yang raya kaia pramiska yabuna upla yamni kum ra, bara witin bahara ai kupia yamnika tniwi, saura daukbia, diara yamni daukan kum sin kulkamna apia, kuna saurka daukan ba mita prubia.

¹⁴ Pruaia ra lakamna sa kaka, saura dadaukra kum ba, sakuna naha ai saurka dauki lâka ba swibia bara yamni ra taukbia bara kasakka lâka ra,

¹⁵ bara kli laki yabia dîa brin nani ba, apia kaka dîa implikan nani ba, bara dîa rayaka lâka yabi ba daukbia, bara swibia saura daukaia lâka ba; kasak pali raya kabia, prubia apia.

¹⁶ Kan nanara yamni bara kasak lâka ra tauki bamna, raya kabia; bara kli kupi kraukamna apia saurka lâka daukan nani ba.’

¹⁷ Tawankam uplika nani wiaia sip sa yang kasak lâka kat daukras sna; sakuna rait pali ba lika, witin nani sa kasak lâka kat daukras ba.

¹⁸ Upla yamni ba, diara yamni ba swi si saura daukbia kaka, baha tâwan prubia.

¹⁹ Bara ban sakuna, saura dadaukra ba saurka swibia bara yamnika bara kasakka lâka daukbia kaka, baha tâka raya kabia.

²⁰ Man nani kli aisisma: ‘Dawan ba diara kasak kat daukras.’ Sakuna yang bui Israel luhpia nani, man nani kumi bani lâmka daukamna, dîa dîa daukram ba kat.”

Jerusalem kauhanka ba

²¹ Yang nani tasba wala ra ai brih wan ba wina mani 12 alkan, baha manka ra kati matawalsip bara yua matsip aimakan ba ra, Jerusalem wina waitna kum plapan kan ba balan bara ai win tawan ba waihla mihta ra kauhan.

²² Tihmia kum kainara plapan ba balras kanra, Dawan ba ai mihta yang purira mangkan; bara titan ra, waitnika ba balan ba ra, Dawan kli bîli aisanki ba aikan, bara sip sturi aisaras kapri ba swiri.

Tawan saurka lâka ba

²³ Dawan ba yang ra balan bara ai win:

²⁴ “Upla nani Israel tawanka nani slingban ba ra iwi nani ba, aisi taukisa: ‘Ebraham ba yakan kan ba ra, ban sakuna kuntrika aiska ba dawanka takan; yawan upla kau ailal banhwi na, kau wan raitka brisa kuntrika na dawanka nani takaia.’

²⁵ Baku bamna, wis: ‘Dawan ba naku wisa: Man nani wîna tala wal pisma, aidul ra mayunisma, upla ikisma, ¿bara lukisma kuntri dawanka kaia?

²⁶ Ikaia dukia nani wal taiban lâka daukisma, yang misbara kaikisna dukia daukisma, sut marit lâka sauhkisma, ¿bara lukisma kuntrika dawanka taki banhma?’

²⁷ “Bara sin wis: ‘Dawan ba naku wisa: Rayaki wal swer takisni, tawan sauhki tikan nani ra iwi nani ba sin ikan kabia, bara insla ra iwi nani ba yabrika takbia bara daiwan wail nani mita pibia, bara walpa tilara iwi nani ba, siknis wal prubia.

²⁸ Kuntri ba upla iwras tasbaya kum sauhki tikan ba baku ra laki swimna, bara ai karnika dukiara ai mayunanka tara bri ba sauhkamna. Israel ilka tara nani ba, upla iwras ilka nani takbia; upla kum sin bâk lubia apia.

²⁹ Upla iwras tasbaya ra, yang kuntri ba sauhki tikanka ra dingkri ai saurka tara pali witin nani daukan ba tâwan; baku mika ai dara wali banhbia yang sika Dawan sna ba.’

³⁰ “Tawankam uplika nani ba, tawan kutbanka durka ra aisisa man dukiamra, bara ai walka ra wisa: ‘Man nani bal, kaisa walaia Dawan wina maisa pakanka balan na.’

³¹ Baku bamna, upliki ba aula Dawan lamara, bara bal iwbia, ai natka ba baku, bîlam ba walaia. Kuna walan daukras. Kli kli aisisa latwan lâka lawana ba baku, kuna ai kupia ba lika lalah ninara auya sa.

³² Witin nani, man lamtwan lâka lawana aiwanan baku mai kulkisa, bîla baikra pranakira, bara arp ba yamni kangbi ni. Sturi aisisma nani ba walisa, kuna daukras.

³³ Ban sakuna, baha sut ba piua aimakbia; bara ai tânka bribia kasak pali prapit kum kan witin nani tilara.”