Isikiel 32 - DAWAN BÎLA AISKA

Kabu ra daiwan saura tara ba wal, king fero ba prakan sa

¹ Yua pas, kati 12, mani 12 alkan ra, Dawan ba yang ra balan bara ai win:

² “Naha prura lawana na, king fero Idsip kingka ba lawana aiwans: ‘Nisan nani layanka kum baku sma; kabu ra daiwan saura tara baku sma: awalkam ba buhutni daukisma, minam wal laya ba buhutni daukisma bara aubra ba blakisma.

³ ‘Dawan ba naku wisa: Tawan ailalkira nani tilara kama sin, iliski ba man puramra mangkamna bara baha wal mai alkamna.

⁴ Tasba tani ra mai raskamni bara tasba ra mai bataki mai swimna. Yabamna kasbrika ra piawira nani sut ba man puramra buaia, bara wînam tara ba daiwan wail nani sut mita pibia.

⁵ Pruram wînam sukwanka ba wal, il tara bara twi langni nani ba banhkamna.

⁶ Tâliam wal tasba ba buskamni, baha wal il tara nani ba kat wabia, bara baha wal awala albangka bîla nani ba aibanhbia.

⁷ Yang mai sauhki tikamna bara yabrika kasbrika ba tihmu takbia bara slilma nani ba ai ingnika ba daskbia; kasbrika wal lapta ba bikamna bara kati ba kau ingbia apia.

⁸ Man tamka, kasbrika purara ingwi nani ba sut daskamna, bara tihmu ni kuntri ba banhkamna. Yang, Dawan, kasak aisisna.

⁹ ‘Mai sauhki tikri dahra ba, kuntri nani kakaira apia sma ba kat wabia, bara yabamna tawan nani ailal ba aihka ai dahra walaia.

¹⁰ Man tamka, sibrin lâka yabamni tawan manis ra; ai kingka tâ iwan tara pali kabia, sordki mawanra sakamna ba ra. Kauhma ba ra, witin sibrin mita tatatbia klauna ai rayaka dukiara.

¹¹ ‘Dawan ba wisa: Babilon kingka, sordki ba puramra kauhbia.

¹² Yang daukamni tawankam ailalkira nani ba, war aiklaklabra prautka ra nani sordka ra kauhaia. Idsip prana tara ba tnata mangkbia, bara tawankam ailalkira nani ba danh takbia.

¹³ Sauhki tikamni bîp nani lî di ba wina, bara baku upla bara daiwan sin kau ai mina ra taibi buhutni daukbia apia.

¹⁴ Baha ningkara baku yabrika laya ba sangni takbia, awala ba lamni pali batana laya baku kabia. Yang, Dawan, kasak aisisna.

¹⁵ Idsip ba upla iwras tasbaya daukamna bara kuntri ba bîla man takbia, upla âpu ba ra, ai dara wali banhbia yang sika Dawan sna ba.’

¹⁶ “Naha na prura lawana kum sa, bara baku aiwani banhbia mairin nani nisan sât sât wina ba, Idsip bara ai uplika ailal ba pura mata inbia piua ra. Yang, Dawan, kasak aisisna.”

Idsip ba prura tasbaya ra

¹⁷ Mani 12 alkan, kati 12 bara yu 15 ra, Dawan ba yang ra balan bara ai win:

¹⁸ “Man, upla luhpia, mairin nani nisan sât sât wina ba kira prura lawana kum aiwans, Idsip nisanka ailalkira bara wihta nani ba dukiara: ‘Karnakira nani tasba ra ba, tasba mununhtara kauhbia, pat raiti ra iwi wan nani ba kira.

¹⁹ ¿Dîa, man ba kau pranakira sma ki wala nani wal? Iwi was bara aitniks, gâdkas nani ba lamara.’

²⁰ “Witin nani war ra kauhbia sord ra prui nani ba aikuki. Sordka ba pat ridi sa. Kwâra tara nani brisma ba witin nani wal wabia.

²¹ Tâ brabrira kau karnakira nani ba, prura kingka tasbaya ra Idsip uplika nani bribia ai aslika nani ba sin naku aisi: ‘¡Pat raiti ra iwi wan sa! ¡Kauhi prawisa gâdkas nani war ra pruan nani ba aikuki!’

²² “Bahara sa Asiria, ai suldiar sut aikuki raitikam ba kutbi kir brisa. Witin nani sut war ra pruan ba.

²³ Biki banhwan sa raiti pakni ra. Ai suldiarka nani ba sirang tara ikan kau raya nani ra; sakuna war ra pruan nani ba nanara Asiria raitika ba kir brisa.

²⁴ “Bahara sa Elam. Ai suldiarka sut aikuki, raiti ba kutbi kir brisa. Witin nani sut ba war ra pruan, gâdkas nani sut ba tasba munhtara kat kauhan. Tâ ikan raya nani tilara, sakuna nanara kulkanka âpu sa, raiti ra iwi wan nani ba.

²⁵ Elam ba tnikan sa ai suldiarka pruan nani ba tilara; witin nani sut gâdkas war ra pruan, nanara ai raitika kir kutbi bri ba. Tâ ikan lâka tara daukan, raya nani ra; kuna nanara kulkanka âpu sa, raiti ra iwi wan nani tilara, upla mita ikan nani tilara takaskan.

²⁶ “Bahara sa Mésec bara Tubal, ai suldiarka sut aikuki ai raitika ba kutbi kir brisa. Witin nani sut gâdkas war ra pruan nani ba tâ ikan tara daukan raya nani ba wal.

²⁷ Bikras sa, piua luan ra kulkan tara bri kan uplika nani bikan ba tilara. Ai aiklabaika dukia nani prura kingka lâka ra brih wan ba, bara ai sordka ai mihta ra bri ba, bara ai kan kahbaika, ai lama prâka, baha ningkara sibrin lâka tara yaban raya nani ra.

²⁸ “Idsip, man bahara kama, idan nani tilara, mai drusbi tiki bara mai bikan, war ra pruan nani tilara.

²⁹ “Edom ba bahara sa, ai kingka bara ai tâ brabrira nani aikuki; karnakira kan sakuna, war ra pruan nani tilara mai bikan Dawan luha nani aikuki, raiti ra lahban nani tilara.

³⁰ “Bahara sa yahbra tani ra tâ brabrira nani sut, Sidón wihtka nani sin. Karnakira kan bara sibrin tara lâka yaban, sakuna nanara lahban sa, war ra pruan nani aikuki, bahki kulkan lâka ni blaki. Dawan luha sa, bara bikan sa kulkan lâka luha war ra pruan nani tilara, raiti ra lahban nani tilara.

³¹ “King fero kaikbia ba ra, ai maisa nihkbia ai uplika pruan nani sut dukiara; kan witin bara suldiar sut war ra pruan bamna. Yang, Dawan, kasak aisisna.

³² King fero, sibrin lâka tara pali yaban, raya nani tilara; baku bamna bikan Dawan luha nani tilara, war ra pruan nani tilara, ai suldiarka ailal nani sin. Yang, Dawan, kasak aisisna.”