Isikiel 30 - DAWAN BÎLA AISKA

Idsip klalka ba

¹ Dawan ba yang ra balan bara ai win:

² “Man, upla luhpia, yang nini ra aisas bara wis: ‘Dawan ba naku wisa: Kisbram baha yua dukiara

³ pat aula ba dukiara; ¡Dawan yua ba pat aula sa! ¡Yua dista dingkan kum kabia, yua saura pali kum nisan nani mapara!

⁴ War ba balbia, Idsip mapara. Bara upla ailal bahara ikan kabia, bara ai yuyaka nani ba implikan kabia, bara Idsip ba sauhki tikan kabia, plamaika nani ba sut, bara Etiopía ba tatatbia.

⁵ Baku sin kauhan kabia war ra, Etiopía bara Libia suldiarka nani ba, Lidia wina, Arabia aiska wina, Cub wina bara tawan wala nani ba wina sin; bara kuntri wala nani aikuki asla takan ba sin.

⁶ ‘Dawan ba naku wisa: Ya Idsip ra tâ baikbia ba sut prui banhbia war ra, Migdol wina, Asuán kat. Idsip ai karnika dukiara ai mayunanka ba, swira lâka takan kabia. Yang, Dawan, yang baku aisisni.’

⁷ “Idsip ba kuntri kum kau bîla man kabia, kuntri wala nani wal; tawanka nani ba aiska sauhki tikan kabia.

⁸ Yabrika kuntrika ba pauta ni angki sauhki tikan kabia bara ya ya tâ baiki ba sut, baku mika ai tânka bri banhbia yang sika Dawan sna ba.

⁹ “Idsip ra klala yabaia yua balbia ba ra, bîla twatwilkra blikamni, kabuk upla nani maisa pakaia Etiopía uplika ai dahra walras ba, baha nani sirang tara pali iwbia. Baha yua ba pat balaia man sa.

¹⁰ “Yang Dawan sna ba, wisni: Nabucodonosor, Babilon kingka ba yus munamna, Idsip kukanka ba sauhki tikaia.

¹¹ Witin ai suldiar daknika aikuki wabia, upla kau saura nani ba, kuntrika ba sauhkaia. Idsip purara kauhbia ai sordka wal, bara kuntri ba pruan nani ni banhki swibia.

¹² Yabrika Nilo ba lâwbia, bara kuntrika ba upla saura mihta ra swimna; baha nani tringsarka sut aikuki sauhki tikanka tara pali swimna, kuntri aiska bara dîa dîa bahara ba sut sin. Yang, Dawan, baku aisari.

¹³ “Yang Dawan sna ba, aisisni: Aidul nani ba sauhki tikamna bara Menfis ra gâd bahki nani ba âpu daukamna. Idsip ba kli, ya tâ briaia âpu kabia, bara sibrin lâka tara ni kuntri ba banhkamna.

¹⁴ Idsip waupasa tani ba sauhki tiki swimna, Soan tawanka ba pauta ni angkamni, bara Tebas mapara lâka dauki pât ra lakamna.

¹⁵ “Sin purara kupi baiwanka laikamna, baha lika Idsip karnika ba, bara Tebas yuyaka ba sauhki tikamna.

¹⁶ Idsip ra pauta klauhan mangkamna, bara Sin ba latwan mita yuswi kabia; Tebas kutbanka ba sauhki tikan kabia, bara Menfis ba kakna pali ra bal rausauhkbia.

¹⁷ On bara Bubastis wahmika nani ba war ra prubia, bara upla wala nani silak ra brih wabia.

¹⁸ Yang bui Idsip karnika ba sauhkamna ba ra, ai karnika dukiara aimayuni ba danh daukamna ba ra, lapta ba tihmu takbia Tafnes ra; kasbrika kum Idsip pura bikbia, bara ai tawanka uplika nani ba silak ra brih wabia.

¹⁹ Yang lika Idsip mapara lâka daukaia ba, daukamna, bara ai dara wali banhbia, yang sika Dawan sna ba.”

²⁰ Yua 7, pas kati, mani 11 alkan ra, Dawan ba yang ra balan bara ai win:

²¹ “Yang bui king fero klahkla krikri, Idsip kingka ba, bara upla kum sin rakras, blakras sa sin, ai karnika brih kli ai sordka alkaia.

²² Baha mita, yang Dawan sna ba, naku wisni: Yang param takri king fero waihla, Idsip kingka ba. Klahkla wâlsut krikamna, klahkla pain ba bara pat kriwan kan ba sin, bara yabrika sordka ba ai mihta wina kauhbia.

²³ Idsip uplika nani ba yakabrira daukamna nisan wala nani tilara, baku sin kuntri sât sât nani tilara.

²⁴ Bara yang Babilon kingka ra karnika yabamna, bara sordki witin mihta ra mangkamna. King fero klahkla nani ba krikamna, bara witin brukbia, insauhkan ai dahra walbia bara ai waihla nani mawanra.

²⁵ King fero klahkla wina saki, Babilon kingka klahkla ra karnika nani yabamna. Yang Babilon kingka mihta ra sordki ba mangkamna bara witin Idsip mapara bukbia, baku ai dara wali banhbia yang sika Dawan sna ba.

²⁶ Yakabrira daukamna Idsip wina nani ba tawan bara nisan sât sât tilara iwi nani ba, bara ai dara wali banhbia yang sika Dawan sna ba.”