Isikiel 3 - DAWAN BÎLA AISKA

¹ Baha ningkara ai win: “Upla luhpia, naha wauhtaya ulbanka na pis, bara ningkara Israel nisanka ra aisas.”

² Bîli ba kwâkri, bara witin mita ai munan baha wauhkataya ulban ba piri.

³ Baha ningkara ai win: “Nanara langks naha ulbanka maikuna na, bara baha wal biamra banhki dauks.” Yang piri, bara bîli ra damni kata, nasma baku.

⁴ Ningkara ai win: “Was bara aisi wis, Israel tawanka ra dîa yang wiaia sna ba.

⁵ Yang mai blikras sna upla nani bîla tihu aisi nani ra, apia kaka bîla karna nani tânka briras nani ra, sakuna mai blikisna ba Israel luhpia nani tilara.

⁶ Nisan nani bîla tihu, twisa karna aisi nani ba tilara mai blikras sna, man baha wali sip tânka briras kama ba. Ban sakuna, baha nani tilara waia mai blikri kata kaka, witin nani mai walaia kan.

⁷ Sakuna Israel luhpia nani mai walan daukras kabia, kan Israel luhpia nani yang aisisna ba walan daukras kan. Witin nani sut ba brabrukra sa bara lal sin karna.

⁸ Sakuna yang lamla karna daukisni bara mapara brabrukra sin, witin nani baku.

⁹ Daimans baku karna pali mai daukamni, walpa wal kau karna mai daukamni. Sîa yapara, sibrin sin mai daukbiara witin nani mawanra, mapara babura kabia sin.”

¹⁰ Ningkara ai win: “Pain ai wals diara sut mai wiaisna bara sinskam ra klaki mangks.

¹¹ Was, uplikam nani ra tasba wala ra brih wan bâra ba kaiks, witin nani man ra walbia sapa bara walras kabia sin, witin nani ra wis: ‘Naha Dawan aisisa.’ ”

¹² Ningkara Gâd karnika ba mita ai bukan, bara bin tara kum yang ninira ba walri tasba nikbi baku takan, Dawan prana tara ba ai pliska ba wina buan ba ra.

¹³ Baku sin walri, rayaka bri ba tnawa binka, kumi wih wala wal asla taki kan ba, bara wilwaika binka ba sin, witin nani kainara auya kan ba; bara bin tara pali kan, tasba nikban tara baku.

¹⁴ Gâd karnika ba ai bukan bara baha wina ai sakan, bara yang sari bara kupi kriwan takan, kan bâra Dawan ai mihta karnika wal ai alki kan.

¹⁵ Bara Tel Abib ra wari, Quebar awala un ra, Israel luhpia nani tasba wala ra bahara ra iwi kan ba ra, bahara takaskri yu matlalkahbi pura kumi, witin nani tilara katni, dîa daukaia bara dîa wiaia tânka briras katna.

Dawan Isikiel ra aihwawakra baku mangkisa

¹⁶ Bara yu matlalkahbi pura kum luan ra, yang ra Dawan bîla balan bara ai win:

¹⁷ “Upla luhpia, yang aihwawakra baku mai mangkisni Israel watla ra, bara dîa mai wimna ba baha man wima witin nani pat ai dara wali banhwi kaia mata.

¹⁸ Yang saurakira kum ra ikaia lâka mangkamna ba ra, man witinka ra smalki lâka daukras kapram kaka ai saurka daukanka ba swibia, raya kaia dukiara; bara witin prubia ai saurka ba tâwan; sakuna baha tâlia mana ba, yang bui man ra mai kulkamni.

¹⁹ Sakuna man smalki lawi daukram kuna, ai kupia lakras sa ai saurka ba wina, bara ai yabalka saura ba swiras, bara witin prubia, kuna man sulkam ba pri sakram kabia.

²⁰ Baku sin sip sa, kasakkira kum ai yabalka wina taki, saurka daukbia bara yang mina prukaika mangkamna kainara, man mita kupia kraukras sma kaka, witin prubia. Yang bui witin diara yamni daukan ba kulkamna apia, bara ai saurka ra prubia, sakuna man ra mamkabamni witin ai prurika ba mana.

²¹ Sakuna man, ban waitnika ba ra kupia kraukma kaka, saura daukaia apia dukiara, bara witin saura daukras kabia kaka, witin ban raya kabia smalkram tâka, bara man sin sulkam pri sakram kabia.”

Isikiel aisaras takisa

²² Bara Dawan ai mihta yang purira ai mangkan, bara ai win: “Bus, bara twi ra taki was, bahara man wal aisamni.”

²³ Bara yang bui twi ra taki wari bara bahara Dawan prana ba kaikri, baha prana ba Quebar awala un ra kata baku; bara maiwanra wih tasba kat bawatni.

²⁴ Bara Gâd karnika ba yang ra diman bara mini ra aibapan. Ningkara Dawan ba yang ra naha natka ra ai aisin: “Dims, bara durkam praks wamtla bilara.

²⁵ Kaiks, witin nani kiwa ni mai priskbia baha tânka ba man baha wina takaia apia, uplikam nani aikuki bâra kaia.

²⁶ Baha purkara yang mita daukaisna man twisam ba darkayam ra prawbia, bara sturi aisaras kama. Man sip smalkma apia, tawan kum mapara babura kabia sin.

²⁷ Sakuna yang sturi kum mai wiaia want sna piua ra, yang kli maikrika sturi aisama, bara ningkara man wima: ‘Dawan ba naha aisisa.’ Ya walan dauki ba walbia, sakuna ya walan daukras ba sin walras kabia, kan tawan kum mapara babura nani sa.