Isikiel 29 - DAWAN BÎLA AISKA

Idsip mapara dahra aisinka ba

¹ Yua 12, kati matawalsip bara mani matawalsip ra, Dawan ba yang ra balan bara ai win:

² “Man, upla luhpia, nanara king fero ra was, Idsip kingka ba, bara yang nini ra witin mapara smalks, bara Idsip aiska mapara sin.

³ Wis: ‘Dawan naku wisa: Yang param takisni man waihlam, king fero, Idsip kingka, daiwan aihka saura tara, awalkam ra bâra sma bara aisisma: Nilo awala ba yang awalki, yang daukri.

⁴ Pingkrus unam ra mangkamna, bara yabrika awalkam inskika nani ba, ai taya ra alki takaskbia. ¡Awalkam wina mai sakamna, inskika nani sut kira taya ra alkan ba kat!

⁵ Upla iwras tasbaya ra mai lulkamna, awalkam inskika sut aikuki; plis langni ra kauhi banhma, bara upla kum sin mai wahbia apia mai bikaia dukiara. Yabrika mai pibia daiwan wail kraskira nani, kasbrika pura ba wina piawira nani ba sin.

⁶ Idsip ra iwi uplika nani sut ai dara walbia, yang sika Dawan sna ba. Israel tawanka ba, ai tâ baikma wisi mai plikan, kuna man ba kayu baku katma:

⁷ mihtam nani ra alkan ba ra, man kriwram bara tnaya mina ra yaram insauhkan; man ra ai tâ baikaia munan ba ra, man kalram bara yabram kauhan.

⁸ ‘Baha mita, yang Dawan sna ba, wisni: Idsip ba, yabrika sord wal rau mai sauhkbia, bara uplikam nani ba bara daiwram nani ba sut ikbia.

⁹ Bara upla iwras tasbaya takbia bara upla nani ba ai dara walbia, yang sika Dawan sna ba. Man wiram: Nilo ba yang duki, yang daukri.

¹⁰ Bamna aitani, yang param takisni man waihlam kaia bara walkam sin. Upla iwras tasbaya sibrinkira mai daukamna, bara upla âpu kira, Migdol wina Asuán kat, Etiopía tasbaya piarkika ba kat.

¹¹ Upla bara daiwan sin bâk lubia apia, mani yawanaiska wâl bahara upla sin iwbia apia.

¹² Idsip, man ba mai daukamna, kuntri kum diara âpu pali kaia; mani yawanaiska wâl tawankam nani ba, sauhki tikan tara ra kabia, tawan wala sauhki tikan wal kau purkara saura kabia, bara uplikam nani ba baha wina sakamna bara yakabrira mai daukamna, tawan wala nani ra, bara nisan wala nani tilara sin.

¹³ ‘Yang Dawan sna ba, aisisni: Mani yawanaiska wâl lubia ba ra, Idsip uplika nani ba yang kli asla daukamni kuntri wala nani ra yakabrira daukri ba wina.

¹⁴ Yabrika Idsip silak uplika nani ba, kli tawi balbia bara Idsip waupasa tani ra iwbia, kainara bâra kata pliska ra; bahara king lâka bahki kum mangkbia.

¹⁵ King lâka kau bahki kabia sut tilara, bara kli bubia sin apia, nisan wala nani purara. Sirpi pali daukamna tâka mita, nisan wala ra taibia apia.

¹⁶ Bara Israel uplika ba kli Idsip ra kasak lukbia apia, kan naha mita yarka kaikbia, nahki witin nani aitani daukras kan ba hilp pliki wan ba piua ra. Baku mika tânka bri banhbia yang sika Dawan sna ba.’ ”

¹⁷ Pas kati, yua pas ra, mani 27 bilka ra, Dawan ba yang ra balan bara ai win:

¹⁸ “Babilon kingka Nabucodonosor, ai suldiar nani ba Tiro mapara blikan; bamna upla nani lal ba sut ba takbi pahpaya kat swin; sakuna witin bara ai suldiar nani sut sin witin nani Tiro mapara aiklabanka wina yamnika kumi sin sakras kata, Tiro mapara aiklabanka ba wina.

¹⁹ Baha mita, yang Dawan sna ba, wisni: Yabaisna Nabucodonosor, Idsip ba ai mihta ra bribia, bara ai yuyaka ba mihta dakbia, bara dîa dîa bri ba sut sin; dîa implikbia ba wal, ai suldiarka nani ra aibapi bri kabia.

²⁰ Yabaisna Nabucodonosor ba, Idsip bribia, Tiro mapara aiklabanka bukan ba mana; kan yang dukira wark daukan sa. Yang, Dawan, kasak aisisna.

²¹ “Baha piua ra yabaisna, Israel tawanka ba ai karnika kau briaia, bara man, Isikiel, sip kama aisaia param pali. Baku mika ai tânka bri banhbia yang sika Dawan sna ba.”