Isikiel 28 - DAWAN BÎLA AISKA

Tiro kingka mapara dahra aisanka ba

¹ Dawan ba yang ra balan, bara ai win:

² “Man, upla luhpia, Tiro kingka ra wis: ‘Naku wisa Dawan ba: Kupiam ba aimayunra lâka ni banhwan, bara man ba gâd sma lukram, gâd nani iwaika kir ra iwi ba, bara kabu ni kir kutbi mai bri ba. Sakuna man lika gâd apia sma, kuna man waitna sma, bara lukisma gâd baku sinska lâka brisma.

³ ¿Dîa lukisma Danel wal man kau sinskira sma? ¿Dîa man wina diara yukuwan ra âpu sa ki?

⁴ Sinskam lâka bara diara daukaia sip lâka wal yuyakam ailal pali briram, diara auhbaia gul bara silbar ni banhkram.

⁵ Diara âiatkra sip kaia lâka ba wal, yuyakam nani ba ailal pali daukram, bara yuyakam nani ba mita aimayunra mai daukan.

⁶ Baku bamna, Dawan ba wisa: gâd sinska lâka brisma lukisma bamna,

⁷ yabrika tringsar nani mampara balbia, upla kau saura nani ba, ai sordka sâkbia rau mai sauhkaia, man, sinskira pali bara pranakira sma ba; bara pramna tara ba tasba kat alahbia.

⁸ Albangka tara ra mai rungkbia, bara saura pali pruma kabu lalma ra.

⁹ ¿Bara ban damra wali kama ki, gâd baku, taibi mai muni nani ba mawanka ra sma ba ra? ¡Mai iki nani ba mihta ra man ba upla kum baman sma!

¹⁰ Tringsar nani mihta ra pruma, upla gâdkas nani prawi ba baku. Yang, Dawan ba, aisari; Yang baku aisaia wîri.’ ”

Tiro kingka dukiara pruan lawana aiwananka

¹¹ Dawan ba, yang ra balan bara ai win:

¹² “Man, upla luhpia, pruan lawana kum aiwans, Tiro kingka pura mata, bara wis: ‘Dawan ba naku wisa: Man ba sampla kum sma, kasakka mapara, sins lâka aibanhwan bara kasak prana pali sin.

¹³ Eden ra katma, Gâd giadinka ra, mai sakahkan kan walpa pranakira sât sât wal: rubi walpaya, krisulait, jadi walpaya, topas walpaya, karnilian walpaya, jasper walpaya, sapair walpaya, garnit walpaya, esmeralt walpaya; bangkilkam ba bara kiamam lula ba gul ni ridi daukan kan, mai paskan yua wina.

¹⁴ Kirubin kum mita main mai kaiki kaia mai swiri, Dawan ilka holikira ra katma, bara slilma nani tilara wapi tauki katma.

¹⁵ Daukankam ba kasak kata, mai paskan yua ba wina; man ra watawi lâka bal takan ba kat.

¹⁶ Atkaia dukia ailal brisatma ba wal, aibanhwan takram sa, saura lâka bara taiban lâka nani ni. Bara yang maiwan wina mai kangbri; Gâd ilka ba wina kangbi mai sakri, bara kirubin main mai kaiki kata mita, slilma nani tila wina mai sakan.

¹⁷ Pramna ba mita, mamyunra wal banhkram; kulkanka tara brisma ba mita sinskam lâka tikan. Yang tasba ra mai batakri, swira lâka ra mai lakri king nani mawanra.

¹⁸ Saurka ailal pali daukram, bara aisawram pali sma atkaia dukia nani brisma ba wal; tempelkam nani sin tâski daukram. Bara yabri tilam kat urhwan pauta klauhan kum bâra âpu mai daukbia dukiara. Upla sut mai kaikbia nanara naha tasba ra, yamhpus baman takram ba.

¹⁹ Nisan nani sut mai kakaira ba, mai kaiki tâ iwisa. Diara aihka saura pali takram; ¡ban kaia ra âpu kaia ra tawram!’ ”

Sidón mapara dahra aisanka ba

²⁰ Dawan ba, yang ra balan bara ai win:

²¹ “Man, upla luhpia, Sidón tani ra taws bara yang nini ra witin mapara aisas.

²² Wis: ‘Naku wisa Dawan: Yang, man waihlam kaia param takri, Sidón; man tilamra nina mayunra lâka bukan kabia. Bara man mampara lâmka daukan kabia bara marikbia yang, holikira sna ba lâka; ai tânka bribia yang sika Dawan sna ba.

²³ ‘Man mampara siknis nani blikamna, bara tala laiwi kabia man yabalkam nani ra; uplikam nani ba sut prui tiwan kabia, sord nani ni rausauhkan kabia, tnaya bani wina. Bara ai tânka bribia yang sika Dawan sna ba.

²⁴ ‘Israel ba kli pât wauhbia apia, kiaya tatwa bara latwan pali ba misbara ni upla wala nani kîa ba mita kaiki ba. Bara ai tânka bribia yang sika Dawan sna ba.’

²⁵ “Yang Dawan sna ba, naku wisni: Asla daukamna Israel ba, nisan nani tilara yakabrira ba wina; bara marikamni holikira sna lâka ba, nisan nani nakra ra. Israel klauna ai kuntrika ra iwbia, baha kuntrika Jekob, duki dadaukra ra yabatna ba.

²⁶ Bahara iwbia lamni bara trabil âpu kira. Bara utla nani paskbia bara wain nasla nani dauki mangkbia. Yang lâka daukamna baha lamara iwi nani ba, Israel ra misbara kaiki nani sut ra. Baku mika ai tânka bribia, yang sika Dawan sna ba, Israel Dawanka sni.”