Isikiel 27 - DAWAN BÎLA AISKA

Tiro tawanka dukiara pruan lawana aiwananka

¹ Dawan ba yang ra balan bara ai win:

² “Man, upla luhpia, naha pruan lawana na aiwans

³ Tiro ba dukiara, baha tawanka kabu ra taki auya bara nisan nani wal diara atki ba, kabu lamara tawanka ailal nani wal. Wis Dawan ba naku wisa: ‘Tiro, man ba, mamyunisma man aimakaia butka pranakira ba ra kasak sma wisi.

⁴ Man ba, kabu kupia kat karnikam ba auya, paskankam nani ba sut purkara kau prana sa.

⁵ Tat nani brima ba sut Senir ilka wina awas dusa nani ba brih balan baha ni, kwala bapaika dusa ba paskan, Líbano yalamka wal daukan sa;

⁶ kwahikam nani ba, Basán ibanka wal daukan; pura bikaia ba saiprus dusa wal daukan, Chipre kabuka un wina brih balan ba, bara daiwan napa manakira wal wilkan.

⁷ Duri wakaia dusa ba, Idsip wina wahmuk kwalka maman kan; plakin baku bri katma. Pura bika kwalka ba balianta bara pauni kata, Elisá kabuka un wina brih balan ba.

⁸ Kwahi kaubi uplika nani ba, Sidón bara Arbad wina; kiaptinkam nani ba, tânka brabrira pali sa, man uplikam.

⁹ Tânka brabrira pali uplika nani, Guebal wina ba, tânkira pali aisawan nani ba paskisa. Kabu dwarka tara nani sut selarka nani ba, diara nani brisma ba wal atki kata.

¹⁰ Persia, Lidia, bara Libia wina waitnika nani ba, war aiklaklabra pali kata suldiarkam nani tilara; mai sakahki kata, kainam kahbaika lamla mangkaika ba mita, bara pramna tara maiki kata.

¹¹ ‘Arbad uplika nani, suldiarkam nani aikuki, kutbankam ba kir bri kan, bara tawerkam ra Gamad waitnika nani uli bâra kan. Ai kan kahbaika nani ba kutbankam aiska ra paman, bara baha wal kau pramna dauki katma.

¹² Yuyakam tara kan bamna, Tarsis uplika man wina diara atki kan, bara baha mana silbar, ayan, lit nani maikan.

¹³ Baku sin Grik tasbaya, Tubal bara Mésec man wina diara atki kan, baha mana alba bara bras maikaia win.

¹⁴ Bet-togarmá wina nani ba man ra aibapi kan wark daukaia araska ni bara ulaia araska ni, bara muyul ni sin.

¹⁵ Rodas uplika nani man wina atkan. Bara sin kabu un ra nisan ailal nani wal wark daukram, elepant napa bara iban dusa wal mai aibapan.

¹⁶ Edom ba diara man wina atki kan, diara ailal bri kapram bamna; baha granit walpaya, kwala balianta, kwala maman nani, wahmuk kwalka mana pali, kabu dusa manakira bara rubi walpaya.

¹⁷ Baku sin man wina atki kata, Juda bara Israel luhpia nani; bara mai aibapi kan, mint, plawar mâ, nasma, pastil, batana bara yukaia saika nani ni.

¹⁸ Damaskus ba, diara ailal pali man wina atki kan, yuyakam nani sin. Mai aibapan Helbón wainka wal bara Sahar daiwra taya ni.

¹⁹ Uzal wina wain brih balan, ayan slilkan, sinimint bara dus kîa painkira atkaia dukia brisma ba mana.

²⁰ Dedán ba, aras ulaika wal mai atki kan.

²¹ Arabia bara Quedar lalka nani sut man wina baman diara atki kan: mai aibapi kan sîp luhpia nani, sîp tara nani bara guts nani ni.

²² Sabá bara Raamá diara âiatkra nani ba man wina diara âiatkra kata, bara mai aibapi kan, kau sîka kîa pain ni, walpa manakira bara gul ni sin.

²³ Harán, Cané, Eden bara Sabá, Asiria diara âiatkra nani ba, bara Media uplika aiska ba, man wina âiatkra kata;

²⁴ man ra mai atki kan kwala manakira, kwala balianta, kwala maman nani, tat pura mangkaika mapla sât sât bara pitbanka karna pali sin.

²⁵ Tarsis wina duri tara nani ba bali kan, wala wala diara nani kwahki kan. ‘Duri tara kum kabu lalma ra baku katma, yuya ailal ni auhban kan.

²⁶ Kwahi kaubi nani ba, lî tihu nani ra mai brih wan, kuna lalma payaska kabu lalma ra mai sauhki tikan.

²⁷ Yuyakam nani brisma ba, diara nani brisma ba, bara atkaia dukia brisma ba selarkam bara pailatkam nani ba, duri ukum tukuski nani ba, diara âiatkra nani ba, war aiklaklabra, bara duri tara bilara wark dauki sut ba kabu mununhtara iwi wabia bahara rungkma yua ra.

²⁸ Duri tara ra wark taki nani kisbanka wal, ripka nani ba tatatbia.

²⁹ Kwahi kaubi nani ba, ai dwarka tara wina iwbia; selar bara pailat nani sut ba tasba ra pâli kauhbia.

³⁰ Ai bîla saki winbia man dukiamra wirha tara wal inbia. Yamhpus ailal purara yakabia bara yamhpus ra aikarbia.

³¹ Man dukiamra ai tâwa ba irbia, upla pruan sarka kwalka dimbia, bara kupia wirha tara pali wal inbia.

³² Man dukiamra upla pruan lâwanka kum aiwanbia, bara sarikira wibia baha dukiara: ¿Ya pali Tiro mawanra wabia, baha tawanka kabu ra ba?

³³ Kabu un ra atkaia dukia nani aula ba ra, nisan ailal pali ra ai âuyapah yabi kapram. Yuyaka ailal pali bara diara daukan ailal ba, tasba kingka nani ra yuyakira dauki kan.

³⁴ Nanara kabu mita sauhki tikan, lî tihuka ra rungwan. Dukiam nani bara uplika nani sut wal, man aikuki tihu tara ra iwi waram.

³⁵ Kabu un ra tawanka uplika nani sut ba, tâ iwan man dukiamra; kingka nani ba sirang iwan sa, sirang iwan ba mawanra kaikisma.

³⁶ Kuntri wala wina diara âiatkra nani ba, sirang iwan mai kaikan. Bara aihka pali ra tawram ban kaia ra âpu takram.’ ”