Isikiel 25 - DAWAN BÎLA AISKA

Amón uplika nani mapara

¹ Dawan ba yang ra balan bara ai win:

² “Man, upla luhpia, Amón mapara taws, bara yang nini brih upla nani mapara aisas.

³ Wis, Dawan ai bîla witin nani ra aisi ba walbia: ‘Man nani liliakira wini banhram, tempelki tâski dauki kan ba ra, Israel kuntrika sauhki tikan ba ra, Juda uplika nani ba upla iwras tasbaya ra brih wan.

⁴ Bamna aitani, lalma uplika nani karnika mihta ra mai mangkamna, witin nani tasbaya ba bribia, bara bahara tint watla ba bukbia, bara takaskaia pliska nani daukbia. Witin nani namsla dâkma pata nani ba pibia, bara tiala laya brisma nani ba sin dibia.

⁵ Rabá ba kiamil nani piaika twiya daukamna, bara Amón ba sîp nani tasbaya ra lakamna. Baku mika man nani damra walma yang sika Dawan sna ba.

⁶ ‘Yang Dawan sna ba, naku wisni: Man nani, Amón uplika nani, mihtam takbi bara srutwi lilia takram; bara Israel ra bahki kulkram.

⁷ Baku bamna mihti man nani ra bukamna klala maikaia; bara nisan nani mihta ra mai mangkrika, dîa brisma ba sut mihtam dakbia dukiara. Tawan nani tila wina mai sakamna, nisan nani tila wina mai tikamna, aiska pali mai sauhkamna. Baku damra walma yang sika Dawan sna ba.’

Moab mapara

⁸ “Yang Dawan sna ba, naku wisni: Moab bara Seír nani wisa, Juda ba nisan nani wala wal baku sa.

⁹ Baku bamna yabal kum kwâkamna, Moab tani bâk; bara tâ kum wina tâ wala ra tawan âpu swimna. Baha tawanka ba, kuntri dukia diara manakira baku ba: Bet-jesimot, Baal-meón bara Quiriataim kat ba.

¹⁰ Yabrika, lalma wina nani ba ai tasbaya ba bribia, Amón tasbaya ba sin, baku mika nisan nani tilara upla kum sin Amón dukiara ai kupia kraukbia apia.

¹¹ Moab mapara lâka daukamni, bara baku witin nani ai dara walbia yang sika Dawan sna ba.

Edom mapara

¹² “Yang Dawan sna ba, naku wisni: Edom ba Juda ra pana munaia lâka daukan, bara baku saura pali pâtkira takan sa.

¹³ Baha mita, yang Dawan sna ba, aisisni: Mihti bukamna Edom ra klala yabaia, uplika nani bara daiwra nani ba sauhki tikaia. Sauhki tikan tara ra swimna. Temán wina Dedán kat, uplika nani ba sord malika ra prubia.

¹⁴ Edom ra pana munaia lâka daukamna, tawanki Israel ba wal; witin mita kupi baiwanka bara kupi aisawanka wal mapara bubia. Baku ai dahra wali banhbia, pana munaia lâka daukisna ba. Yang, Dawan, kasak aisisna.

Filisteo nani mapara

¹⁵ “Yang Dawan sna ba, naku wisni: filisteo nani ba pana munaia lâka daukan, ailal saura takan, ai kupia misbara tara wal; ban kaia ra ai waihla baku Israel mapara, sauhki tikaia kat brih wan.

¹⁶ Baha mita, yang Dawan sna ba, naku wisni: Mihti bukamna klala yabaia filisteo nani ra âpu daukamna quereteo nani ra, bara kabu un ra takaskan nani sut sauhki tikamna.

¹⁷ Saura pali witin nani ra pana munamna, kupi baiwanka wal klala yabamna. Baha piua ra naku daukamna ba ra, ai tânka bribia, yang sika Dawan sna ba.”