Isikiel 21 - DAWAN BÎLA AISKA

Dawan sordka ba

¹ Bara Dawan ba yang ra balan, bara ai win:

² “Man, upla luhpia, Jerusalem ra taws bara witin nani tempelka mapara smalks. Yang nini ra Israel kuntrika ba mapara aisas,

³ bara wis: ‘Naku wisa Dawan ba: Yang lika man waihlam takuna, sordki mihti ra alkuna, bamna kasakkira nani bara saurakira nani sut ikamna.

⁴ Âu, sordki ba sakamna upla kasakkira nani bara saurakira nani ba sut ikaisna, yahbra tani ba wina waupasa tani ba kat.

⁵ Bara upla nani sut ai tânka bribia yang, Dawan, sordki ba sakri, bara kli watlika ra mangkamna apia.’

⁶ “Bara man, upla luhpia, kupiam kriwan wal sarikira pali ins upla mawanra.

⁷ Bara ban kra mamkabi walbia kaka, dîa muni inisma, wis diara pat pali takaia ba dukiara, bara upla nani sut ba kupia ba kriwan kabia, bara klahkla ba swika kauhbia; bara upla kumi sin karnika âpu kabia, sut ba sibrin mita lula nani ba tatatwi kabia. Pat piua aula, pat pali takbia. Yang Dawan, baha kasak aisisna.”

⁸ Dawan ba yang ra balan bara ai win:

⁹ “Man, upla luhpia, yang nini brih wih aisas, bara wis yang, Dawan, adar maikri wiaia: ‘¡Sord ba, sord ba! Pat mala daukan bara lipisa.

¹⁰ Mala daukan sa, ikaia dukiara, lipni daukan sa ingnika ba biulwaia dukiara;

¹¹ lipni daukanka sa ai mihta ra bri kaia. Sord ba mala sa, bara lipni daukan sa, upla âikra mihta ra mangkaia.

¹² Bara man, upla, ¡kisbi karna wins, kan tawanki uplika nani ra ikaia bâk sakan sa, Israel tâ brabrira, wihta nani sut ra! Tawan uplika aikuki baku pruaia ra lakan sa, baku bamna latwan bri lamam pruks.

¹³ Yang, Dawan, kasak aisisna.’

¹⁴ “Man, upla luhpia, yang nini mâki aisas; sordkam ba aima wâl, kli aima yumhpa sin kupiam baiwan pali pruks. Naha sika ikaia sordka kum sa, ikaia lâka sordka sibrinkira sa, tawan ra, ani ani bani ra yuski munisa.

¹⁵ Witin sibrin lâka ni banhbia, manis pali ra rausauhkan kabia. Ai watla nani ra sord âikra ba mangkri sa. ¡Sordka ba klaki wapni daukan, imyula baku lipaia, iki tikaia dukiara mala daukan!

¹⁶ ¡Mala pali mai daukan kaka wantkam sni, smih tani ra, bara aihkika tani ra, baila, wâl ra klaki kabia!

¹⁷ Yang sin maisa pakamni kupi aisawanka lamni takbia kat. Yang, Dawan, naku wisni.”

¹⁸ Dawan ba yang ra ai aisan bara ai win:

¹⁹ “Yabal wâl klaks, Babilon kingka ba ai sordka wal bâk lubia. Yabalka wâl ba, sim kuntri wina takbia, bara yabalka tâ pali ra, sain mangkaia kama, baha wibia ani tawanka ra auya.

²⁰ Yabal kum klakaia kama bahak king ba ai sordka wal bâk luaia ba. Tawanka nani ba Rabá, Amón tasbaya bara Jerusalem, Juda kutbanka tara pali ba.

²¹ Babilon kingka ba, yabalka wâlsut tâ pali ra buan sa, bara dîa kaia ba laki kaikisa: Trisba nani ba nikbisa, ai gâdka nani ra walisa, daiwan âuya nani ba laki kaikisa.

²² Mihta aihkika wina trisba ba takan, Jerusalem tani ra marikisa, bara baha tânka, dahra wal kutbi alkaia dukia ni dimi iki tikaia sa, war aiklabia pura wini kira, durka nani ba yuski munbia, uli aiklabaika kum daukbia, bara aiska pali kutbia.

²³ Kuna Jerusalem mapara naha na dahra aisanka kunin sa, wal pramis nani daukan bamna. Kuna naha na saurka daukan dahra sakanka sa, bara kutbi alki maisa pakan.

²⁴ Baku bamna, yang Dawan sna ba, naku wisni: Watawi lâka bara upla ikaia lâka man nani daukisma ba upla kaikisa param pali sa; saurka nani daukankam ra ba pura param sa. Baha man nani ra bal prak mai alkbia.

²⁵ Bara man, Israel kingka, upla âikra saura pali, klalka briaia piua baila pali sa.

²⁶ Yang Dawan sna ba, naku wisni: King kwalka ba mihtam dakbia, king kraunka ba drusbi mihtam wina sâkbia, bara diara sut ba aihka kabia. ¡Il tara ba tâ pali ra ulbia, twi langni ra ba, bara il tâura pali nani ba tasba ra kauhbia!

²⁷ Aiska pali sauhki tikanka tara ra swimna, sauhki tikan, kau sauhki tikanka ra. Kuna naha na takan kabia, baha yang mita daukaia blikuna ba balbia, bara kasak lâka daukbia.

Amón uplika nani ra klala yabisa

²⁸ “Man, upla luhpia, yang nini ra aisas bara wis, yang bîli Amón uplika nani ra, Israel ra lahtuban bîla saki ba, sord ba pat taya wina sakan sa: ikaia ridi sa, klaki wapni daukan, imyula lulkaia bara sauhki tikaia.

²⁹ Yapi kaikanka ba sut ba kunin sa, bara diara takaia dahra aisanka ba kunin sa. Sord ba baha saurakira, upla âikra ba purara kauhbia. Pat ai klalka briaia piua ba baila pali sa.

³⁰ “¡Sord, watlikam ra aimaks! Yang bahara ridi mai dauki bara lâmka daukamna, aisubi takram tasbaya ra,

³¹ yang lawanki ba man puramra blikamni, pauta klauhanka saurakira baku; upla sauhki tatikra saurakira nani mihta ra mai mangkamna.

³² Mai angki, sauhki mai tikbia; tâliam ba kuntri aiska ra laiwbia bara upla kum sin ai kupia kraukbia apia man dukiamra. Yang, Dawan, naku wisni.”