Isikiel 19 - DAWAN BÎLA AISKA

Israel kingka nani dukiara sari taki inanka

¹ “Man, upla luhpia, naha prura lâwanka na, Israel kingka nani ra aiwans:

² ‘Yaptikam ba layan kan layan nani tilara iwi kan. Ai watla witin nani tilara daukan, bahara ai luhpia nani pakan.

³ Kum pali ba bâk saki pakan, tara pali daukan ba kat. Dîa alkuya ba bisbi daukaia tânka brin, bara upla nani ra pi kan.

⁴ Witin dukiara aisi kan ba, nisan nani walan: ai mina ba alkaika ra batakan, bara alingka nani ni raski brih wan Idsip kuntrika ba kat.

⁵ Layan mairin ba, bîla kaikanka bri kan ba aiska pali tiwuya ai dahra walan, bara ai luhpia wainhka wala ba brin, bara tâ baikan baha pakaia.

⁶ Pat layan tara takan ba ra, wih bali kan, layan nani tila wina. Dîa alkuya ba bisbi daukaia tânka brin, bara upla nani ra pi kan.

⁷ King watla nani ra diara sauhki kan, tawan nani ra sin sauhki kan; witin ihbi ba mita, tasba aiska ba tatatwi kan.

⁸ Bara witin mapara buan, lamara tawanka nani ba mapara sin; bara ai iliska nani mangkan, bara mina alkaika ba ra kauhan.

⁹ Alingka ni watla durka ra dingkan bara Babilon king ra brih wan; bahara silak watla ra swin, kli ai ihbanka upla walbia ra dukiara Israel ilka nani ra.

¹⁰ ‘Yaptikam ba wain kiwka ba talika baku kata, lî nani lamara mangkan ba, mâ ailal alki ba bara tara pali sin, lî laikanka yamnika ba ra tingki.

¹¹ Ai tnawa nani ba karna pali takan, king nani kingka baku takan bara tara pali pâwan bamna, kasbrika nani kat uli wan. Bâk sakan tânka taki kan purara pali pâwaia ulan ba mita; baku sin ai tnawa nani tara pali kilwi dihwan bamna.

¹² Kuna kupia baiwan wal daikan bara tasba ra batakan. Lalma payaska ba bui lâkan wainka mâ nani ba sut kauhan; bara tnawa karna nani ba lâwan, bara pauta klauhan ra lulkan.

¹³ Nanara upla iwras tasbaya ra mangkan, tasba lâwan bara diran dauki nani ra.

¹⁴ Tnawa wina pauta klauhan kum takisa, slaunhka urhwi ba ra mâ ba âpu daukisa. Tnawa karna kau âpu sa, king iwaika takaia.’ ” (Naha prura lâwanka sa, bara prura nani dukiara baku kabia.)