Isikiel 16 - DAWAN BÎLA AISKA

Jerusalem kasak lâka luha ba

¹ Dawan bîla yang ra balan, bara ai win:

² “Upla luhpia, Jerusalem uplika nani ra yas kaikbia, yamni kaikaia apia lâka nani daukan ba.

³ Jerusalem ra wis: ‘Dawan ba naku aisisa: Man ya kiamka wina takram ba, man sika aisubi takram ba Kenan ra, aisikam ba amorreo bara yaptikam ba lika hitita.

⁴ Aisubram yua witin nani klûam ba klakras kan, tahbi sin mai sakras, sâl wal sin mai yukras kan, maisam wila sin kwala mai wilkras.

⁵ Upla kumi sin umpira kaikan lâka wal mai kaikras, naha dukia nani mai daukaia sin lukras kan. Aisubram yua, twi ra lulki mai swin, kan saura mai kaiki bara aikaban dauki kan.

⁶ Yang lamak luri, bara mai kaikri minam mai kaikri mai baikan tala tilara kapram, yang lukri aitani sma raya kaia.

⁷ Yang mai daukri man dus kum baku pâwaia. Tara pali pâwram, tara takram bara mairin takram. Tialkam nani ba tranwa takan, bara tâmwa sin pâwan. Sakuna kwala luha kapram.

⁸ ‘Aima wala lamak luri, bara mai kaikri; pat latwan lâka kaikaia piua katma. Yang kwailka ni mai blakatna, bara kwala luha katma ba mai bikri, bara yang pramis takri man ra; man wal lâ daukri, bara man lika yang duki takram. Yang, Dawan, kasak aisisna.

⁹ Tahbi mai sakri, tala bri katma ba klin daukri, bara kîa yamni mai yûkri.

¹⁰ Kwala pranakira mai dingkamna, minam dingkaika painkira sin maikri, linin kwalka maisam wilkaika maikri, bara kwalka yamnikira maman sin maikri.

¹¹ Diara manakira aikuki mai skahki, bangkil nani klamhkla ra mangkri bara namna ra mangkaika sin maikatna.

¹² Kakmam lula maikatna, kiama lula, bara lamla kraunka pranakira ba sin.

¹³ Gul bara silbar ni mai srukan kan; kwalkam nani ba maman dukia kata, mapla sât sât. Brit kau yamni ba pi katma, nasma laya bara oliv batanka laya. Prana pali takatma, kwin kum takatma.

¹⁴ Kulkanka tara pali brisatma nisan sut tilara pramna ba tâka, kan mai skahkanka ba kasak pali kata. Yang, Dawan, kasak aisisna.

¹⁵ ‘Kuna pramna ra baman kasak lukram, bara kulkankam ra luki, yabal mairka takatma; wînam tara ba ya ya bal lui nani ba ra yabi kapram.

¹⁶ Man prâmka nani ni il nani ra idan nani ai pura sunaia tintka watla paskan, bara man baha bilara ur takram.

¹⁷ Gul ni bara silbar ni paskan dukia nani prisant maikatna ba briram, baha ni waitna lilka nani paskram baha nani brih ur takaia lâka daukaia;

¹⁸ kwalkam mapla sât sât ba ni srukatma, bara batana kata ba, bara sîka mâka kîa yamni ba yabatma.

¹⁹ Man ra brit maikri ba plawar kau pain ba ai daukan britka ba, bara batana laya nasma sin yang mai dakakri, bara baha nani ba man bui witin nani ra kîa pain prisantka dauki yaram. Yang, Dawan, kasak aisisna.

²⁰ ‘Bara luhpa mairin kum, bara waitna sin kum man wal brisatna ba briram, bara sakripais daukram aidul nani pata kaia. ¿Man mampara wiria kapram, yabal mairka kaia ba,

²¹ luhpi nani sakripais daukaia yabram, purkara, angki ikan, aidulka nani ba nina tara kulkan kaia dukiara?

²² Man yabal mairka takram bara rayaka yamni apia ba wal âmya tikram, tuktan mairin katma ba; bara kwala luha katma ba, tala ra prawi katma ba.

²³ ‘Naha yang, Dawan ba, naku wisni: ¡Alai kabia man ra! Yamni kaikaia apia dukia daukram sut purkara,

²⁴ Yabal nani lamara utla nani mâkram bahara aidul nani ra pura sunaia bara ur takaia.

²⁵ Yabal tnata bani ra plis nani paski yakabram, bara man pramna ba, yamni kaikaia apia ra lakram, wînam tara ba ya ya bal auya nani sut ra yabisma, baku ur lâka ra iwi kaia.

²⁶ Ur lâka ra iwram, lamara iwi nani aikuki, baha Idsip uplika nani ur lâka lihki nani wal, bara yang kupi baikram man daukankam, ur lâka ra iwi katma tâka mita.

²⁷ ‘Baha ningkara mihti bukri klala maikaia dukiara; yang sip apia mai daukri bara filisteo nani tawanka mihta ra mai mangkri, misbara mai kaiki ba ra ai kupia sin sauhki kan ba daukankam yamni apia dukiara.

²⁸ Kuna naha sut wal, âmyapah apia Siria uplika nani wal ur lâka ra waram; bara kau baha sut wal âmyapah takras.

²⁹ Bara ban dauki kapram, Babilon nani wal ur lâka ra waram, diara âiatkra nani tasbaya ra; bara baha sut wal sin âmyapah takras katma.

³⁰ Yang, Dawan ba, naku wisni: ¡Dîa sikniska kupiam ba bri kan, ur lâka, diara yamni kaikaia apia dukia ban daukram kaia!

³¹ Yabal tnata bani ra, plis bani ra paskram altar nani, aidul ra mayunaia bara ur lâka daukram. Kuna man ur mairka baku apia kapram; ¡man mamna kulkras katma!

³² ‘Ani mairka ai maya wal kasak apia ba, ai maya waitna nakra prakisa.

³³ Ur mairin nani ra mana kum aibapisa; sakuna man lika latwan kaikisma ba sut ra prisantka yabi mana sin aibapisma, bara baku ani ani wina sut balbia ba ra man wal saura daukaia.

³⁴ Urkam lâka ra mairin wala dauki nani ba wal, man sât wala daukram: upla mai plikras saurka daukaia, witin nani sin mamna aibapras, kuna man mita aibapisma. ¡Bahara baman man ba sât wala sma!

³⁵ ‘Bamna, man rug mairin, yang aisinki na wals:

³⁶ Yang, Dawan, mai wisna: Man swira lâka luha, kwala âpu takram wînam tara ba liliam nani wal ur lâka daukaia wisi, bara baku aidulka nani yamni kaikras nani sut wal, luhpiam nani tâlia sakripais natka ra laikram.

³⁷ Baha mita, yang lilam nani sut asla daukamna, kupia lâka daukram ba, latwan kaikram nani sut ba bara misbara kaikram nani sut ba; man lamam kir asla kukamni, bara witin nani mawanra, kwala luha mai sakamna, bara baku susu mai kaikbia.

³⁸ Marit lâka sauhkram bara upla ikram dukiara lâmka daukamna, bara kupi sauhkan tara bara lawan tara wal pruaia lâka ra mai lakamna.

³⁹ Witin nani mihta ra mai swimna, ur takisma pliska nani ba aidul ra mayunisma pliska nani ba sut sin sauhki tikan kaia. Kwalkam ba daikbia bara aiskahkaia dukia nani brisma ba sin, bara susu pali mai swibia.

⁴⁰ Tawan ba man mampara yaka bubia, walpa ni mai sabia bara ai sordka nani wal mai ikbia.

⁴¹ Wamtla nani ba pauta ni angkbia bara mairin ailal mawanra lâmka daukan kabia. Urkam lâka ba tnata mangkamna, bara kau lilam nani mana aibapma apia.

⁴² Bara man mampara kupi baiwanka ba, âiyapah brimna; bara lawanki lamni takbia, lamni takamni bara kau kupi baiwi kamna apia.

⁴³ Man âmya tikram tiara katma ba, bara kasak kupi sauhkram daukankam nani saura ba ni, yamni kaikras sna ba wal; baku bamna, klala maikamna baha daukankam ba tâwan. Yang, Dawan, kasak aisisna.

Dîa yapti ba, lupia mairin baku sa

⁴⁴ ‘Pâmnika nani sut sins lâka bîla aisi nani man dukiamra wibia: Dîa yaptika ba, luhpia mairin baku sa.

⁴⁵ Man ba mairin kum ai maya ra ai luhpia nani ra misbara kaiki kan ba luhpia, bara muihkam nani sin ai maya ra ai luhpia nani ra misbara kaiki banhwi kan ba. Man nani sut yaptikam ba hitita kan bara aisikam ba lika amorreo kata.

⁴⁶ Yahbra tani ra muihkam almuk iwi kan, Sameria tasbaya ra, bara ai tawan sirpi nani wal; bara waupasa tani ra muihkam sirpi, Sodoma tawanka ra, baha sin ai tawanka sirpi nani wal.

⁴⁷ Witin nani nina bliki, dîa daukan saurka kata ba daukram; âmyapah apia, man daukankam ba kau saura kan, witin nani daukanka wal.

⁴⁸ Yang, Dawan ba, swer takisna rayaki ba ni: muihkam Sodoma bara ai tawanka sirpi nani sin daukras sa, man bara tawankam sirpi nani aikuki daukram ba.

⁴⁹ Muihkam Sodoma saurka ba naha sa: witin bara ai tawanka sirpi nani wal manis pali kwalhwi kata plun manis bri ba dukiara, bara witin baman sip sa baku luki ba dukiara, kuna umpira nani ra tâ baikras kan, baku sin diara luha nani ra.

⁵⁰ Ai kwalhwanka tara wal diara nani daukan yamni kaikras sna dukia. Baha mita sauhkri, man damra walisma baku.

⁵¹ Sameria ba, man saura daukram ba, bakriki sin daukras kan; man ba diara kau saura nani daukram, witin nani wal; man wal prakuya ba ra, pâtkas baku sa.

⁵² Man swiram daukan lâka ra bapi buaia kama, kan muihkam nani purkara kau saura daukram bamna; pâtkas talia daukram; baha swirka lâka, bara swira daukan lâka ra bapi buaia kama, kan muihkam nani ra pâtkas talia daukram.

⁵³ ‘Yang Sodoma ra bara Sameria ra yamnika lâka ba kli laki yabamna, ai tawanka sirpi sut ra, bara man ra sin pâwaia lâka ba maikamna.

⁵⁴ Kuna ban swira daukaia lâka ra bapi buaia kama, bara swiram takaia daukram ba dukiara; baha wal witin nani maisa nihkra kama.

⁵⁵ Sodoma, Sameria bara ai tawanka sirpi nani ba blasi ra kata baku kabia, bara man sin tawankam sirpi aikuki baku kama.

⁵⁶ Muihkam Sodoma ra klala yabri bara lawaska kikatma, man ba tara damra wali katma piua ra,

⁵⁷ baha piua saurkam ba kau param takras kata; sakuna nanara filisteo bara Edom tawanka nani, lamara tawanka nani sut ba saura mai wisa; ¡tasba aiska bahki mai kulkisa!

⁵⁸ Nanara saura daukram tâwan, klala maikuya ba bapi buaia kama. Yang, Dawan, kasak aisisna.

⁵⁹ ‘Yang Dawan sna ba, naku wisna: Maikaia ba maikamna, kan man pramiskam kat daukras kapram, bara wal lâ daukan alki daukras kapram.

⁶⁰ Kuna yang lika kupi kraukamna, man wal lâ daukri ba, tiara katma piua ra; bara lâ raya ban kaia daukamni man wal.

⁶¹ Yang muihkam almuk ra ai luhpia mairin nani baku mai swimna bara muihkam sirpi ra, lâ daukan ba taibi ai munras naha na daukaia kuna, man kupiam kraukma natkam almuk kata, bara swiram takma.

⁶² Yang kli lâ raya man wal daukamna, bara damra walma yang sika Dawan sna ba.

⁶³ Man kupiam kraukma, bara swiram lâka tara pali damra walma; bara bawan lâka sin baku man kli bîlam kwâkma apia; yang saurkam swih tikamna, diara nani daukram ba sut wina. Yang, Dawan, kasak aisisna.’ ”