Isikiel 13 - DAWAN BÎLA AISKA

Dawan bui prapit kuninkira nani ba pât ra dingkisa

¹ Dawan bîla yang ra balan bara ai win:

² “Israel prapitka nani klauna ai kupia wina man smalki nani ba ra wis: ‘Wals Dawan bîla ba.

³ Naku win Dawan Gâd ba: ¡Alai, prapit taniskira nani, klauna ai spiritka nina baman bliki ba, bara diara kumi sin kasak kaikras ba!

⁴ Israel, man nani prapitkam nani brisma ba, sikiski nani tawan slingban tilara iwi ba baku sa.

⁵ Israel kaina kahbaia dukia diara kumi sin daukras, Dawan yua balbia bara witin nani aiklabi bapi bûi kaia dukia.

⁶ Witin nani diara kaiki ba kunin baman, dahra aisi ba sin kunin. Witin nani wisa Dawan aisi ba yang nani aisisna, sakuna yang, witin nani ba blikras. ¡Baku ban witin nani dîa aisin ba baku takbia bîla kaikisa!

⁷ ¡Man nani lilka kaiki aisisma ba kunin baman! ¡Dahra aisisma ba sin kunin! Man nani wisma yang wina wali dahra aisisma. Sakuna yang diara kumi sin aisaras.

⁸ Baha mita, yang Dawan sna ba, naku wisni: Man nani mita wisma kunin bara diara tânka kaiki nani ba sin kunin sa, yang lika man nani mampara sna. Yang, Dawan, kasak aisisna.

⁹ Yang mihti ba bukamna klala yabaia, prapit nani diara bahki nani kaiki bara kunin man smalki nani mapara; tawanki asla takanka ra âpu kabia; nina sin ulban kabia apia, Israel watla uplika wauhtaika ra, Israel tasbaya ra sin tawbia apia. Bara damra walma yang sika Dawan sna ba.’

¹⁰ “Âu, witin nani upliki ra kunin munan, diara sut ba pain auya sa win; bara kasakka ba lika baku apia kan, sim upla kum kutbanka kum bukaia kuna kasak wal apia, bara ningkara kal wal paski ba baku sa.

¹¹ Wis kal wal pihni yuki nani ra, baha kauhbia; lî karna prari baku auhbia, bara lî klaswan yuyaka walpa baku yabrika auhbia, bara pâsa karnakira sin balbia.

¹² Bara kutbanka ba kauhbia bara man nani ra mamkabi walbia: ‘¿Kal ni paskata ba dîa takan?’

¹³ Baha mita, yang Dawan sna ba, aisisni: Kupi aisawanka ba pâsa karna prari baku blikamni; kupi baiwanka ba lî wal kau purkara yarka auhbia, bara lî klaswan yuyaka walpa baku yakabamna, kupi sauhkanka ba wal sauhki tikaia dukiara.

¹⁴ Bara baha kutbanka man nani mita pihni daukram ba batakamna; tasba kat yakabamna, bara playka tara nani ba param sakan kabia. Âu, tnaya kutbanka ba mâyara bal iwbia, bara baha kriwanka nani tilara man nani pruma. Bamna yang Dawan sna ba man nani bâra kaikma.

¹⁵ Yang kupi baiwanka aiska, baha kutbanka bara kutbanka pihni daukan nani ba pura laikamna; bara upla nani aisabia: ‘Kutbanka ba âpu sa, bara yuki pihni daukan nani ba sin.

¹⁶ Israel prapitka nani Jerusalem dukiara kunin smalki nani ba, bara diara tânka kaiki nani ba kupia kumi lâka ra aisi kan, sakuna kasak pali ba lika baku apia kan.’ Yang, Dawan, kasak aisisna.

Dawan ba prapit mairin kuninkira nani ra pât ra lakisa

¹⁷ “Nanara man, upla luhpia, tawi kaiks tawankam luhpia mairin nani ra, witin nani ba yang nini ra aisisa ai lâka kat.

¹⁸ Witin nani ra wis: ‘Naha Dawan aisisa: ¡Alai kabia man nani mampara, upla watla ra pliki tauki banhwisma ba; kunin munaia mihta wilkaika kwalka nani sipi ba, bara tasba aiska uplika nani baha bangkil ba ai mihta ra mangkisa, bara lal pura bikaika kwala sipi ba bara upla sut ai lal ra mangkisa! ¿Man nani lukisma ki upliki nani rayaka ba, prubia ba baha karnika ba alki briaia brin mai dauki ba natka kat?

¹⁹ Man nani, barli mâ mihtam banhki bri bara brit pîs ba wal, upliki nani mawanra swiri paskisma; upla nani pruaia apia kata ba ikisma, bara raya kaia apia pruaia kata ba baha lika swiram raya sa. Baku upliki nani ra kunin munisma, kunin lâka ra kasak luki nani ba.

²⁰ Baha mita, yang Dawan sna ba, aisisni: Yang wilkaika aihkakira man nani daukisma ba, param waihli takisna, baha wal sika upla ra alkisma daiwan piawira ra baku. Yang pri sakamna, man nani karnikam wina baha uplika nani ra; bara yarka pri lâka ra pâlbia.

²¹ Pri sakamni upliki nani ra, man nani karnikam wina bara lamla bikaika mai mangkan ba wina, bara kli lika alkma apia. Bahara man nani damra walma yang sika Dawan sna ba.

²² Man nani, kuninkam lâka ni, upla yamni nani ba sasibrira daukram, yang baha daukaia lukras katna ba, bara kli tawan taim watawikira nani ra tâ baikisma ai daukanka saura nani ba ban dauki kaia. Baku yang bui witin nani ra rayaka yabamna apia dukiara.

²³ Baha mita man nani kli diara lilka kunin kaikaia tânka kaikma apia, dahra kunin aisaia tânka sin brima apia. Yang upliki nani ba swaki sakamna man nani karnikam wina, bara damra walma yang sika Dawan sna ba.’ ”