Isikiel 12 - DAWAN BÎLA AISKA

Isikiel maisa pakisa brih wan nani ra

¹ Dawan bîla ba yang ra balan, bara ai win:

² “Upla luhpia, man upla mapara babura tilara iwisma; baha nani ai nakra nani brisa kaikaia kuna kaikras, bara ai kiama bri banhwisa walaia kuna walras, kan mapara babura uplika sa bamna.

³ Baha mita man dukiamra dîa briaia sma ba kat ridi dauks tasba wala ra auma baku kakna upla sut mai kaiki kaka, wamtla wina taki plis wala ra was; ban kra witin nani baha tânka bribia mapara babura uplika nani ba.

⁴ Baku upla sut mai kaiki kaka kakna dukiam nani ba sâkma bara mai kangban tasba wala ra auma baku; bara tutni piua ra sin upla mai kaiki kaka taki was tasba wala ra auma baku.

⁵ Tawan kutbanka ra unta kum daukma upla sut kaiki kaka, bara bahak dukiam nani ba brih taki wama.

⁶ Bara tihmia iwbia bara sin, dukiam nani ba pamhpaya ra suns bara mamwan praki upla sut mai kaiki kaka brih taki was. Tânka lika man ani kuntrika ra auma sapa kaikras. Yang brinki sa man ba bin dauki kaia tukinka kum kama Israel luhpia nani ba mapara.”

⁷ Yang duki nani ridi daukri, nahki Dawan mita adar aikan ba kat; bara witin wal taki wari kakna yu klir ra, sim upla kum alba lâka ra auya baku. Tutni tawan taim, kutbanka bara unta kum daukri yang mihti ni; tihmia iwan ba ra, upla sut nakra ra diara nani ba paihpaya ra suni brih, baha bâk taki wari.

⁸ Yapra wala titan ra, Dawan bîla ba yang ra balan bara yang ra ai win:

⁹ “Ban lukisna Israel luhpia nani ba, baha tawanka mapara babura, ban kra mamkabi walbia dîa dauki kapram.

¹⁰ Bamna wis, yang maipara naha na Jerusalem kingka maisa pakanka sa, bara Israel luhpia nani sut iwi nani dukiara.

¹¹ Wis man ba witin nani mapara maisa pakaia tukinka kum sma, bara daukaia kabia dîa man nani daukram ba baku, kan alba lâka ra brih wan kabia.

¹² Wihta witin nani bri ba ai dukia nani ba ai pahpaya ra suni, tihmia tilara ai uplika nani aikuki, tawan kutbanka ra unta kum witin nani mita dauki bahak ai mawan praki taki wabia, upla kumi sin kaikbia apia, witin sin kaikbia apia ani kuntrika ra auya sapa.

¹³ Yang iliski ba witin purara wauhi baha wal alkamni. Babilon ra brih wamni Caldea uplika nani tasbaya ra, tasba kum witin sip kaikras kabia, bara bahara witin prubia.

¹⁴ Bara yakabi lakamna tasba mapa walhwal ra, suldiar nani wan kutbi kir wan kaina kahbi ba sin, war aiklaklabra kwâra tara wala ba baku, bara nina bliki yakabamni mihti ra sord kum wal.

¹⁵ Bara pat yakabi lakan kabia piua ra, kuntri wala bara nisan wala mita ai dahra walbia, yang sika Dawan sna ba.

¹⁶ Sakuna yabrika upla kum kum war wina swakwi takbia, plun wahwan, bara siknis nani wina. Ani nisanka ra wabia sut ra, witnis aisabia yamni apia diara nani daukan ba dukiara, baku ai dahra walbia yang sika Dawan sna ba.”

Maisa pakisa kli pât aula ba dukiara

¹⁷ Kau aima kum Dawan bîla yang ra balan bara ai win:

¹⁸ “Upla luhpia, plun piaia ra tatatwisma sibrin mita, bara sari lâka mariks diaia ra.

¹⁹ Bara kuntri uplika nani ra wis Jerusalem, bara Israel luhpia nani sut: ‘Naha wisa Dawan ba: Sarikira ni patam pih banhma bara sibrinkira ni, diaia laya ba dima. Kuntri ba sauhkan pali kabia bara bîla man kabia; bahara iwi nani saurka tâka ba mita.

²⁰ Upla iwi tawanka ba sut sauhki tikan kabia; kuntri ba upla iwras tasbaya takbia. Bara damra walma yang sika Dawan sna ba.’ ”

²¹ Dawan bîla yang ra balan, bara ai win:

²² “¿Dîa wiaia want sa, Israel luhpia nani naha tânka wal: ‘Yua nani luisa, prapit nani lilka kaiki sip alki daukras ba’?

²³ Baku bamna wis: ‘Dawan ba naku wisa: Naha sinska bîla na tikamna, bara kau Israel tilara aisan kabia apia.’ Baku sin wis pat lamara pali sa, baha yua nani, diara takaia tânka kaikan nani sut ba.

²⁴ Kli bâra kabia apia Israel luhpia nani tilara, lilka kaikan lâka bara kunin lâka ra Gâd dahra aisaia ba.

²⁵ Kan yang, Dawan ba, aisaisna bara dîa aisamna ba bîli ba bal aimakbia; kau takaskan kabia apia. Man nani mita kaikma, mapara babura uplika nani; yang aisamni bara yabrika dîa aisamna ba kat aimakbia. Yang, Dawan ba, mai aisisna.”

²⁶ Dawan bîla ba yang ra balan bara ai win:

²⁷ “Israel watla uplika nani aisi taukisa, diara tânka nani nâra kaiki ba sika piua wihka dukiara sa, piua wihka dahra aisi smalkisa.

²⁸ Baku bamna wis: ‘Naku wisa Dawan ba: Yang bîli nani ba kumi kau takaskan kabia apia; yang dîa aisari ba sut aimakan kabia. Yang, Dawan ba, mai aisisna.’ ”