Isikiel 10 - DAWAN BÎLA AISKA

Dawan prana bui tempel ba swisa

¹ Tisku kan kaikri, kasbrika pura sangnika tara ba purara rayaka bri nani tnawa nani bri ba lal ba purara, diara lilka bal takan, king iwaika kum sapair ni paskan baku kata.

² Bara waitnika linin kwalka prâka dimi kan ba ra aisan, bara win: “Wagin wilwaika nani untika ba ra dims, rayaka bri nani ba tnawa munhtara, masku aswan nani yukukan bâra ba wina mihtam kum bris baha ai rayaka bri tnawa nani ba lilapas wina, bara tawan ba purara yakas.” Bara kaikri nahki waitna ba diman kan.

³ Baha piua ra rayaka bri ai tnawa bri nani lilka ba tempel waupasa tani ba ra kan, bara kutbanka lilapas ba kasbrika ni banhwan kan.

⁴ Bara Dawan prana ba, kirubin lilka nani ba lal wina ingnika ba purara ulan bara tempel dimaia ba tani ra wan; bara kasbrika pura nani ni tempel ba banhwan, bara watla kutbanka ba Dawan prana ingnika ni aibanhwan kan.

⁵ Baha rayaka bri nani tnawa binka ba, baha kutbanka lila ba kat wali kata, Gâd, karnika sut bri ba aisi ba binka baku kan.

⁶ Baku bamna, waitnika linin kwalka dimi ba ra adar yaban: “Pauta ba bris wilwaika tilara ba wina, baha kirubin lilka tila ba wina.” Bara witin diman bara wilwaika lama kat buan.

^7-8 Kirubin nani lilka tnawa mununhtara waitna mihta kum baku kaikata. Witin nani wina kum ai mihta sakban, pauta klauhan lilapas ra kan ba ra, baha wina brin bara baha linin kwalka dimi kan ba mihta ra mangkan, baha ba brisata bara mahka wan.

⁹ Bara kaikri, wilwaia dukia walhwal bâra kata, kirubin nani ba lamara, kirubin kumi bani lamara wilwi tawi ba kum bâra kan; lipi kan krisulait ni paskan baku kata.

¹⁰ Wilwaika walhwal ba kumi baku kan, bara sut ba kumi wala bilara dingkan baku kan.

¹¹ Rayaka bri nani lilka ra paskan ba ai mawan tani walhwal ra impaki ba ra, kli tawi balras kata, sakuna ai kainara auya ba yabalka bâk impaki waia kan.

¹² Bara ai wîna aiska ba, mihta, tnawa, bara wilwaia dukia ba sut, nakra pali man lipi kata, wilwaia dukia walhwal sut ra baku kan.

¹³ Wilwaika ba ra wini kan wali kapri bara win “wilwaika”.

¹⁴ Bara kumi bani ba mawan walhwal bri kan: tâ pali ra ba bîp wainhka mawan bri kan; wala ba upla mawan; yumhpika ba layan mawan; walhwalka ba yakal mawan.

¹⁵ Naha kirubin nani lilka ba sim sika yang Quebar awalka ra asla kan kaikatna. Kirubin lilka nani ba buan,

¹⁶ witin nani ai kanra auya ba ra, wilwaika nani ba witin nani aikuki ai kanra wan; bara rayaka bri nani ba ai tnawa nani ba buki luya bara wilwaika ba sin witin nani wina dakwi takras kan;

¹⁷ witin nani takaskuya bara wilwaika nani ba sin takaski kan, bara witin nani pâlaia buya bara wilwaika nani ba sin buan, kan wilwaika nani ba sin witin raya pîska kan bamna.

¹⁸ Bara baku Dawan prana ba, tempel banhta wina pura tani ra uli kata, bara kirubin lilka nani ba purara aimakata.

¹⁹ Naha nani ba ai tnawa nani ridi daukan ba ra, tasba wina buan; yang kaikri nahki buan ba, ai wilwaika nani tnaya ra, bara nahki sin takaskan ba, Dawan tempelka durka lalma tani ra ba ra. Baku ba ra Israel Gâdka prana ba, witin nani ai purara kan.

²⁰ Baha ai rayaka bri ai tnawa nani sin bri ba lilka ba sika yang kaikatna ba Israel Gâdka mununhtara, Quebar awala lamara.

²¹ Kumi bani mawan walhwal bri kata, kumi bani tnawa walhwal, bara tnawa mununhtara, upla mihta talika bri kata.

²² Bara mawan nani ba baha ai rayaka bri ai tnawa nani sin bri ba talia kan, Quebar awala un ra yang kaikri ba. Kumi bani ba ai kaina kat wapi kan.