Impakan Sturka 24 - DAWAN BÎLA AISKA

Wal lâ daukan tukinka bapanka ba

¹ Dawan bui Moses ra win: —Eran, Nadab bara Abihú, man nani aikuki Israel luhpia nani 70 sin nâra sna pliska na kat bal uls. Sakuna itwi baku ra takasks, bara sut lulam kriks baha kat.

² Man baman sip kama yang laimara balaia; wala nani ba lika apia, baku sin upla nani man wal bal ulaia ba sin apia.

³ Moses kli tawi wan bara upla nani ra wih diara nani sut witin daukaia Dawan mita win yaba aisi win. Bara upla nani sut ai bîla baikra kumi ni pana aisin: —¡Diara sut Dawan aisin ba, yang nani daukamna!

⁴ Bamna Moses diara sut ulban Dawan mita witin ra wisata ba, bara yu wala titan pali ra buan, altar kum paskan il ba mâyara; bara walpa nani 12 ba ra bri sal swin, Israel kiamka kumi bani dukiara walpa kum.

⁵ Ningkara wahma nani tila wina kum blikan wan, bîp wainhka nani ikaia, bara baha ba angki, Dawan ra sakripais dauki yaia, wal kli ai uplika taki sakripaiska tânka.

⁶ Bara Moses daiwan tâlia ba kâp tara nani kum ra laikan, bara tala kau ailal kan ba lika brih, altar purara srikban.

⁷ Ningkara wal lâ daukan wauhkataya ba brin, bara upla nani ra aisi kaiki yaban, bara witin nani sut naku win: —Dawan win ba sut aiska daukaia mata, yang nani lukanki aiska bahara kat mangki brimni.

⁸ Bara Moses tala ba brin bara upla nani purara srikbi bara win: —Naha tâlia na sika man nani wal Dawan lâ daukan ba tukinka sa, bîla bani aisin ba sut dukiara sa.

⁹ Moses ba Eran, Nadab, Abihú bara Israel almukka nani 70 aikuki il ra uli wan.

¹⁰ Bahara witin nani Israel Gâdka ba kaikan, bara ai mina tani ra diara ingni kum bûi kan, sapair walpaya ni paski palkan baku kan, bara ingni kan kasbrika ingnika baku.

¹¹ Gâd lika Israel tâ uplika nani ra saura munras kan, witin nani bui Gâd kaikan, bara aikuki plun pin, diara sin din.

Moses Sainai ilka ra

¹² Dawan mita Moses ra win: —Il ra uli bal, yang nâra sna na kat, bara bîli kaiki bas, yang bui man ra walpa tanhta wâl maikaisna, bahara lâ nani ba ulbi maikamna, Israel luhpia nani ra smalkaia dukiara.

¹³ Moses buan bara Jasua sin ai hilpika ba, bara witin wal Gâd ilka ra uli wan.

¹⁴ Almuk nani ra naku win: —Naha kat bîli kaiki bas, yang nani kli tawi balamna kat. Bamna Eran bara Hur sin man nani wal nâra kabia, bara upla kum kra trabil bri kaka, witin nani ra aisas.

¹⁵ Baha aisin ningkara Moses lika il ra uli wan, bara kasbrika mita bikan.

¹⁶ Dawan prana ba Sainai ilka pura kat bal iwi takaskan, bara 6 yua ba kasbrika mita il ba pura biki bri kan. Bara 7 yua ba kat Dawan mita Moses ra winan kasbrika tila ba wina.

¹⁷ Bara il banhta pali ba kat Dawan prana ba, Israel luhpia nani nakra ra latan takan, pauta lakni diara sauhki tatikra buki klauhi ba baku.

¹⁸ Moses kasbrika tila bâk dimi, il ra uli wan, bara witin bahara takaskan kakna yawanaiska wâl bara tihmia yawanaiska wâl sin.