Impakan Sturka 1 - DAWAN BÎLA AISKA

Idsip ra Israel luhpia nani pât wahwan ba

¹ Naha nani sika Israel luhpia nani Jekob wal Idsip ra wan ba. Bara kumi bani ai watla bîla uplika nani aikuki ai nina nani ba:

² Ruben, Simian, Libai, Juda,

³ Isacar, Zabulón, Benjamín,

⁴ Dan, Neftalí, Gad, bara Aser.

⁵ Jekob kiamka nani ba sut asla prakan bara upla nani 70 kata. Josep lika pat Idsip ra kan.

⁶ Josep ai muihni nani bara baha piua ra uplika nani kan ba, sut prui tiwan.

⁷ Sakuna Israel luhpia nani ba, luhpa nani ailal brin bamna, sahwi ailal taki bara karnakira sin takan. Tasbaya ba witin nani ni banhwan.

⁸ Sakuna kau naika piua ra Idsip tasbaya ra king raya kum aimakan. Witin Josep wal kakaira apia, ai tânka sin briras aihwa. Nanara witin ai uplika nani ra naku wisa:

⁹ “Man nani kaikisma Israel luhpia nani ba kau ailal sa, bamna kau karnakira sa yawan wan uplika nani ba wal.

¹⁰ Bamna yawan nani diara kum daukaia sa, witin nani ba takaskaia, swika kau ailal takaia apia. Baha apia kaka, war piua ra witin nani wan waihla nani wal asla taki, wan mapara aiklabia, bara sip sa swak taki wabia wan tasbaya wina.”

¹¹ Nanara Idsip uplika nani ba, wark nani pura kakaira mangkan, Israel luhpia nani ra yaka wark karna taki kaia dukiara. Witin nani ra munan tawan wâl paskan: Pitón bara Ramsés. Naha tawanka wâl na sika plun mâ nani apahki suni briaika pliska bri kan ba king fero mita mâkan ba, witin lika Idsip kingka ba.

¹² Ban sakuna, Israel luhpia nani ra kau saura muni, kau ni ailal taki kan. Bamna Idsip uplika nani ba, witin nani ra sibri bri kan.

^13-14 Bamna Israel luhpia nani ra saura pali muni, alba lâka ra bri kan. Witin nani ai rayaka ra sari lâka, latwan, pât saura nani yabi kan. Witin nani ai nasla nani ra bri si wark karna pali yan dauki kan. Yan tasba baiki, drapapa nani wauhi blok nani dauki bara yan ai watla nani mâki kan. Umpira kaikan lâka âpu, rausauhki kan.

¹⁵ Baha purkara, Idsip kingka ba Sifrá bara Púa ra aisin. Naha mairin nani wâl na sika grandi mairin nani kata, Hibru nani tilara. Witin nani ra naku win:

¹⁶ —Ani piua ra Hibru mairka nani tuktan sakisa taim, man nani warkka daukisma piua ra, tuktan ba aisubia ba ra kaiks waitna sapa. Waitna kaka, iks, sakuna mairin sa kaka, swis raya kabia.

¹⁷ Sakuna grandi mairin nani ba Gâd ra sibrin luki uplika nani kata, bamna dîa king bui witin nani ra win ba kat daukras, tuktan waitna nani ba sin ban swin raya kan.

¹⁸ Bamna king naha ba nu takan ba ra, grandi mairin nani ba mata blikan bri balan. Bara witin nani ra makabi wali win: —¿Man nani dîa muni naku daukisma? ¿Dîa kan tuktan waitna nani ba ikras?

¹⁹ Bara mairin nani ba mita pana king fero ra naku win: —Hibru mairka nani ba sika Idsip mairka nani baku apia sa. Witin nani isi pali luhpa baikisa. Yang nani auna piua ra, pat ai luhpia baikan sa.

^20-21 Naha grandi mairin nani ba, Gâd sibrinka bri kan bamna, Gâd mita sin witin nani ra ai yamnika yaban, witin nani ai luhpia kau ailal sahwi kan. Bara Israel luhpia nani ba piu bani kau ailal taki kan, kau sin karnakira taki kan.

²² Nanara king fero lâ kum daukan ai tasbaya aiska ra, bara naku win: “Hibru luhpia waitna nani nan aisubi takan nani ba sut, Nilo awalka ra lulki banhs, sakuna mairin nani ba lika swirka raya kaia sa.”