Hageo 2 - DAWAN BÎLA AISKA

¹ Kati matlalkahbi pura kum, bara yua yawanaiska pura kumi aimakan ra, Dawan ai prapitka Hageo ra kli aisin,

² bara witin ra win nanara Zorobabel ra, Jasua ra, bara tawan uplika nani sut ra wibia:

³ “Tempel almuk pranakira pali mâkan kan kaikan uplika nani ba, nanara yawan raya bri na nahki kaiki ba wan wibia. ¿Almuk ba wal praki kaiki ba ra, naha raya na prana lika bahki sa apia?

⁴ ¡Zorobabel, waitna bas! ¡Jasua prîs nani wihtka sma ba, waitna bas! Juda uplika man nani sut sin lukankam karna bris. ¡Wark taks, kan yang lika man nani wal sna! Karnika sut brisna Dawanka, yang aisisni.

⁵ Man nani si bripara, Idsip wina takram pramis mai munri ba baku, yang spiritki man wal ban sa.

⁶ Pat pali yang kasbrika pura ba, kabu, tasba sut nikbamna.

⁷ Nisan nani sut ba nikbamni, witin nani ai dukia kukan nani brih balbia, bara tempelka ba prana banhki daukbia.” Karnika sut alki bri Dawanka ba, kasak aisisa:

⁸ “Silbar bara gul ba sut yang duki sa.

⁹ Tempel raya na kau pranakira kabia, almuk kata ba wal. Bara naha tasbaya ra kupia kumi lâka briaia daukamni. Karnika sut brisna Dawanka, yang kasak aisisna.”

Dawan mita upla kasak apia nani ra lawi daukisa

¹⁰ Kati matlalkahbi pura yumhpa bara yua 24 aimakan ra, baha manka ra Darío king aimaki kan ba ra, Dawan ai prapitka Hageo ra aisi,

¹¹ adar yan, karnika sut alki Dawanka ba nina ra, prîs nani ra lâ yan ba tânka kat makabi walanka nani walaia:

¹² “Naku wibia kaka, wîna sakripais dauki pat yamni munan ba, upla kum ai prâka ra yukuki brih auya kaka, bara prâka mahta ba brit ra, wain ra, batana laya bara plun wala nani sut ra kangbia ba ra, ¿baha mita pata nani ba yamni munan sa ki?” Bara prîs nani ba bîla apia win.

¹³ Bara Hageo kau ban makabi wali kan: “Upla kum, upla pruan ra kangban tâski kulkan ba, witin wih baha pata nani ra sin kangbi ba, ¿baha pata nani ba tâski daukan kabia ki?” Bara prîs nani pana âu win.

¹⁴ Bara Hageo bui witin nani ra win: “Dawan kasak aisisa: ‘Naha uplika nani sin baku daukisa, witin nani diara sut dauki ba, aiki ba tâski baman sa.

¹⁵ Nanara wina kainamra naha diara luki bas tempelka kau mâkras sma ba ra,

¹⁶ ¿man nani ra dîa taki kata? Upla kum rais nasla tara ra 20 bîk dâkaia wan, sakuna bîk matawalsip baman brih balan; bara wala kum wain taibi bara 50 bukit brih balaia wan, sakuna 20 buki baman brih balan.

¹⁷ Namsla ra pata mâ nani purara ba sikniska, lî kauhla klaswi auhi ba ni sauhkri, sakuna man nani bui yang ai plikras. Yang, Dawan, kasak aisisna.

¹⁸ Naiwa yua 24, kati matlalkahbi pura yumhpa ra, tempelka watla raya ba bapram yua sika.

¹⁹ Aitani, sakuna naiwa yua wina man nani kaiki bas, plun mâ auhbaika ra kli plun âpu kabia apia. Wain kiwka ba kau ai mâ sakras sa sakuna, kwah damni dusa sin apia; drap tara sin apia, oliv dusa sin kau pawras sa; sakuna naiwa yua wina yamniki man nani wal ban kabia.’ ”

Dawan bui Zorobabel ra pramis takisa

²⁰ Baha pali yua Dawan kli Hageo ra aisin,

²¹ witin Juda wihtka tara Zorobabel ra wiaia: “Yang kasbrika pura bara tasba ba sin nikbamni;

²² tasba kingka lâka karnika nani iwaika ba sauhki mâyara batakamni; witin nani war waginka nani ra uli ba makupamna, araska nani bara âiulrika nani ba sut sin prubia, kumi bani ai muihni sordka ra.

²³ Duki dadaukra Zorobabel, baha yua ra yang mihtidingka, sîl mangkaika ba baku main mai kaikamni, kan yang bâk mai saki mai briri bamna. Yang, Dawan karnika sut brisna ba, kasak aisisna.”