Galesha 4 - DAWAN BÎLA AISKA

¹ Bamna yang aisin ai dauki ba lika naha sa: Luhpia waitna kum ai aisika dukia nani briaia ba, kau tukta sirpi ba ra, witin ba ai watla uplika tila wina alba kum baku sa, diara nani sut dawanka sa sakuna.

² Bamna upla tila nani bâra sa witin ra main kaikaia bara ai bisniska nani daukaia, aisika mita piua marikbia ba kat.

³ Yawan wan mapa ra sin baku sa: kau tuktan kata ba piua ra, baku wibia, yawan bâra kata naha tasba ra pura aimaki karnika nani bâra kan ba mina ra kan.

⁴ Sakuna piua ba aimakan ba ra, Gâd ai Luhpia ba blikan, witin ba mairin kum wina aisubi takan, Moses lâka mununhtara.

⁵ Baku Kraist balan, yawan baha lâka mununhtara kan ba wina pri wan sakaia, bara Gâd mita ai luhpia nani baku wan bribia dukiara.

⁶ Bamna, yawan nani na ai luhpia nani sapa tânka wan marikaia, Gâd ai Luhpia Spiritka ba wan kupia kat blikan; bara baha Spiritka Holikira wan kupia nani ra winisa: “¡Yang Aisiki!”

⁷ Baha mita, man lika, kli alba apia, sakuna Gâd luhpia sma; bara Gâd luhpia sma bamna, Gâd kupia lâka sa man sin ai dukia nani ba dawanka kama.

Pal ba kristian nani dukiara ai kupia ra trabil brisa

⁸ Kaina piua ra, Gâd kakaira apia katma ba ra, man nani lika gâd apia nani albika nani katma.

⁹ Sakuna nanara Gâd kakaira takram na ra, apia kaka kau param wiaia, Gâd sin man nani mai kakaira takan na ra, ¿nahki baha karnika swapni bara umpira nani kata ba ra kli tawi alkma, baha nani albika kli takaia wisi?

¹⁰ Man nani lika kau naiwa kat tila yua nani, kati nani, piua nani bara mani nani sin kulkisma.

¹¹ Yang uya si brisna, kan man nani tilamra wark takri ba bahki pali sa lukisna.

¹² Muihki nani, mamkabisni yang baku taks, kan yang lika man nani baku takri. Man nani mita rausauhkram baku lika apia.

¹³ Pat kaiki banhwisma, tâ pali piua ra swaki sakan lâka man nani ra mai smalkri ba, yang baku daukri wîni tara ra siknis kum mita rau ai sauhki kan ba mita.

¹⁴ Baha sikniska ba man nani mampara traika kaikanka kumi kan, ban kuna baha tâwan wisi man nani mita bahki bara saura ai kulki ai briras katma. Sakuna, ai briram yang na Gâd insalka kumi baku, bara Jisas Kraist pali kapri kan baku.

¹⁵ Baha liliaka bri nani katma ba, ¿nanara dîa takan ki? Man nani hilpkam ra ban sip kamna wiaia, baha ba sip kata kaka, namkra pali nani sin daiki aikaia wilin banhwi kaia kapram.

¹⁶ Bara nanara lika, ¿dîa yang na man nani waihlam kum takri sa ki, diara kasak ba mai wîri tâwan?

¹⁷ Baha uplika nani ba uya man nani ra lukisa, kuna ai kupia pain lâka ni lika apia. Witin nani brin daukisa man nani ba, yang nani wina dakbi mai sakaia, bara ningkara man nani mita, witin nani ra brin mai dauki kira plikma dukiara.

¹⁸ Bamna nanara, pain sa diara wala dukiara wan brinka aiska ni pliki taukaia, sakuna baha ba kupiam lukanka wina kaia sa, bara yang na man nani wal sna na piua ra baman apia, kuna piua bani.

¹⁹ Luhpi lupia nani, kli aima wala man nani dukiamra latwan saura pali wahwisna, sim yapti kumi tukta mahka baikaia kan latwanka bri ba baku; latwan ba wahwi kamna, Kraist tânka ba aiska man nani brima ba kat.

²⁰ ¡Ban kra, naha pali piua ra man nani tilamra kan ai daukisa, bara baku lika sip kaia natka wala ra mai aisaia; baku bamna, man nani dukiamra dîa pali lukaia sna sapa yang kaikras!

Agar bara Sara wal tânka ba

²¹ Man nani, diara kum ai wis, Moses lâka ra ban iwi kaia lukisma nani ba: ¿baha lâka ba dîa aisi ba man nani walras katma ki?

²² Baha ba naku wisa: Ebraham lika luhpa waitna wâl bri kan, kumi ba alba mairin kata ba wina, wala ba lika ai maritka pali ba wina, baha lika mairin pri kata ba.

²³ Alba mairin wina ba lika wan wîna lâka kat tuktan wala nani baiki ba tânka kat aisubi takan; sakuna mairin pri wina baikan ba lika, Gâd bui Ebraham ra pramis munan ba aimakan.

²⁴ Naha na lika tânka tihu kum wan marikisa. Mairin wâl ba lika wan marikisa lâ wâl tânka. Naha lâka wâl wina kumi ba lika Sainai ilka ra yaban ba, bara baha ba lika Agar tânka wina wan marikisa; ya baha pramiska uplika sa kaka, aisubi takisa alba aimakaia dukiara.

²⁵ Bamna Agar tânka ba wan marikisa, Sainai ilka Arabia ra bâra ba dukiara, bara naha wan marikisa naiwa yua Jerusalemka ba dukiara; bara naha tawanka lika ai luhpia nani aikuki alba nani takan sa.

²⁶ Sakuna kasbrika purara Jerusalemka ba lika pri sa, bara yawan lika baha luhpia nani sa.

²⁷ Bamna Ulbanka ba wisa: “Biarapara mairka sma ba, man luhpa âpu sma ba, liliam bas; liliam mita puram wins, man luhpa baikaia latwanka wauhras sma ba. Kan baha mairka kangbi sakan ba lika, luhpa manis pali bribia, mairin ai maya waitna brih iwi ba wal.”

²⁸ Muihki nani, man nani lika Aisak wal baku sma: Gâd pramis daukan ba luhpia nani.

²⁹ Sakuna wan wîna lâka kat aisubi takan mita baha piua ra Spirit warkka wina baikan tuktika waitna ra nina bliki rausauhki kan ba baku, naiwa sin baku ban takisa.

³⁰ Kuna, ¿Ulbanka ba dîa wisa ki? Baha lika naku wisa: “Alba mairin ai luhpia waitna ba wâlsut kangbi sâks, kan alba mairin luhpia waitna ba wih mairin pri luhpia ba wal sip sut ai aisika dukia nani dawanka takbia apia sa.”

³¹ Baku bamna, muihki nani, yawan lika alba mairin luhpia nani apia, sakuna mairin alba apia ba luhpia nani sa.