Ester 8 - DAWAN BÎLA AISKA

Asuero mita ulbanka kumi sakan Ju nani hilpka ra

¹ Sim yua ra king Asuero, Amán watla kata ba kwin mairin Ester ra yaban, witin sika Ju nani waihla kata ba. Bara ningkara, Mardoqueo ba king lamara balan, kan Ester mita pat king ra win kan Mardoqueo ba ai lakra sa.

² Bara king mita Amán mihta wina mihtadingka sakan ba, Mardoqueo ra laki yaban; ba purkara sin, Mardoqueo ra Ester mita Amán watla kan ba pura kaikaia mangkan.

³ Bara Ester ba kli ai mawanra kauhi ini, king ra makabi win, Amán watawanka bara ai kupia saurka ba mita, Ju nani sut sauhki tikaia wisi, ulbanka kumi tasba aiska ra lakan ba kulkanka âpu daukbia.

⁴ Bara king ba Ester ra ai kînka dusa gul ni daukan ba sakban. Bamna Ester ba ai mina ra buan ba ra,

⁵ naku win: —King tara ba aitani kulkisa kaka, bara sin king tara mawanra yamni ai kaikisa kaka, naha ba sin kasak sa king mapa ra, ba purkara sin yang na namkra ra aitani sna kaka, adar kumi ulbi sâks baha wauhkataya Amán mita adar yaban ulbi sakan ba ai lukanka saura wal, Ju nani aiska iki tikaia wisi daukan ba, bahki ra kulkan kabia.

⁶ ¿Kan nahki muni pât saura yang upliki nani purara aula ba kaikras baku kamna, nahki muni kiamki nani sut sauhki tikaia ba kaikras baku kamna?

⁷ Bara Asuero bui kwin mairin bara Mardoqueo wal ra win: —Kaiks, yang Ester ra Amán watla kata ba yabri sa, baha purkara sin, Amán ba pat langki ikaia dusa ra langki ikan, Ju nani mapara ai mihta bukan ba tâwan.

⁸ Bamna man nani wauhkataya kum ulbaia adar maikisni, yang nini ra, Ju nani hilpka dukiara, nahki ulbrika kau yamni kabia lukisma kaka baku uls. ¡Bara wauhkataya nani ba ra king sîlka ba sin mangki banhs! (Bara ani yua ra king nina ra bara sin king sîlka ba wal praki ulbanka kumi blikisa kaka, upla kumi sin baha ba lulkbia apia.)

⁹ Pat pali king wauhkataya âiulbra nani ba paiwan balan. Baha manka ba kati 3 yua 23 ra, apia kaka Siván katka ba bilka ra Mardoqueo dîa win kan ba kat ulban, Ju nani ra, wihta tara nani ra, aiklaklabra wihtka nani ra bara king nani India tasbaika wina Etiopía kat ba tasba nani 127 bâra kan; bara tawan bani ba ai ulbanka kat, bara tawan sirpi nani dîa ai bîla aisinka ba kat, bara Ju nani ra sin dîa ai ulbanka bara ai bîla aisi kan ba kat ulban kata.

¹⁰ Bara king Asuero nina ra ulbi bara king sîlka ba sin wal praki wauhtaya ailal blikan wan, king araska plaplapra nani ba wal.

¹¹ Bara king mita adar yaban, Ju nani ani ani tasbaya ra iwi nani sut ra, asla taki aihwaki kaia, bara ya nani aiklabaia dukia wal ai mapara bubia kaka, iki âpu dauki, dîa witin nani bri ba sut mihta dakbi bribia, ai tuktika nani bara mairin nani ba sin.

¹² King Asuero tasba aiska ra naha daukanka ba yu kumi blikan daukaia kan, baha yua ba bâk sakan kata, Adar katka ra, yua 13 ra, kati 12 nani alkan ba ra.

¹³ Baha wauhkataya ulbanka wahia kum ba, lâ baku kulkanka yaban kaia sa, bara upla sut tasba aiska ra ba walan kaia, baku mika Ju nani ba sut ridi kabia baha yua kulki sakan ba, mapara bûi nani ba pura luaia dukiara.

¹⁴ Bara wauhkataya ba brih wan aras plaplapra nani ba wal, king adarka ba kat aihni muni brih waia sa bamna. Naha lâka na Susa kan kahbaika pliska ra sin yan walan, king adarka ba.

¹⁵ Bara Mardoqueo ba king watla ba wina, king kwalka mapla sangni bara pihni wal dimi taki wan; baha purkara sin, kraun gul wal daukan kum bara kwala mapla linin kumi sin pami brih taki wan. Bamna Susa tawanka aiska ba lilia tara pali brin,

¹⁶ bara Ju nani ba baku natka ra, witin nani ra ingnika ba wihki lilia lâka ba wal witin nani ra balan; ba purkara sin ai âuyapah lâka ba wihki kulkanka lâka sin witin nani brin.

¹⁷ Bara tasba bani ra, tawan nani bani ra king adarka brin ba ra, Ju nani bani lilia tara brih banhwan ai âuyapah kira ni, pata tara dauki kira ai lilia brih banhwan. Bara baha tasbaika uplika nani ailal pali ba sin Ju nani taki kata, kan Ju nani uplika nani ra sibrin tara bri kan ba mita.