Ester 7 - DAWAN BÎLA AISKA

Amán ba langki ikan

¹ Bara Amán ba king wal baha pata tara Ester mita paiwan kan ba ra wan,

² bara naha aima wala pata tara Ester daukan ba ra, king bui Ester ra win: —¡Makas dîa want sma ba, bara maikamni, king tasbaya bakriki makama sin yang maikamni!

³ Bara Ester pana win: —King tara, man bui yang ra latwan ai kaikisma kaka, bara baku aitani lukisma kaka, diara kumi baman yang brinki sa, man king tara lâka ra yang rayaki na pâtkas kulkma, bara upliki nani rayaka ba sin.

⁴ Yang bara tawanki aiska uplika nani sut na, wan atkan sa, sut wan sauhki tiki, iki âpu wan daukbia dukiara. Yang nani na alba mairin, alba waitna baku daukaia ra ai atki banhwan kaka, yang bîli praki sâp kamna, kan wan waihla ba sauhkanka nani uya daukbia apia, king brinka nani ba mapara.

⁵ Bara king Asuero makabi walan: —¿Naha lukanka saura ai kupia ra bri uplika ba ya, bara anira sa ki?

⁶ —¡Wan waihla bara wan mapara saura ba sika, naha Amán watawikira na! —baku Ester aisin. Bara Amán ba sirang iwan, king bara kwin mairin ba wal mawanra, naha bîla walan ba ra.

⁷ Bara king Asuero ba baha pata tara ba wina ai kupia sauhki, bara bûi mahka utla latara taki wan. Sakuna Amán lika kwin Ester ra ai rayaka swaki sâkbia wisi aisi tauki kata, kan witin ba pat ai dahra wali kan, king bui witin ra ikaia pâtka ra lakbia ba.

⁸ Baha ningkara, king ba utla latka giadin ba wina tawi balan bara pata tara pi ba ra diman, bara kaikan Amán ba Ester iwaika ra ai lula kriki bâra kan, bara pliska ra Ester ba aitniki bâra kan, bara king ba baha kaiki, naku win: —¿Kwin mairin ra sin yang waitla kat alki, kakalni saura munaisma ki? King ba naha bîla ba nan aisin ba wal, Amán mawan ba king warkka uplika nani ba mita prakan.

⁹ Bara king tara warkka uplika kum nina Harboná, baha mita naku win: —Kaiks, Amán watla latka ra pat ridi bâra paskan sa, langki ikaia dusa kum, ai yarika ba 75 pît; naha wal sika Mardoqueo langki ikaia wisi paskan ba. Bara king mita win: —Ban kaka, baha dusa ra pami langki iks.

¹⁰ Bara Amán ba baku langki ikan, Mardoqueo ra langki ikaia wisi paskan kan ba dusa ra. Bâra lika king kupia sauhkanka ba lamni takan.