Ester 6 - DAWAN BÎLA AISKA

Mardoqueo ba pura luisa

¹ Baha sim tihmika, king ba sip yapras kan; bara win wauhtaya ulbanka nani bri ba brih balbia dukiara, baha wauhkataya ra diara tara nani tawan ra takan ulbi mangkan ba, bara ai mawanra aisi kaikbia.

² Bara king Asuero ra ikaia wisi, Bigtán wih Teres wal ridi taki kan, Mardoqueo king ra ulbi swin kan sturka ba wal prawan.

³ Bara king ba makabi walan: —¿Dîa kulkanka lâka Mardoqueo ra yaban sa naha daukan ba dukiara? Bara witin warkka tatakra tara nani ba mita win: —Witin ra kau diara kumi sin yaras.

⁴ Bara naha aisi kan ba ra Amán ba pat bal, king latka ra aihwaki kan, king ra wibia taim Mardoqueo ba dus ra langki ikaia dukiara, baha dusa witin mita yan paskan ba ra. Bara king mita win: —¿Ya latara sa ki?

⁵ Bara king warkka uplika nani ba naku win: —Amán nâra sa. King win: —Wis bal dimbia.

⁶ Amán bal diman ba ra, king bui witin ra makabi walan: —¿Dîa daukaia sa baha uplika, king mita kulkanka yabaia ridi dauki ba wal? Bara Amán ba ai kupia ra lukan: “¿King ba yaura kau kulkaia ai brinka sa, yang ra baman lika apia?”

⁷ Baku bamna, Amán mita king ra naku pana aisin: —Baha waitnika king mita kulkanka yabaia ai brinka ba,

⁸ king tara dimaika kwalka, king tara ulaia araska bara king kraunka ai lal ra mangki ba sut blîks bri balbia.

⁹ Bara wihta tara kulkan kau tara bri ba, man king tara lâka ra, bahara yas araska ba. kwalka, kraunka ba sin. Baha waitnika king mita kulkanka yabaia ai brinka ba kwalka nani ba dimbia ningkara, aras ra suni tawan tara bilara kirhbaia pliska nani ba ra brih wapi taukbia, bara ai bîla saki wini kabia, upla nani aiska ba mawanra: ‘¡Baku daukbia baha uplika, king mita kulkanka tara yabaia luki ba ra!’

¹⁰ Bara king Amán ra win: —Man pat muni, dimaika kwalka ba wih araska ba wal brih, man dîa wiram ba kat, Mardoqueo Ju waitna, king watla dimaika ra iwi ba wal baku dauks. Aisaram dukia ba diara kumi sin swirka lubiara.

¹¹ Bara Amán ba dimaika kwalka ba brin, bara Mardoqueo ra dingkan, araska ba brin bara tawan uplika nani kirhbaika pliska ra wapi, witin ra wini mayuni kan: “¡Naku kulkanka yabisa, king mita yaura kulkanka yabaia luki ba ra!”

¹² Naha daukan ba ningkara, Mardoqueo ba kli king watla dimaika ra balan. Bara Amán lika, ai kupia ra wirha tara wal, ai lal biki aihni muni ai watla ra wan.

¹³ Bara Amán bui ai maya Zeres ra, bara ai pânika nani ra sin sut win dîa takan ba. Bara witin ai uplika nani sinskira ba wih ai maya Zeres aikuki naku win: —Naha Mardoqueo na, Ju nani kiamka sa kaka, bara sin man kauhankam pat witin ai mawanra tâ krikram, ba mita man sip kli witin pura luma apia; sakuna kasak mai wisna, man lika witin ai mawanra kauhram sa.

¹⁴ Bara witin kau ai uplika nani wal aisi kan ba ra, king albika nani ba witin ra aihni muni balan, baha pata tara Ester mita daukan kata ba, bahara brih waia wisi.