Ester 5 - DAWAN BÎLA AISKA

Ester king ra auya

¹ Lapta yumhpa luan ba ningkara, Ester ba ai kwalka diman bara king watla latka ra diman king ai iwaika rumka ba mawan kat takaski bri kan, dur dimaia tani ba ra kan ba.

² Bara king ba kwin Ester ra kaikan latara tauki kan, bara witin ra latwan pali kaiki, ai kînka dusa gul ni paskan ba ai mihta ra bri kan ba ni Ester ra ai mihta sakban, bara Ester bal baha tukinka ba ra kangban.

³ Bara king makabi walan: —Kwin mairin Ester, ¿dîa brisma ai wiaia? King tasbaya bakriki makama sin maikamni. Bara Ester pana win:

⁴ —King tara, man aitani lukisma kaka, pata tara kum man kulkanka ra luki daukri ba ra, man Amán ba sin bri balma. Pana king ba adar yan:

⁵ —Aihni wih Amán ra wis balbia, dîa Ester brinka ba kat daukbia. Baku bamna, king ba Amán wal, pata tara Ester ridi daukan ba bahara balan.

⁶ Bara king mita Ester ra naha pata tara ra naku win: —Makas dîa want sma ba, bara maikamni; king tasbaya bakriki makama sin, yang maikamni.

⁷ Bara Ester pana win: —Yang brinki sa, bara naha makabisna:

⁸ King tara, latwan ai kaikisma kaka, bara sin brinki ba wih makabanki ba wal daukaia sma kaka, makabisna man yauhka kli Amán wal pata tara wala ridi daukri ba ra waia. Bâra lika king man dîa daukaia ai wima ba daukamni.

Amán Mardoqueo langkaia ridi daukisa

⁹ Bara baha yua Amán ba, pata tara ba wina ai âuyapah pali taki wan; sakuna Mardoqueo ba king watla tara dimaika ba ra iwi kan, bara baha wina buras, purkara sin aiawi sin tawras kan iwi ba wina.

¹⁰ Ban sakuna, diara aisaras ai kupia kat bri ban ai watla ra bal, ai pânika nani ra bara ai maya Zeres ra sin winan balan,

¹¹ bara Amán ba ai dukia kukanka tara bri ba, bara ai luhpia ailalka nani ba dukiara, bara baku sin diara nani ailal ba purara king mita tara pali kulkan ba, bara wihta nani purkara sin mangkan ba, naha dukia nani aiska ba dukiara aisi kan.

¹² Bara naku sin aisan: —Baku sin, kwin mairin Ester ba, upla kumi ra sin paiwras kan pata tara kum witin daukan kan ba dukiara, sakuna yang ra baman lika ai paiwan, ba purkara sin yauhka ba dukiara kli ai paiwan sa, kwin mairin ba mita king wal waia.

¹³ Ban sakuna, naha sut na yang ra diara apia sa, aima bani ra Ju waitna Mardoqueo ba king dimaika ra iwi kan kaikisna ba mita.

¹⁴ Bamna Zeres bara ai pânika nani ba naha aisinka nani ba sut walan ningkara, naku win: —Langki ikaia dusa kumi yas paskbia, ai yarika ba 75 pît. Bara king ra wis, Mardoqueo ba bahara langki pami ikbia. Baha dauki swi si, pata tara liliakira ba ra king wal dims. Bara naha ba Amán mita aitani pali kaikan, bamna langki ikaia dusa ba yaban paskan.