Ester 4 - DAWAN BÎLA AISKA

Ju nani sari takisa lâ daukan ba tâwan

¹ Bara Mardoqueo ba naha diara nani sut takan na walan ningkara, ai kwalka kalkan bara sari kwalka kusni diman; baha wina yamhpus ai lal ra yakaban, bara tawan aiska bâk wapi wini taukan.

² Bara king watla durka kat balan, kan yamni apia kan kwala dimi balan baku king watla ra dimaia.

³ Bara tasba bani ra king adarka ba waluya ba ra, Ju nani ba kaikan ai trabilka ba tara sa, bara param marikan ai sarka bri ba. Plun wahwan, ai nakra laya saki ini yahwan, tila manis ba yamhpus ra aitnikan bara kwala kusni diman.

Ester aisanka ba

⁴ Bara tiara nani kwin Ester warkka dauki kan nani ba, bara waitna nani witin ra main kaiki kan nani ba mita win dîa taki ba; bara kwin mairin ba ai kupia wirha tara brin, bara Mardoqueo ra kwala blikan wan, baha dimi kwala kusni dimi kan ba daikbia dukiara; sakuna witin apia win.

⁵ Bara Ester bui Hatac ra winan balan, naha sika king suldiar wihtka nani ba tila wina, witin ai warkka dadaukra kan ba; bara naha waitna ra blikan wan, Mardoqueo ra makabi walaia dîa takisa sapa, bara dîa muni sin witin ba baku taukisa sapa.

⁶ Bara Hatac ba taki wan Mardoqueo wal aisaia, tawan uplika nani iwaika pliska king watla mawan kat bâra kan ba ra wan.

⁷ Bara Mardoqueo mita dîa taki kan ba sut pali win, bara Amán Ju nani iki tikbia wisi king ra lalah yabaia win ba sut sin win.

⁸ Baha purkara sin lâ mangkan ba, Ju nani iki tikbia dukiara, baha wauhkataya ba sin yaban, Ester ra marikbia dukiara. Bara baku sin, witin ai purara naha pâtka na brih, king ra aisabia ai uplika nani dukiara.

⁹ Bara Hatac ba Ester ra balan bara dîa Mardoqueo mita aisin ba sut win.

¹⁰ Bara Ester mita Mardoqueo ra wibia wisi Hatac ra kli bliki win:

¹¹ “King dukia dadaukra nani sut ra, bara king tasbaya ra iwi uplika nani aiska tânka brisa, ani uplika king mita paiwras kan kaikaia wisi wabia bara king watla tasbaya pîska ba ra dimbia kaka, naha uplika mapara lâ kumi baman bâra sa, baha uplika ba pruaia sa. Apia kaka, king ba mita ai dusa gul ni paskan ba ni baha uplika ra sâkbia kaka lika, sip kabia rayaka ba swaki sakaia. Bamna yang ra kau ai winras sa naha yua nani, yu 30 na bilara king ai mawanra waia.”

¹² Bara naha waitnika ra dîa wibia wisi, Ester mita win kan ba Mardoqueo ra sut win.

¹³ Bara Mardoqueo mita Ester ra pana naku win: “Man lukpara king watla ra sma ba ra, man baman Ju nani tila wina rayakam swaki sâkma.

¹⁴ Bara man naha yua ra diara aisaras bîlam praki sâp kama kaka, Ju nani prika lâka ba tani wala wina balbia, sakuna man bara papikam watla uplika nani sut ba lika prui âpu tiwi banhma. ¡Ya pan nu sa, man naha awarka na baha dukiara kwin lâka ra waram sapa!”

¹⁵ Bara Ester mita pana kli Mardoqueo ra wibia wisi naku win:

¹⁶ “Bamna man, nanara was, bara Susa ra Ju nani bani wal prawma ba ra witin nani ba sut asla dauki yang dukira puram suns, plun piras bara lî sin diras kira lapta yumhpa dauks, kakna bara tihmia ra, bara yang sin baku daukamna warkki dadaukra nani ba aikuki. Baha ningkara, yang lika king mawanra wamna, lâ krikamna bara ai ikaia kaka ai ikbia si.”

¹⁷ Bara Mardoqueo ba wan bara Ester mita dîa win kan ba kat daukan.