Ester 3 - DAWAN BÎLA AISKA

Mardoqueo bara Amán wal

¹ Naha diara nani ningkara, king Asuero mita Amán, Hamedata luhpia, Agag kiamka ba, tawan lalka tara mangkan, baku sin wihta wala nani bâra kan ba sut purkara ai iwaika ba yan.

² King warkka dadaukra nani sut king watla ra kata ba, Amán kaikuya ba ra, ai mawanra ai lula kriki ai lal sin bawi kan, baku king adar yaban kan bamna, sakuna Mardoqueo wala nani dauki kan baku daukras kan.

³ Bara king warkka dadaukra nani ba mita Mardoqueo ra makabi walan dîa kan king adar yaban ba daukras ba.

⁴ Bara naha dukiara yu bani ra makabi wali kan Mardoqueo ra, sakuna witin ba walras baku ban tauki kan. Bara Amán ra dahra sakan, kapu Mardoqueo ba dîa win ba kat ai lukanka ba lakras kabia sapa, baha purkara sin, witin Ju uplika ba pat param takan kata.

⁵ Bara Amán kaikan Mardoqueo ba witin ra ai lula krikras, ai lal sin bawras ba witin kaiki ba ra; bara Amán ba kasak pali lawan.

⁶ Sakuna pat win kan, Mardoqueo ba ya kiamka kata, kan pat param takan kata Mardoqueo ba ani wina ba; bara Amán ba ai lukanka ra brin, Ju nani aiska Asuero kingka tasbaya ra iwi nani kan ba sut iki tikaia.

Lâ daukan ba, Ju nani sut âpu daukaia

⁷ Kati pas, mani tâura, apia kaka Nisán katka ba, king Asuero ba king aimakan wina 12 mani bri kan; bara lat lulki kaikan Amán mawanra, baha lika dîa yua bara katka kauhbia sapa ai warkka ba daukaia; bara takan ba sika, yua 13, kati 12 ra, wibia sa kaka, Adar katka ra.

⁸ Bara Amán bui king Asuero ra win: —Tawan kumi bâra sa, man king tara tasbayam aiska ra dakwi tawi iwisa; bara ai lâka nani ba sin aihka sa, tawan uplika nani lâka ba wal. Baha purkara sin, king tara lâka nani ba sin kulkras sa, bara baku swika raya kaia ba king tara mapara aitani apia sa.

⁹ Bamna, king tara, man naha na aitani kulkisma kaka, lâmka adarka kumi laks wabia, baha nani ba sut pali iki tikbia. Bara yang wina warkkam uplika nani ra silbar 60,000 paun yabamna, king yuyaka nani dukia.

¹⁰ Bara king ba ai mihtadingka ba daiki, Amán Ju nani waihla ra yaban,

¹¹ bara win: —Lalah aikaia wisma ba, man dukiam kabia; baha purkara sin, uplika nani wal dîa daukaia lukisma ba kat, witin nani ba wal dauks.

¹² Yua 13, kati pas manka ra, king suliarka nani ba paiwan; bara Amán adar yan ba ulban, tawan lalka bani ra bara wala nani ra sin blikan wan. Wihtka bani, tawan bani ai ulbanka natka kat, bara ai bîla aisi ba kat sin ulbi blikan; bara king Asuero ai nina bara king sîlka sin mangki blikan.

¹³ Bara wauhtaya nani ailal blikan wan wauhtaya twatwilkra nani ba wal, king tasbaya nani aiska ra, Ju nani almuk tuktan, mairin bara wahma nani ba sut iki tikaia bara diara bri ba sut witin nani dawanka takbia. Baha yua mangkan ba lika, kati 12, yua 13 ra kabia.

¹⁴ Bara naha ulbanka na, lâ baku mangki plis bani ra blikan bara upla kumi bani ra, witin nani sut baha yua ra dîa daukaia ba dukiara ridi kabia wisi.

¹⁵ Bara wauhkataya twatwilkra nani ba, mahka brih taki wan king adar yaban ba kat. Naha lâ wauhkataya ulban ba Susa kan kahbaika pliska bri ba ra param sakan; bara baku dauki si, king ba Amán wal lika di kan, sakuna Susa tasbaika tara ra lika kupia turbanka ailal pali bâra kata.