Esdras 9 - DAWAN BÎLA AISKA

Israel luhpia nani saura daukan bara Esdras ai pura sunan ba

¹ Baha warkka nani ba sut daukan ba ra, Israel wihtka nani ba yang ra balan bara naku ai win: “Israel luhpia nani, baku sin prîs bara Libait nani ba, naha tasbaya uplika lâka nani wina sip dakwi takras sa: Kenan uplika nani, hitita nani, ferezeo nani, Jebús uplika nani, Amón uplika nani, Moab uplika nani, Idsip uplika nani bara amorreo nani dîa ai natka saura dauki tauki banhwi ba lâka kat taukisa.

² Witin nani bara ai luhpia waitna nani ba sin, baha uplika nani luhpia mairin nani wal ai maya brisa; baha mita Gâd uplika nani ba upla wala nani wal miks takisa. Bamna wihta tara bara wihta sirpi nani ba sika, tâ brih baha saurka dauki ba.”

³ Baha sturka nani ba walri ba ra, yang prâika nani ba aubi kalkri, baku sin tâiwa, uni maya nani ba sut aubi daikri sari tukinka, bara kupi sin uba pali wirha takan.

⁴ Baha nani Israel Gâdka klalka sibrinka bri nani ba, upla nani kangbi sakan kan kli tawi balan nani ai saurka daukan ba tâka mita, witin nani ba yang ra balan, sakuna yang kupi wirha ban kan, sakripais daukaia piua ba kat.

⁵ Bara baha piua kat, yang kupi wirhika ba wina buri, bara prâika kalkri ba ban dimi, mahka Dawan Gâdki ra puri sunri,

⁶ naku aisi: “Yang Gâdki, yang Gâdki, yang kupi turban bara swiri lâka ra sna, nahki man ra mai wiaia sapa kaikras. Yang nani saurki ailal ba laila pura luan sa, baha purkara yang nani lâ kriki banhri pâtka ba kasbrika kat ulan sa.

⁷ Wan aisika nani yua ba wina naiwa kat, yang nani saurka lâka ra iwi banhwisna. Yang nani saurki nani tâka mita, kingki bara prîski nani sut aikuki tasba wala nani kingka nani mihta ra ai mangkram. Naiwa yua kat ban wan ikisa, alba wan brisa, wan dukia nani implikisa, yang nani swira lâka tara wal ban iwi banhwisna.

⁸ Ban sakuna, nanara, Dawan wan Gâdka, kupiam swapnika lâka ra wan brisma, sip kan yang nani tili wina upla dakni kum pri takaia bara yawan nani ra sans wankan, tasba holikira ra wan watla nani mâkaia alba lâka ba wina piua wiria, yang nani ris briaia aikram.

⁹ Yang nani alba nani sna sakuna, taiban bara alba lâka tilara ban wan lulki wan swiras sma; man daukram Persia kingka nani kupia pihni lâka ra yang nani ra tniwan, baku sin rayaki aikram man tempelkam ba kli bukaia, baha sauhki tikan ba tila wina. ¡Man sin wan kaina kahbram Juda ra bara Jerusalem ra sin!

¹⁰ “Sakuna nanara, Dawanki, ¿yang nani dîa aisamna ki, naha daukanka nani yang nani daukri ba? Kan man lâmka daukaia wiram ba kat yang nani daukras,

¹¹ prapit albikam nani bâk yang nani ra aisaram ba. Yang nani ra ai wiram, baha tasbaya ra yang nani tasbayi briaia auna ba, uplika nani ba saurka lâka ba mita tâski pali takan sa, idan nani ai natka wal, misbara kaikanka nani, watawi dauki tâski pali takan kan baha tasbaika ba.

¹² Bara yang nani luhpi mairin nani ba, witin nani luhpia waitna nani wal maya baikamna apia wiram, baku sin luhpi waitna nani ba baha nani luhpia mairin nani wal maya baikamna apia wiram, witin nani aikuki sin kupia kumi lâka dauki, yamnika briaia lâka daukamna apia wiram, bara baku mika tawan ba karna kaia. Bara tasba ritska wina pi kamna wiram, bara wan luhpia nani ra prapatika yama piu bani ra ban kaia ra.

¹³ “Yang nani saura daukri ba tâka mita, diara sut ban baku takan; yang nani pât wauhri, sakuna Dawanki, man mita yang nani saura daukri ba mana aikaia praiska kat klala aikras kapram, sakuna kir laki naha pri lâka ni wankram.

¹⁴ ¿Bara yang nani kli man lâmka nani bîla ba kriki, upla sât wala nani upla wala ra misbara kaiki nani ai natka nani dauki ba tilara, wan kiamka nani saki kaia sna ki, witin nani wal baku taki? ¿Yang nani baku daukamna kaka, lawankam tara ba wan mapara bal âpu wan daukras kama ni, naha kiamka nani wina kumi sin plapi swak takbia apia, titikbi iki tikan kabia?

¹⁵ “Dawan Israel Gâdka, man kasak wapni pali sma, ban pât nani tilara man mita daukram, yang nani dakni lupia kum naiwa yua kat kau ban raya kaia, baku yang nani naiwa nâra sna. Yang nani sika pâtkira sna, man kaikisma; baha mita lamamra kaia sip apia banhwisna.”