Esdras 8 - DAWAN BÎLA AISKA

Upla nani Babilon wina kli balan ba nina nani

¹ Naha nina nani na sika, utla bîla bani lalka nani, pamali nani nina ulban wauhkataya ra taki ba, witin nani Babilon wina Esdras aikuki balan ba Artajerjes king aimaki kan piua ra:

^2-3 Guersón, Finees kiamka nani tila wina; Daniel, Itamar kiamka nani tila wina; Hatús, Secanías luhpia waitna ba, Debit kiamka nani tila wina; Sakaraya, Parós kiamka nani tila wina 150 waitna nani, witin nani nina ulbanka wauhkataya ba wal asla;

⁴ Eliehoenai, Zeraías luhpia waitna ba, Pahat-moab kiamka wina, waitna 200 nani wal balan;

⁵ Secanías, Jahaziel luhpia waitna, Zatú kiamka tila wina, 300 waitna nani witin wal balan;

⁶ Ébed, Janatan luhpia waitna, Adín kiamka tila wina, witin wal waitna 50 nani balan;

⁷ Aiseya, Atalía luhpia waitna, Elam kiamka tila wina, witin wal 70 waitna nani balan;

⁸ Zebadías, Micael luhpia waitna, Sefatías kiamka tila wina, 80 waitna nani witin wal balan;

⁹ Abdías, Jehiel luhpia waitna, Joab kiamka ba tila wina, 218 waitna nani witin wal balan;

¹⁰ Selomit, Josifías luhpia waitna, Baní kiamka tila wina, 160 waitna nani witin wal balan;

¹¹ Sakaraya, Bebai luhpia waitna, 28 waitna nani witin wal balan;

¹² Johanán, Hacatán luhpia waitna, Azgad kiamka tila wina, 110 waitna nani witin wal balan;

¹³ Elifélet, Jeiel bara Semaías, Adonicam kiamka nani tila wina lâs nani ba, witin nani aikuki waitna 60 nani balan.

¹⁴ Utai bara Zabud wal, Bigvai kiamka tila wina, witin nani wal 70 waitna nani balan.

Libait nani sakan ba tempel warkka daukaia

¹⁵ Bara yang Esdras, uplika nani ba sut asla daukri baha Ahavá awala un kat, bara bahara lapta yumhpa takaski banhri. Bara witin nani ba sut laki kaikri, upla nani ba tilara, prîs nani ba tilara, sakuna baha nani tilara Libai luhpia nani kumi sin sakras kapri.

¹⁶ Baha ba mita Eliézer, Ariel, Semaías, Elnatán, Jarib, Elnatán, Natán, Sakaraya bara Mesulam kat blikri wan witin nani ba sika kulkanka tara bri uplika nani kan, baku sin tilara blikri Joiarib bara Elnatán wal ba, witin nani ba smasmalkra tara nani kan.

¹⁷ Witin nani ra adar yâri Casifiá tasbaya wihtka, Idó ra wih aisaia, bara witin nani ra pat smalkri sa, dîa Idó ra wih aisaia ba, ai pânika nani ra, Casifiá ra tempel wark dadaukra nani ra aisaia ba sin, bara baku upla nani bri balaia tempel Dawan watla ba mâkaia ra wan tâ baikaia dukiara.

¹⁸ Gâd ra tingki, witin mita Serebías ba bri sal wankan, waitna sip pali ba, Libait kum nina Mahli, baha kiamka, bara Serebías luhpia waitna nani, baku sin muihnika nani sin brih balan, sut ba ra 18 upla nani kata.

¹⁹ Baha purkara Hasabías bara Aiseya, Merarí kiamka nani ba sin brih balan luhpia nani aikuki, muihnika nani sin, sut ba ra 20 upla nani kata.

²⁰ Bara tempel ra wark dadaukra nani tila wina, Debit mita saki mangkan nani ba, bara Libait nani ra hilp munaia mangkan tâ uplika nani ba 220 kan, baha nani witin pali bui mangkan kata.

²¹ Bara Ahavá tingnika un ra, witin nani sut ra maisa pakanka kum daukri, ai kupia kriwan lâka ra plun piras kaia, Gâd wan Dawan mawanra wan saurka dahra sakaia, bara baku sin witin ra makabaia yabal bâk yamni wan brih wabia dukiara.

²² Yang lika king ra suldiar nani aras uli nani ba makabaia swiri ai dauki kan, witin nani wan waihla nani ba mapara yabal ra wan kaina kahbi wan brih wabia dukiara, kan pat king ra wîri sa, yang nani Gâdki mita ya nani witin ra pliki ba aikuki sa, baku sin Gâd ba lulki swisa bara ai kupia baiwanka nani sin, baha nani uplika witin wina laihura taki nani ba mapara kahbisa.

²³ Bamna yawan plun piras baha sut ba dukiara, Gâd ra wan pura sunaia, bara witin ai yamnika wankbia.

²⁴ Baha ningkara, prîs nani upla tâ bri nani ba tila wina 12 wahbi sakri: Serebías, Hasabías bara witin nani ai tnaya ra sin ai pâna nani matawalsip sakri,

²⁵ bamna silbar bara gul nani ba paun ra mangki ningkara diara wala nani bâra kan ba sut witin nani mihta ra mangkri, baha dukia nani king bara ai uplika nani wina Gâd tempelka ba dukia tâura prisantka yan ba, naha ba witin nani sut mawanra daukri.

²⁶ Naha dukia nani paun muni yabri: silbar 21,450 paun, tempel watla ra yus munaia dukia nani silbar ni paskan dukia nani 100, bara gul 3,500 paun;

²⁷ baha purkara, gul ni daukan kapka nani 20, kumi bani 8 paun bri kan, bras ni daukan dukia nani wâl, prana bara manakira pali kata.

²⁸ Bara yang bui witin nani ra wîri: “Man nani sut pat Dawan lâka kat sunu takram sa, gul nani bara silbar nani ba sin sut sunu daukan sa, Dawan wan aisika nani Gâdka ba dukia.

²⁹ Bamna nanara aihwaki kaiki bas, Jerusalem ra wama yua naha dukia nani na bri si, prîs nani, Libait nani, Israel uplika bara utla lalka nani mawanra kaiki kaka, paun ra mangki bara tempel bilara bri si swima.”

³⁰ Ningkara prîs bara Libait nani aikuki, gulka bara silbar nani, baku sin dikwa sâtka nani paun muni paskan kan ba sut brin bara Jerusalem ra brih balan, wan Dawan tempelka watla ra.

³¹ Kati pas yua 12 ra, yang nani Ahavá tingnika wina taki banhri, Jerusalem ra waia. Wan Gâdka wan tâ baikan yabal ra wan waihla nani bara rausasauhkra nani mihta wina swaki wan sakan.

³² Jerusalem ra bali banhri bara lapta yumhpa yang nani ris briri.

³³ Bara lapta walhwal ra gul bara silbar bara diara wala nani gul ni bara silbar ni paskan dukia nani ba, sut paun munri, bara Gâd watla ra prîs Meremot, Urías luhpia ba mihta ra mangkri, witin wal kan Eleazar Finees luhpia ba, Libait nani Jozabad, Jasua luhpia ba, bara Noadías Binuy luhpia ba sin.

³⁴ Bara baha sim yua pali ba, diara nani sut paun ra mangkan, kulki sin kaikan, ningkara dukia nani sut bâra ba nina nani ulbi brin.

³⁵ Israel luhpia nani priski alba lâka ra brih wan kan ba wina kli balan nani ba, witin nani bui daiwan nani iki aiska angki Gâd ra yabaia ba yan, witinka Israel Gâdka ba; bara baku sin Israel uplika aiska nina ra yan naha daiwra nani: bîp wainhka nani mani kumi alkan ba 12, sîp wainhka 96, sîp luhpia 77 bara guts wainhka 12 yan, baha daiwra nani ba saurka daukan ba sakripaiska dukiara, bara aiska angkan Dawan nina ra.

³⁶ Baha ningkara king bui ulbi adar yaban kan ba yan, wihta tara bara wihta sirpi nani Éufrates awala muna tani ra iwi nani ra, baha nani mita Israel luhpia nani bara Gâd tempelka ba mâkaia tâ baikan ba.