Esdras 6 - DAWAN BÎLA AISKA

¹ Bahamna king Darío adar yaban wauhkataya nani ulban auhbi swi ba tilara plikaia Babilon ra;

² bara Media tasbaya ra, king watla Ecbatana ra, wauhkataya nani auhbaika pliska wina buk tara kum sakan, baha bukka ra naku ulbi swin kan:

³ “King Ciro, witin king aimakan pas manka bilara, naha adarka nani yan ulban: ‘Gâd tempelka Jerusalem ra ba dukiara lika: Utla tara playka nani ba bapi, bara kli mahka mâkbia, bahara sakripais dauki kaia dukiara; tempelka ba naku yahpika bri kabia: 90 pît purara, bîla yahpika sin 90 pît;

⁴ baha purkara, walpa ni paskan blokka yahpa lain yumhpa, bara tat raya ni paskan sin lain kum. Bara baha nani mana ba king lalahka wina aibapan kabia.

⁵ Baha purkara sin, gul bara silbar ni paskan dukia nani Gâd watla ra kan king Nabucodonosor wih, Jerusalem tempelka wina saki Babilon ra brih wan nani ba kli yabia, bara Jerusalem ra bri si Gâd watla ra suni swibia.’ ”

⁶ Baha ningkara, king Darío mita naha adarka yaban Tatenai ra, baku sin Setar-boznai ai pânika nani sut ra sin, witin nani ba Éufrates awala baila wala muna tani ra wihta tara bara kulkanka bri uplika nani kata: “Man nani Jerusalem wina mahka taki was,

⁷ bara Ju nani wihtka tara ba ai mânka bara wark tâ bri uplika nani ba aikuki, Gâd tempelka ba ai pliska kat kli mâkbia.

⁸ Naha na yang adarki nani maikisna, naha Ju nani tâ uplika nani ba tâ baikaia sma, witin nani Gâd tempelka ba kli mâkbia mata. Bara Éufrates awala muna tani tasbaya wina lal mana nani king bri ba, baha lalahka ba wina diara nani atki bri ba mana piua kat sut aibapi kabia, baha warkka ba alki takaskbiara.

⁹ Yu bani prîs nani ai warkka Jerusalem ra daukaia dukiara, dîa dîa want ba yabi bas, witin nani dîa makabi ba dukia nani, bîp wainhka bara sîp wainhka nani baha ba aiska angki Dawan ra yabaia dukiara sa, baku sin plawar, sâl, wain, oliv batana sin yabi bas,

¹⁰ bara baku lika sip kabia Gâd laih purara ba ra sakripais angki, witin yamni kaiki ba dauki, king bara ai luhpia nani dukiara sin ai pura sunbia.

¹¹ “Baha purkara, yang mita adar yabisna, ya ya naha lâka na krikbia kaka, ai watla mâkan ba wina playa kum daiki brih tâ ba tatwa dauki, tasba ra bapi bahara sabi ikbia; baku sin ai watla ba slingbi pura kat paski swibia.

¹² ¡Bara Gâd Jerusalem ra ai nina bâra kaia wahbi bâk sakan ba bui ani kingka, apia kaka ani nisanka bal Dawan tempelka ba sauhkaia, apia kaka, warkka ba takaskaia trai munbia uplika nani ra, sauhki tikan kabia! Yang, Darío, baha adarka ba yâri sa. Bamna dîa ulbri ba kat daukan kabia.”

Witin nani takaskras ban tempel ba mâki kan, danh takan ba kat

¹³ Bara baku wihta tara Tatenai, Setar-boznai bara ai pânika nani sut aikuki, Éufrates awala muna tani ra iwi banhwi kan ba, dîa king Darío win kan ba kat daukan.

¹⁴ Bara baku, Ju nani tâ uplika ba wark tara ba ban dauki ai kainara brih waia sip kan, prapit nani Hageo bara Sakaraya aisan ba kat, witinka na Idó luhpia kan ba. Baku bamna, Israel Gâdka win ba kat paskan, Persia kingka ba adar win kan ba kat sim katka ra.

¹⁵ Bara tempel watla ba mâki danh takan, Adar katka yu yumhpa ra, king Darío ba pat 6 mani king lâka ra aimaki kan piua ra.

¹⁶ Israel luhpia nani, prîs nani, Libait nani bara wala nani alba lâka ra kan kli balan nani ba aikuki, lilia tara dauki Gâd mihta ra mangkan.

¹⁷ Baha yua witin nani bîp wainhka nani 100 kum, sîp wainhka nani 200, sîp mairin nani 400 bara guts wainhka nani 12, Israel kiamka nani 12 ba kulkanka ba kat, witin nani saurka ba sakripaiska dukiara ikan, baku sin Israel kiamka nani sut ba saurka dukiara sin guts nani ba ikan.

¹⁸ Baha ningkara prîs nani ba ai piua kat wark dauki kaia warkka ba yaban, Libait nani ba sin dîa dauki kaia ba warkka ba marikan, Gâd mayunra warkka Jerusalem ra dauki kaia, Moses wauhkataya ra dîa ulban ba tânka kat.

¹⁹ Baha purkara alba brih wan wina kli balan uplika nani ba, Insal luan Yua Liliaka ba daukan, kati pas 14 yua ra.

²⁰ Prîs nani ba Libait nani ba wal Dawan lâka ba kat dauki, pat sunu takan kata, bamna sut ba tâski âpu kan. Bara baku Insal luan Yua Liliaka sakripaiska ba daukan, baha nani ai tasbaya ra kli tawi balan nani ba sut aikuki, prîs nani ai pânika kan nani ba dukiara sin luki daukan.

²¹ Bara Israel luhpia nani, alba lâka wina kli tawi balan nani ba sut, baha Insal luan Yua Liliaka pata ba pi banhwan, wala nani sut sin tâski lâka ba wina tnaya ra tawan nani ba, baha tasbaya uplika nani tila wina, witin nani aikuki prawi Dawan ba plikan.

²² Witin nani brit îs âpu dauki, yu 7 baha yua liliaka ba dauki kan, Dawan mita Persia kingka kupia swapni daukan, bara yaban witin nani ra umpira kaikan, bara sin kau ni tâ baikan, Gâd, Israel Gâdka tempelka mâkan liliaka dauki ba ra.