Epesus 1 - DAWAN BÎLA AISKA

Lakula bîla

¹ Yang Pal, Gâd kupia lâka ba mita Jisas Kraist apastilka kum sna, baha tânka ba lika, naha wauhkataya na ulbisna, Epesus tawanka ra Gâd uplika nani bara Kraist Jisas ra kasak luki nani ra.

² Gâd wan Aisa bara Dawan Jisas Kraist wina, yamnika nani bara kupia kumi lâka ba man nani bri kama.

Kraist ra prakan Spirit yamnika nani ba

³ Wan Dawan Jisas Kraist Aisika bara Gâd ba sin, witin ra mayunpi, kan yawan Kraist wal asla takan ba ra, witin bui Spirit yamnika sât sât ni yamni wan munan kasbrika pura tasbaya nani ra.

⁴ Tasba na kau paskras kan ba piua wina, Gâd pat Kraist ra wan praki bâk saki wan brin, witin ai mawanra kaia ai uplika takaia pâtkas kaia, ai latwanka lâka ba mita.

⁵ Kaina wina pat luki kaikan, Jisas Kraist bâk ai luhpia nani baku kli wan briaia, witin daukaia ai kupia ra lukan ba kat.

⁶ Baha mita yawan piua bani Gâd ra mayunisa ai latwanka tara ba dukiara, baha sim latwanka ni yamni wan munan sa, yawan ai Luhpia latwan pali wal asla sa bamna.

⁷ Gâd latwan pali wan kaiki ai Luhpia ai tâlia laiki, pruan ba tâlia ra pri wan sakan sa, bara yawan saura daukan pâtka ba swin tiwan sa.

⁸ Gâd ai latwanka lâka manis ba, tânka param wan marikan sins lâka bara diara tânka kaikaia lâka sin wanki ba mita,

⁹ bara witin ai brinka yukukan ra ba sin wan marikan, baha sika witin Kraist bâk diara sut tnata alkaia luki kan ba.

¹⁰ Gâd diara daukaia lukan ba lika, diara bani ba piua kat sut pali tnata alkan kabia, bara yaka paskanka aiska ba asla takbia ba ra, Kraist lika baha sut lal kabia, diara nani kasbrika purara ba bara tasba ra ba sut sin.

¹¹ Bamna yawan Kraist wal asla takan ba mita, Gâd mita kaina piua wina bâk saki wan brin, diara witin yaia ba wina wan dukia bribia; bara naha sut na lika Gâd bui dîa daukaia lukan ba kat sika, dîa witin pain kaiki ba baman dauki ba.

¹² Witin baku daukan, baha mita yang nani pas tâura Kraist ra luki kainira diara briaia lukri ba, raya banhwi kamna Gâd ai prana tara ba tâwan mayunan kabia dukiara.

¹³ Bara man nani sin, diara kasak sturka ba walram, bara swaki mai sakan lâka smalkanka ba, bara Kraist ra kasak lukram ba ra sin, witinka ra asla mai prakan bara sîl sin mai mangkan Gâd dukia nani kaia ba mata, witin pramis aisin Spiritka Holikira ba mita.

¹⁴ Spirit Holikira ba sika Gâd ai uplika nani ra diara yaia pramis munan ba tukinka, bara baha ba baku takbia, Gâd ai uplika nani ra pri lâka yaia win kasak pali aimakbia ba ra. ¡Bamna kaisa Gâd prana ba mayunaia!

Pal Gâd ra makabisa lalukra nani ra sins lâka ba yabia

¹⁵ Baha mita man nani bui Dawan Jisas ra kasak lukisma ba, bara Gâd uplika nani sut ra latwan kaikisma ba, yang kaikri ba ra,

¹⁶ takaskras kira Gâd ra tingki wisni man nani sut dukiamra puri sunisna bara man nani ra lukisna.

¹⁷ Makabisni wan Dawan Jisas Kraist Gâdka ra, Aisa pranakira ba, witin mita sins lâka spiritka maikbia, bara sip kama witin param takan ba tânka pain kaikaia, bara witin ra sin kau kakaira kaia.

¹⁸ Gâd ra makabisna man nani sinskam ba ilingbia, baku mika tânka bri kama dîa dukia bîla kaikaia wisi mai paiwan ba, bara Gâd ai uplika nani ra diara yaia pramis munan ba nahki yuyakira bara pranakira sa,

¹⁹ bara ai karnika ba sin tara pali bara tnata âpu sa, bamna baha karnika sika yawan bui witin ra kasak lukan nani bani ra ai warkka dauki ba. Naha sim karnika sika Gâd mita karnika aiska aihwa pali ni wan marikan,

²⁰ Kraist pruan wina buki ai mihta aihkika tani ra kasbrika purara yan iwan ba ra.

²¹ Kraist lika kasbrika purara karnika bri nani ba sut purkara kau karna sa, lâ karnika alki nani ba, dawan taki nani ba, pura aimaki nani ba, nina wala nani ba nanara bara naika bâra mâkbia ba sut purkara sin.

²² Diara sut ba Kraist mina mununhtara mangkan sa, bara Kraist pali ba sin serts lal mangkan diara nani sut Dawanka baku.

²³ Bamna serts ba sika Kraist wîna tara, baha sika Kraist banhwanka; bamna Kraist pali mita sin diara nani sut ba banhki pali daukisa.