Emus 8 - DAWAN BÎLA AISKA

Dus mâ pawan baskit kum kaikan ba

¹ Dawan diara wala mairikan ba, yang kaikri: Dus mâ pawan pali kûa banhki kum bâra kan,

² bara witin bui yang ra maikabi walan: —Emus, ¿man bâra dîa kaikisma? —Dus mâ pawan baman kûa banhki kum na kaikisna —wîri. Bara Dawan naku ai win: —Yang upliki Israel nani ba, dus mâ pawan baku sa; rausauhkaia yua ba bal aimakan sa; witin nani saura dauki ba ban kupi alki brih kaiki kamna apia.

³ Witin nani ai watla tara nani ra lilia aiwani ba, baha yua ra pruan nani pura mata ai mamna lulki ini kabia. Upla ailal pruan kabia, witin nani wini ini bin daukras, sâpkira pruan nani ba bri si lulki kabia. Dawan baku kasak aisi wisa.

Israel uplika lâka daukaia yua ba pat aula

⁴ Man nani diara luha uplika nani ra taibisma ba, bara kuntrikam uplika umpira nani ra sauhki tikisma ba, wali banhs.

⁵ Man nani lukisma: “¿Kati raya yua liliaka ba ahkia lubia ki, ningkara plawar mâ nani ba atkaia dukiara? ¿Yu matlalkahbi pura kumi wan ris yua ba ahkia lubia ki, ningkara plun auhbi swin ba saki mana tara bara paun ra kasak kunin muni impliki atkaia dukiara?

⁶ ¡Baku yawan umpira nani ba, kau rausauhki umpira lâka ra brih wabia, baha nani ai umpirka tâka mita, yawan ra ai wîna tara aiska alba kaia dukiara atkbia, ai traska nani aibapaia wisi, ban kra sûs kumi baman mana tras bri kabia sin! Plawar mâ aisawan nani ba sin witin nani ra atkbia.”

⁷ Dawan ai prana Jekob ra yaban ba ra luki, swer taki aisin: “Man nani warkkam nani baku daukisma ba, yang âiya ban pali tiwbia apia.”

⁸ ¿Baha daukram ba tâka mita, tasba na tatatwan kabia apia ki? ¿Upla nani tasba purara iwi ba sut sin inbia apia ki? ¡Idsip ra Nilo awala lisamra tara uli kli rahwi ba baku, tasba na uli, lahwi kabia!

⁹ Dawan aisisa: “Yang baha yua ra daukamna, lapta wan lal kat yu ingnika ba prakan kabia, bara kakna pali ra tasba ba tihmia tara daukamna.

¹⁰ Lilia daukaia yua nani ba, pruan nani pura mata inaia yua daukamna; bara lilia dauki aiwanaia lawana nani ba sut, bikaia pura mata inanka nani ra tawbia; man nani sut kwala siksa dimma, upla nani tâwa ba sin irbi lipni daukbia; upla ai luhpia kumi baman bri kan pruan mata ini ba baku ini yahwi kama, bara yuam tnata ba tahpla pali lui wabia.”

¹¹ Dawan kasak aisisa: “Kaiks, yua nani pat puramra aula: baha yua nani ra man nani tasbayam ra plun tiwan tara kabia, sakuna plun pali tiwan sanglangka apia kabia, lî diran trabilka sin apia, ban sakuna, Dawan bîla walaia sanglangka kabia.

¹² Upla nani ba kabu kum wina kabu wala kat, yahbra wina lalma kat, Dawan bîla smalkanka walaia pliki, tanis baman watauki kabia; sakuna pliki sâkbia apia.

¹³ Baha yua ra tiara painkira nani bara wahma karnakira nani ba sin, Dawan bîla walaia diranka mita, dring prui kabia.

¹⁴ Baha nani, Sameria uplika gâdka bahki nani ra luki tniwi swer taki aisi nani ba, witin nani wisa: ‘Dan gâdka ba kau raya sa’, bara: ‘Beerseba gâdka nani sin kau raya sa’. Baku aisi nani ba sut kauhbia, bara kli sin bubia apia.”