Emus 7 - DAWAN BÎLA AISKA

Tristrisia nani lilka kaikan ba

¹ Dawan, witin dîa daukaia kan ba mairikan, bara yang kaikri. King ai nasla disang ra, mâ nani mangkan ba dâki brin. Ningkara klisnika nani mangkan ba kainara, Dawan ba kaikri tristrisia nani paski kan,

² tristrisia nani ba bal insla aiska ba pih âpu dauki kan, bara yang wîri: —¡Dawan, Jekob kiamka nani saura daukan pâtka ba ban swih tiks! ¿Witin nani nisan sirpi bamna nahki muni nisan wala mapara bapi bubia ki?

³ Bamna Dawan kli ai kupia swapni daukan bara ai win: —¡Daukaia wîri ba baku daukamna apia!

Pauta klauhan lilka kaikan ba

⁴ Bara Dawan ba kli diara wala naku mairikan: Yang kaikri witin buan ba ra, pauta klauhan ba ni mahka lâ daukan. Bara kabu tihuka tara laya ba klang lawi âpu takan, bara tasba prumhni nani ba sin mahka angki tikuya kan.

⁵ Bara yang wîri: —¡Dawan, pliskam ban takasks! ¿Jekob kiamka nani maura lupia baman ba, nahki bapi buaia sip kabia ki?

⁶ Dawan kli ai kupia swapni daukan bara ai win: —Nahki daukri ba man kaikram, sakuna baku kli daukamna apia.

Utla playa wapni bapaia mangki kaiki kiwka ba lilka kaikanka

⁷ Dawan ba naha yang ra mairikan: Kaikri witin utla tnaya kutbanka wapni kum paskan ba purara uli bûi, ai mihta ra utla playa wapni bapaia mangki kaikaia kiwka ba bri kan.

⁸ Bara witin bui yang ra maikabi walan: —Emus, ¿man dîa kaikisma? Yang pana wîri: —Utla playa wapni bapaia mangki kaikaia kiwka kum kaikisna. Bara Dawan kli ai win: —Nanara lika, yang kli kupi swapni daukamna apia. Kaiks: upliki Israel luhpia nani warha takan ba, naha wapni mangkaia awa na ni mangki kaikamna ai daukanka nani ba.

⁹ Dawan ra mayunaia watla Aisak dukia nani ba sut slingban kabia, bara Israel tempelka nani ba sin sauhki tikan kabia. ¡Jeroboam taika nani mapara war aiklabaia sordka ba bukamna!

Amasías lika Emus mapara buisa

¹⁰ Amasías, Betel ra prîs aimaki kan ba, Israel kingka Jeroboam ra maisa paki wisa: “Israel tasbaya aiska ra, Emus king tara ba mampara warbanka nani daukisa; upla nani lukanka ba sut saura takisa, bara ban ai kainara aisi auya.

¹¹ Kan witin naku aisisa: ‘Jeroboam ba sord ni ikan kabia, bara Israel luhpia nani ba sut priski tasba wala ra brih wan kabia.’ ”

¹² Bara Amasías, Emus ra naku adarka yabi win: —¡Prapit, man dahra aisi wina iwaia lukisma kaka, Israel tasbaya wina taki was! ¡Juda tasbaya ra was!

¹³ Sakuna kli Betel ra bal dahra aisapara, kan naha pliska ba sika, king iwaika holikira sa, bara sin king tempelka aihwa pali sa.

¹⁴ Sakuna Emus pana Amasías ra naku win: —Yang sika prapit apia, bara sin lukras sna baku kaia. Yang lika sepad, daiwan nani aihwaki kakaira sna, kwah dusa unta ra pâwi nani ba mâ nani wahbi taukisna ba wina rayaki brisna.

¹⁵ Daiwan nani tilara watauki kapri, baha wina Dawan bui ai paiwi bara ai win: ‘Man lika Israel luhpia nani tilara was, witin nani tilara dahra aisas.’

¹⁶ Bamna Dawan aisin bîla dahra ba wals. Man wisma: ‘Israel luhpia nani mapara, Aisak kiamka nani mapara sin Dawan nina brih mâki dahra aisapara.’

¹⁷ Man baku wisma bamna, Dawan naku man ra aisisa: ‘Man mayam ba tawan yabalka bilara wapi ur taki tauki kabia, luhpiam nani ba aiklabaia sordka ni ikan kabia, tasbayam na sin idan nani bal ai tasbaya kulki bribia, man wînam tara sin upla wala nani tâski kulkan nani ba tasbaya ra pruma, bara Israel luhpia nani ai tasbaya ba wina laihura priski brih wan kabia.’