Emus 6 - DAWAN BÎLA AISKA

Israel slingban kabia dahra aisin ba

¹ ¡Saura pali kabia baha nani, Saion ra wark daukras bahki man bâra iwi nani ba! ¡Baha nani Sameria ra lukras kira iwi nani ba, saura pali kabia, tawan tara nani lalka, kau tara kulkan nani bri ba, baha nani ra Israel luhpia nani ba wih pliki ba!

² Man nani Calné tawanka bâk kaiki lui was, baha wina tawan tara Hamat bâk sin kaiki lui was; baha wina filisteo nani tawanka tara Gat ba sin wih kaiks. ¿Lukisma man nani ba kau pain sma, baha nani tawanka wal? ¿Man nani tawankam ba kau pain sa ki, baha nani tawanka ba wal?

³ Mai sauhki tikaia yua tara aula ba dukiara, man nani lukaia want apia sma, sakuna man nani mita sauhki tikanka tara ba aubi brih aulma sa.

⁴ Elepant napa ni paskan krikrika nani purara yapisma, wamtla bilara iwaika swapni nani paskan ba purara iwisma, Sîp lupia nani, bîp lupia batanira nani iki pi lilia daukisma;

⁵ Debit lika Dawan mayunaia lawana nani aiwani, mayunra binka sât dauki kan ba baku, man nani sin miusik pulaia dukia bra nani sât sât paskisma.

⁶ Kahmi tara ra wain laya laiki disma, batana laya kîa damni ba aimakisma. ¡Sakuna Josep tawanka slingwan kabia ba dukiara lika man nani sari briras!

⁷ Bamna priski brih waia uplika nani ba tilara, man nani tâ pali ra mai priski tasba wala ra mai brih wabia, man nani plun tara dauki pi lilia tara daukisma liliaka ba, man nani wina lui wabia.

⁸ Dawan ai nina ba mâki, witin swer taki aisin; Dawan Gâd karnika sut pali bri ba, witin sika naku kasak aisisa: “Jekob uplika nani aimayunka ba, yang misbara saura pali kaikisna; ai watla tara nani paskan ba, misbara kaikisna; bamna baha paskanka nani sut ba, witin nani ai waihla nani mihta ra mangkamni.”

⁹ Baha takbia ba ra, waitna matawalsip utla kumi bilara bâra kabia kaka, witin nani sut prubia.

¹⁰ Sibrin tara bâra kabia, pruan nani ba taika kum balbia, wîna tara ba bikaia alki bukbia ba ra, ai walka utla bilara tauki bâra wibia: “¿Kau wala kum bâra sa ki?” Bara witin pana wibia: “Apia.” Bara tâura bal aisi uplika ba wibia: “¡Sâp bas! ¡Dawan nina mâki sin aisapara!”

¹¹ Kan Dawan lâ daukbia utla tara bara sirpi nani ba sin sut slingbi tikaia.

¹² ¿Walpa tara nani ba purak, aras nani ba pain plapbia lukisma ki? ¿Kabu ra bîp wainhka nani ni, tasba baikbia ki? ¡Lâ wapni daukaia lâka ba, man nani bui puisin daukram! ¡Kasakka lâka daukaia ba sin, laya tahpla ra lakram!

¹³ Man nani diara bahki kum daukram, bara mamyuni liliam taki wisma: “Yang nani karniki tara brisna ba mita pura lui karnika alkisna.”

¹⁴ Bamna Israel luhpia nani, wals; Dawan karnika sut pali bri ba, naku kasak aisisa: “Nisan karna kum man nani mampara aiklabaia blikuna tasbayam ba briaia, yahbra tani Hamat wina, waupasa tani ra Arabá tingnika kat, ai mina ra mai taibi mai bribia.”