Emus 4 - DAWAN BÎLA AISKA

¹ Sameria mairka nani, Basán bîpka mairin batanira nani, naha dahra aisin bîla na wals, upla umpira nani ra raitka yabras taibi munisma, bara upla diara nitka bri nani ra saura pali munisma ba, mayam waitna nani ra adar yabisma wain laya diaia bri sal maikbia.

² Dawan Gâd swer takan ai holika lâka dukiara: “Yua nani man nani puramra aula, bara alhnika ni mai alki raski mai brih wabia, luhpiam nani ra lika inska alkaia kiulhka ni alki brih wabia.

³ Man nani tawan tnaya kutbanka ra unta daukan nani bâk, lainkam ra taki wama, bara Hermón ilka ra mai bri si dingkan kabia.” Dawan baku kasak aisisa.

Swira paski natka ra aisanka kum

⁴ “Man nani, Betel bara Guilgal ra was, saura dauki kapram ba, nanara kau saura dauki banhs, lâ krikanka nani kau ailal dauki bas Guilgal ra; titan bani daiwan iki angki puram suni bas, bara diara matawalsip wina mânka kum Dawan dukia ba sin, yu yumhpa bani bri bal.

⁵ Plawar ba sin îs mangkras brit dauki, Dawan ra tingki wiaia prisantka dauki bas; upla sut ra wih, aisi maisa paks, witin nani ai prisantka nani, ai kupia lâka yabaia ba dukiara, kan man nani baku dauki kaia lihkisma bamna.” Dawan baku kasak aisisa.

Israel klala brin kat sin, Dawan lâka ba sip lan takras

⁶ “Yang bui daukri sika, man nani tawankam tara sut ra plun wahwi kapram ba; yang bui daukri sika, tawankam sirpi nani sut ra plun âpu takan ba. ¡Baha sut daukri sakuna, man nani kli yang ra tawi balras!” Dawan baku kasak aisisa.

⁷ “Yang daukri sika, kati yumhpa namsla purara lî auhras kaia ba, kau mâ dâkras ba kainara, tawan tara kum purara baman yabri lî auhan, bara wala nani purara yabri auhras kan. Insla kum kum purara lî auhan, bara insla wala nani ba lika, lî âpu tâka mita srawi luan.

⁸ Tawan kum wina tawan wala ra upla nani ba lî pliki tauki kan, sakuna ai âuyapah lî aitani sakras kan ai diranka tikaia. Baha sut daukri sakuna, man nani lika yang ra kli tawi balras kapram.” Dawan baku kasak aisisa.

⁹ “Yang bui sika pâsa lapta wal krawi ba ni, bara siknis saura nani bliki klala maikri ba, namsla nani sut sin yabri srawan, tristrisia nani taki wainkam, kwah damni dusa olivkam nani pâwi kan sut pin ba. Baha sut daukri, sakuna man nani lika yang ra kli tawi balras kapram.” Dawan baku kasak aisisa.

¹⁰ “Idsip uplika nani purara siknis saura nani blikri kan ba baku, man nani puramra sin blikri; wahma nani ba war aiklabi prui tiwaia ba yang daukri, swiri aras nani ba waihla nani dawanka takan; kiamp nani ra yang mita yâri upla pruan bisbaika ba kiawalaia. Baha sut daukri, sakuna man nani lika yang ra kli tawi balras.” Dawan baku kasak aisisa.

¹¹ “Man nani ra yang bui sauhkanka saura kum ni sauhki mai tikri, sim Sodoma bara Gomora wal ra sauhki tikri ba baku; pauta klauhan kum pauta aswi ba tila wina sakan baku kan. Baha sut daukri, ¡sakuna man nani lika yang ra kli tawi balras!” Dawan baku kasak aisisa.

¹² “Bahamna Israel, man nani wals: baha nani ra klala yabri ba baku, yang, man nani wal sin daukaisna. ¡Bamna man nani ridi taks, Gâdkam aula ba wal prawaia!”

¹³ Dawan, il tara nani bara pâsa sin paski ba, witin dîa daukaia luki ba upla ra maisa paki ba, witin ingni ba wina tihmia tara dauki ba, witin tasba pîska kau purara nani ba wapi kaiki ba, Dawan, Gâd karnika aiska bri ba, baha sika ai nina sa.