Emus 3 - DAWAN BÎLA AISKA

Prapit nani daukaia warkka ba

¹ Israel luhpia nani, man nani wals Dawan naha bîla nani aisi wi ba, Idsip tawanka wina sakan uplika nani ra:

² “Upla kiamka sâtka nani tasba aiska ra bâra ba tila wina, man nani baman ra bâk mai saki mai briri sa. Baku bamna, man nani saurka nani daukram ba sut tâwan, klala maikaia kamna.”

³ Upla wâl asla wapi ba tânka, ai lukanka kumi takras, witin wal lukra kumi sa bamna.

⁴ Layan il nani tilara ba piua ra, daiwan kum alkaia ridi takan bamna; layan luhpia nani ba tasba unta ra ihbi lawi ba, witinka daiwan kum alkan bamna.

⁵ Daiwan tnawira kum tasba ra kauhbia sa kaka, baha ba tnawira alkaika bâra ba mita sika; daiwan alkaika ba, tasba wina pâlbia kaka, baha ba daiwan kum alkan ba mita sa.

⁶ War aiklabaia trumpit ba tawan bilara puhbia kaka, upla nani ba tâ iwi sirang man sa. Tawan ra diara saura kum taki ba ra, baha ba Dawan mita blikan sa sika.

⁷ Dawan ba diara kumi sin daukras sa, witin ai prapitka ra param sakras sa kaka.

⁸ Layan ba ihbisa kaka, ¿ya lika sibrin daukras sa ki? ¿Ya Dawan nina brih aisaras sa ki, witinka adar yabi kaka?

Sameria sauhki tikanka ba

⁹ Asdod bara Idsip tasbaya nani ra, lâ watla tara nani bâra ba bilara upla nani ba ra, naha bîla dahra na aisas, witin nani walbia: “Man nani Sameria ilka nani ra uli bal kaiks, nahki bahara lâ kat apia, warha baman iwi ba kaiks, bara unsaban lâka nani bahara uba pali dauki ba, baha mita upla nani pât wahwi ba.”

¹⁰ Dawan kasak aisisa: “Baha uplika nani ai watla tara pranakira bilara iwisa, sakuna wapni, lâ kat iwi kaia ba tânka briras; ai watla tara nani ba ra auhbi banhki brisa impliki brin dukia nani ni.”

¹¹ Baku bamna, Gâd naku aisisa: “Waihlam kum balbia, bara tasbayam na kir kutbi bribia, bara kan kahbaika pliskam ba krikbia bara wamtla tara nani bilara diara nani bâra ba sut saki brih wabia.”

¹² Dawan naku aisisa: “Sepad kum, layan bîla wina sîp kuhma wâl pan, apia kaka kiama tâ lupia pan aiklabi dakbi bri ba, baku sim natka ra, Israel luhpia nani Sameria tawanka ra ba, swakwan kabia; baha nani ai iwaika swapni tara purara aitniki ba, Damaskus ra.”

¹³ Dawan karnika sut pali bri ba, naku kasak aisisa: “Man nani wals bara Jekob watla uplika nani mapara witnis aisas;

¹⁴ kan Israel luhpia nani saurka daukan ba tâwan yang klala yabaia buamna bara Betel altarka nani sut ba sauhki tikamna; altarka ra aringka nani bri ba sin klakamna bara tasba ra kauhbia.

¹⁵ Kauhla bara piua lapta watla nani mâkan ba sut slingbamna; elepant napa ni paskan watla nani ba âpu daukamni, bara king watla tara nani sut sin sauhki tikamni.” Dawan baku kasak aisisa.