Emus 2 - DAWAN BÎLA AISKA

¹ Dawan naku aisisa: “Moab uplika nani saura ailal pali daukan; bamna yang bui witin nani ba sip klala yabras ban swimna apia; kan witin nani, Edom kingka dusa nani ba angkan, yamhpus man daukan ba kat.

² Witin nani baku daukan bamna, yang bui Moab uplika nani purara pauta klauhan blikamna, bara baha pauta klauhan ba mita Queriot tawanka ra wihta tara watla nani ba sut ambia. Bara upla kwâra nani aiklabi, trumpit puhbi bin tara dauki kabia ba tilara Moab uplika nani ba prui banhbia.

³ Witin nani ai tasbaya wina king tara ba tnaya ra saki ikamna; baku sin ai uplika tara kulkan nani ba.” Dawan baku aisisa.

⁴ Dawan naku aisisa: “Juda uplika nani saura ailal pali daukan, bamna yang bui witin nani ba sip klala yabras ban swimna apia; kan witin nani Dawan lâka ba bahki kulkan, Dawan ai lâka daukaia yan ba witin nani brih, daukras swin, kau ni aidul nani ra mayunan, witin nani ai aisika mayunan kata aidulka nani ra.

⁵ Witin nani baku daukan bamna, yang bui Juda tawanka purara pauta klauhan blikamna, bara baha pauta kauhan ba mita, Jerusalem tawanka ra wihta tara nani watla sut angkbia.”

Israel luhpia nani lâka daukan ba

⁶ Dawan naku aisisa: “Israel luhpia nani ba saura ailal pali daukan, bamna yang bui witin nani ba klala yabras ban swimna apia; upla kasakkira nani pât luha ba ra, lalah mana atkan wisa; upla umpira nani ra lika, sûs maya kum mana atkisa.

⁷ Upla umpira nani ra taibi, ai raitka wina mâyara batakisa; bawikira bara umpira nani raitka yabaia kata ba yabras. Luhpia waitna ba ai aisika wal sim baku dauki, yang nini sunu ba tâski sakisa.

⁸ Upla nani wina traska mana kwala dakbi brin kwalka nani ba palki, baha purara aitniki plun kahbi pih, ai gâdka bahki nani ra mayunisa, upla wina taibi muni dakbi brin lalahka wal atkisa, bara ai gâdka watla ra di banhwisa.

⁹ Âu, man nani ra yamni mai munaia tâwan, yang bui amorreo nani ba sut mamwan wina âpu daukri, kiamka kumi sin swiras, sut pali âpu daukatna, witin nani yalam dusa baku tara pali pâwan kan, karnika tara sin bri kan usupum dusa karnika ba baku, ban sakuna sut âpu pali daukri.

¹⁰ Yang bui Idsip tasbaya wina man nani mai sakri, mani 40 upla iwras tasbaya bâk mai brih tampahki kapri, witin nani tasbaya ba man nani ra maikaia dukiara.

¹¹ Israel luhpia nani: Man nani sip apia wima apia, man nani luhpiam nani tila wina kum kum ba prapit nani sakri, wala nani lika Nasariu takaia daukri.” Dawan baku aisisa.

¹² “Sakuna man nani lika Nasariu nani ra wain taibi muni yabram din, bara prapit nani ra sin wiram, yang nini ba dahra aisabia apia.

¹³ Baku daukram bamna, yang bui nanara tasba minam ni taibisma ba yabrika bin tara daukbia, sim karita kum plawar mâ banhki bri kan bin dauki ba baku.

¹⁴ Bara karna plapbia sin, sip swak takbia apia; karnakira pali ba sin, karnika âpu takbia, bara kau kupia karna ba sin, ai rayaka sip swaki sâkbia apia.

¹⁵ Pantamangka alki uplika nani ba sin sip bapi bubia apia; isti plapbia sin, ai rayaka sip swaki sâkbia apia, aras ra uli plapbia sin swak takras ban prubia.

¹⁶ Baha yua ra aiklaklabra kau karna nani ba sin, aiklabaia dukia nani alki bri ba sut lulki si plapbia.” Dawan baku kasak aisisa.