Emus 1 - DAWAN BÎLA AISKA

Tawan nani lamara bâra ba sauhki tikanka

¹ Naha sika Dawan bîla dahra, Sepad Emus sîp nani main kakaira, Tecoa tawanka ra brin ba, Israel ra naika takaia ba, tasba nikbras mani wâl ba kainara. Baha piua ra Ozías Juda Kingka aimaki kan, bara Jeroboam, Joás lupia ba, Israel kingka aimaki kan.

² Jerusalem, Saion ilka ba wina, Dawan ai bîla baikra bin tara alwani binka baku aisisa ba ra, tasba nani ra twi painkira pâwi ba srawisa, Carmelo ilka bahna ra twi nani ba sin sut lâwisa.

³ Dawan naku aisisa: “Damaskus nani ba saura ailal pali daukan, bamna yang, baha nani ba klala yabras ban swimna apia; kan witin nani, Galaad uplika nani ra saura pali muni ikan, rais unuh ra kapi baku rausauhkan.

⁴ Baha daukan ba tâka mita, king Hazael watla nani ba yang angkamna, bara king Ben-hadad watla nani ba sin ambia.

⁵ Damaskus tawanka getka nani ba, yang karniki wal bukutbamna, bara Bicat-avén ra king aimaki ba sauhki tikamna, Bet-edén ra wihta tara aimaki ba ra sin sauhkamna, bara Siria uplika nani ba alki, Quir tawanka ra brih wan kabia silak ra mangkaia.” Dawan naku aisisa.

⁶ Dawan naku aisisa: “Gaza uplika nani ba, saura ailal pali daukan, bamna yang, baha nani ba klala yabras swimna apia; kan witin nani mita tawan kum uplika nani aiska alki priski brih wan, bara Edom tawanka ra bri si alba kaia dukiara atkan wan bamna.

⁷ Witin nani baku daukan bamna, yang Gaza tawanka walpaya kutbanka ba purara pauta klauhan blikamna; bara baha pata klauhan ba wihta tara watla nani ba sut angkbia.

⁸ Asdod tawanka ra king aimaki ba, yang bui sauhki tikamna, baku sin Ascalón wihtka tawanka ba sauhkamna. Bara Ecrón uplika nani mapara sin karniki aiska wal dimi wamna, tila nani bâra ba sut pruan kabia.” Dawan baku aisisa.

⁹ Dawan naku aisisa: “Tiro uplika nani ba saura ailal pali daukan, bamna yang bui witin nani ba, sip klala yabras ban swimna apia; kan witin nani mita tawan kum uplika nani sut alki priski, Edom tawanka ra bri si, alba kaia atkan, witin nani ai muihni nani aikuki lâ kum dauki bri kan ba.

¹⁰ Witin nani baku daukan bamna, Tiro tawanka walpaya kutbanka ba purara yang pauta klauhan blikamna, bara wihta tara nani watla ba sut ambia.”

¹¹ Dawan naku aisisa: “Edom uplika nani ba saura ailal pali daukan, bamna yang, witin nani ba sip klala yabras ban swimna apia; kan witin nani aiklabaia sordka ai mihta ra alki brih, ai kupia lukras kira ai muihni Israel luhpia nani ra nina blikan. Ai kupia baiwanka ba, witin nani purara brih lui wan, witin nani misbara kaikan lâka ba tnata âpu pali kata.

¹² Witin nani baku daukan bamna, yang Temán tawanka uplika nani purara pauta klauhan blikamna, bara Bosrá tawanka ra, wihta tara nani watla sut ba aman kabia.”

¹³ Dawan naku aisisa: “Amón uplika nani saura ailal pali daukan; bamna yang bui witin ba sip klala yabras swimna apia, kan witin nani ai tasbaya piarkika ba kau kanra kitbi brih waia dukiara Galaad tawanka ra mairin kwihra nani bâra kan ba biara klaki baikan.

¹⁴ Witin nani baku daukan bamna, yang bui Rabá tawanka purara pauta klauhan blikamna; bara wihta tara watla nani ba ambia, war aiklabi inanka nani tilara bara lî, imyula karna nani puli ba baku tilara sin.

¹⁵ Bara witin nani ai kingka bri ba, ai wihtka tara nani aikuki asla tawan ba wina taki alba lâka ra wabia.” Dawan baku aisisa.