Daniel 9 - DAWAN BÎLA AISKA

Daniel ai uplika nani dukiara ai pura sunra daukan ba

¹ “Darío, Asuero luhpia Media kiamka ba, witin Caldea nani tasbaya ra king aimakan.

² Pas mani witin king aimaki kan ba piua ra, yang Daniel, prapit Jirimaya wauhkataya aisi kaiki tânka pliki kapri, baha 70 mani Jerusalem sauhki tikanka piua tnata alki luan kabia ba, Dawan bui prapit ra win kan ba baku.

³ Bamna puri sunra bara makabanki ba sut, Dawan wan Gâdka ra aisari, plun piras, kwala almuk saura dimi, yamhpus ra sin iwi.

⁴ Dawan Gâdki ra puri sunri, bara naha dahra na wîri: ‘Dawan, man lika Gâd karnakira pali sma ba, piua bani man dîa aisisma ba daukisma, bara man lamtwanka lâka tânka ba pliki kaikisma ya man ra latwan mai kaikisa, bara lâmka bîla nani kat sin dauki ba:

⁵ yang nani saura yâri, watawi sin dauki banhri, yang nani iwi banhwi katna man ra lukras pali, yang nani bui man lâmka nani bara bapanka lâka nani ba tnaya ra lakri.

⁶ Yang nani bui man nampakan prapit nani ra kulkras, baha nani man ninam brih aisi kan ba king nani ra, tâ uplika nani ra, wan almukka nani ra bara Israel luhpia nani sut ra sin.

⁷ Man lika Dawan kasakkira sma, sakuna yang nani Ju nani ba naiwa wan swira tara sa, baha nani Jerusalem ra iwi ba Israel luhpia nani sut sin, baha nani wan lamara ba bara laihura ba sin, witin nani man bîlam kulkras kan ba tâwan plis plis ra yakabram sa.

⁸ Bamna Dawan, yang nani na wan kingka, wan tâ uplika nani bara wan almukka nani kan ba baku sna, yang nani swiri ai daukisa, kan man mampara saura dauki banhri ba mita.

⁹ Sakuna man lika, wan Gâdka sma, bara man mihtam ra sa umpira kaikan lâka bara ban swin tikaia lâka ba sin. Yang nani lika man mampara babura takri sa,

¹⁰ yang nani lika man bîlam walras takri, Dawan wan Gâdka, yang nani bui man smalkankam nampakan nani bara prapitkam nani bâk wankram ba alki briras kapri.

¹¹ Israel luhpia nani sut man bîlam kulkras atia takan, bara dîa lâ mangkram ba sin wali daukaia apia win; baha mita naha lahtubanka na wan purara kauhan, aikuki swer daukan ba nampakan Moses lâ wauhkataya ra ulban ba kat, ban yang nani lika man mampara saura dauki banhri.

¹² Bamna man klala tara yang nani purira blikram, bîlam aisaram ba kat dauki tnata alkram sa, yang nani ra bara wan tasbaya wihtka nani ra sin; bamna, Jerusalem purara klala balan ba baku kau wala âpu sa naha tasba purara.

¹³ Naha klalka yang nani purira balan na sut lika, Moses lâ wauhkataya ra ulban ba kat sa, sakuna yang nani bui mai plikras kapri, Dawan wan Gâdka sma ba, yang nani saurki nani ba sin kau lulkras, kasakkam tânka ba nina sin bliki banhras sna.

¹⁴ Baha mita, Dawan, man naha klalka nani saki yang nani purira blikram, kan man ba sika Dawan wan Gâdka sma ba, diara sut daukisma ba tilara man ba ban kasak sma, yang nani bui man ra mai walan wan daukras kan.

¹⁵ ‘Dawan wan Gâdka, man karnikam tara ba wan marikram sa, Idsip wina uplikam nani sakram ba piua ra, baku daukram ba mita tasba aiska ra ninam ba plapi tawan sa, baha yua ra bara naiwa yua ra sin, ban sakuna yang nani saura bara watawi sin dauki banhri.

¹⁶ Dawan, yang nani kaikisna man ba kupiam yamnikira pali sma. Bamna mamkabisna kupiam wilin kaka lawankam ba Jerusalem pura wina sâks, kan baha ba man tawankam sa, bara man ilkam holikira sa. Upla sât wala nani wan tawanka tnaya ra iwi nani ba kiki banhwisa Jerusalem ba dukiara, bara uplikam nani ba dukiara sin, yang nani bara wan almukka nani wal saurki ba mita.

¹⁷ Yang nani Gâdki, man dukiam dadaukra pura sunra bara makabanka na wals, man ninam ba tâwan tawi kaiki ban latwan kaiks, nahki man wamtla kata ba sari pali lâka ra tawan ba.

¹⁸ Gâdki, kiamam ba laki yang ra ai wals, nahki rau wan sauhkan na kaiks, bara baha tawanka ra man ninam mâki wini kan ba, yang nani bui man ra mamkabras yang nani kasakki ba dukiara, sakuna man kupiam swapnika ba tâka mita.

¹⁹ ¡Dawan, Dawan! ¡Yang nani ra wali, wan pâtka ba ban swih tiks! ¡Dawan, kiamam ba yang nani ra laki wali bara bal hilp wan muns! ¡Gâdki, man ninam ba tâwan, tawankam ba dukiara bara uplikam nani dukiara sin, man ninam mâki wisa, bamna kau takaskpara!’

Wik nani 70 alkbia ra, dîa takaia dahra aisin ba

²⁰ “Yang ban puri suni kapri bara saurki nani dukiara aisi katna, upliki Israel luhpia nani dukiara sin, Dawan Gâdki ilka holikira ba dukiara makabi katna.

²¹ Yang kau puri suni kapri piua ra, Gabriel, witinka kainara yang diara aihka kaikatna ba, sakripais Dawan ra yaia awarka lama pali kata tutnika.

²² Bara ai win: ‘Daniel, yang balri naha diara nani tânka na maikrika tânka brima dukiara.

²³ Man mahka puram sunatma ba piua wina, Gâd bui man ra pat pana mai aisin sa. Yang balri na param mai wiaia, kan Gâd ba man ra uya pali latwan mai kaikisa. Baku bamna, nanara naha diara nani ra aman pali wali bas, baku mika man diara aihka kaikram ba tânka brima:

²⁴ ‘Wik nani 70 ba, man uplikam nani bara tawankam holikira ba purak luaia sa, watawika lâka bara saurka lâka wal ba tnata alkan kabia dukiara, saurka ban swin tikaia lâka ba alkaia, bara kasakka lâka ba ban kaia ra bapan kaia, baku mika diara aihka kaikan lâka bara dahra aisinka ba sut tnata alkan kabia dukiara.

²⁵ Naha na kasak pali tânka brin kaia sa: Baha adar maikbia ba wina, kli tawi aidrubi balbia bara Jerusalem ba kli paskan kabia, baha wan wihtka tara ba balbia ba kat, wik nani matlalkahbi luan kaia sa, bara yabal nani Jerusalem tawan kutbanka nani ba kli raya paskan kabia, sakuna 62 wik lubia ra, sari lâka tara piua nani kabia.

²⁶ Wik 62 lubia ningkara, wan wihtka yamni muni mangkan matawalsip ba ikan kabia, Jerusalem bara Gâd watla ba sauhki tikan kabia, king kum balaia uplika nani bui pat pali piua tnata ba aimakbia, lisamra tara aula ba baku, sakuna war ba lika ban aiklabi kabia, sauhki tikaia lâka ba sin, ban tnata alkbia ba kat.

²⁷ Kau wik kum ba bilka ra, upla ailal aikuki lâ kum daukbia, sakuna wik kum ba bilka ra sakripais daukaia ba bara diara mana luha yaia lâka ba, kli daukan kabia apia wibia, tempel lâka ba sauhkanka tara bara diara saura daukan kabia, diara angki daukaia pliska mawan ba kat, sauhki tikaia piua ba aimakbia bara Gâd mita lâ lui sasauhkra ba purara kauhbia ba kat.’ ”