Daniel 8 - DAWAN BÎLA AISKA

Diara aihka kaikan ba, sîp wainhka bara guts wainhka wal dukiara

¹ “Belsasar mani yumhpa king aimaki kan piua ra, yang Daniel diara aihka wala kaikri pat kainara kaikatna ba ningkara.

² Diara aihka ba kaiki kapri piua ra, Susa kan kahbaika pliska ra kapri baku daira walri, baha ba sika Elam tasbaya ba lalka sa, Ulai awalka un nani ra.

³ Laih pali ba wina kaikri, sîp wainhka kumi awala un ra kan, aringka yari wâl bri kan, sakuna tisku kan aringka kum ba kau yari pali takan.

⁴ Kaikri sîp wainhka ba ai aringka ni muna tani ra pruki kan, yahbra tani ra bara muna tani ra sin, daiwan kumi sin witin mawanra buaia ba âpu kata, ai karnika ba wina upla kumi sin sip swak takras kan. Ai kupia lâka kat dauki kan, bara piua bani kau karna taki kata.

⁵ “Diara aihka kaikri ba dukiara kau luki kapri taim, muna tani wina guts wainhka kumi aula kan, karna pali plapi kan, tasba ra sin kangbras kata. Naha gutska na aringka tara kumi bri kan ai nakra nani ba tilara.

⁶ Sîp wainhka ba lamara wan, baha sîpka sika awala un ra kan kaikri bara ai aringka karna pali wauhi kan ba,

⁷ bara aringka wâl ba sut daikan, sîp ba karnika âpu pali takan kata witin ba mapara buaia. Bara guts ba bui sîp ba tasba ra bataki ai mina ni taiban, upla kumi bui sin swaki sakras kata.

⁸ “Bara guts wainhka ba piua bani kau karnakira taki kan, sakuna piua bani kau karnakira taki kan ba piua kat, ai aringka tara ba kriwan, bara baha watlika ra aringka wala walhwal pâwi bal takan, bara aringka tâ walhwal ba pâsa mapa walhwal ra tawan kata.

⁹ Aringka nani kumika ba wina aringka sirpi kum pâwi bal taki, tara pali pâwan, muna tani ra, lalma ra bara Tasba Painkira ba tani ra sin.

¹⁰ Tara pali pâwan ba mita, kasbrika purara war aiklaklabra nani ba kat uli wan, slilma nani ba wina tila bataki, ai mina ni taiban,

¹¹ bara ban sin war aiklaklabra lalka ba wal kau tara takan, witin yu bani sakripais dauki kan watla kata ba dakban, bara ai gâdka mayuni kan ba tâski daukan.

¹² Ai lukraska lâka ba mita, war aiklaklabrika nani bara sakripais daukaia ba wal mihta ra mangkan, kasakka lâka ba tasba ni yakaban. Dîa daukaia lukan ba kat daukan, bara yamni sin takan.

¹³ “Baha ningkara walri insal kum aisi kan, bara insal wala kan ba ra makabi walan: ‘¿Ahkia kat tnata alkan kabia ki, naha yu bani sakripais daukaia altar ra daukri ba, yawan kaiki na? ¿Naha saurka na ahkia kat kabia, Gâd wal aisaia watla bara kristian nani sin mihta ra mangkan ai mina ni taibi ba?’

¹⁴ Bara makabanka ba dukiara naku win: ‘Tutni nani bara titan nani 2,300 kat. Baha ningkara, Dawan wal aisaia watla ba kli klin daukan kabia.’

¹⁵ “Yang Daniel, naha diara aihka kaikri ba tânka pliki kaiki kapri ba ra, waitna kum lilka maiwanra bal takan,

¹⁶ bara upla bîla baikra kumi walri Ulai awalka ba wina, bîla baikra ba naku aisi kan: ‘Gabriel, man naha waitnika ra diara aihka kaikan tânka ba wis.’

¹⁷ “Bara witin ba laimara balan bara yang tâ iwan takri, bara yang bawri maiwan ba tasba kat bri si prakri, sakuna witin bui ai win: ‘Upla luhpia waitna, luki bas naha diara aihka kaikram ba lika tnata yua tânka sa.’

¹⁸ “Witin kauhi aisi kan bara bla baku ai alkan tasba kat kauhi prawi kapri, witin bui ai kangban bara kupi krawan buri,

¹⁹ bara ai win: ‘Yang mai wiaisna, Gâd lawanka ba tnata alkbia piua ra dîa takaia sip ba. Man diara aihka kaikram ba lika, tnata yua dukiara sa.

²⁰ ‘Sîp wainhka aringka wâl bri kan kaikram ba sika Media bara Persia wal kingka nani tânka ba,

²¹ Guts ba lika Grik tasbaya kingka, bara aringka tara kum nakra nani tilara ba lika pas kingka dukiara sa.

²² Aringka pas ba daikan ningkara aringka walhwal ba sika naha nisanka na wina king walhwal bal takbia, sakuna baha pas kingka karnika ba wina apia sa.

²³ ‘Naha kingka lâka nani tnata alkbia ba ra, saurka nani ba ni âuya mâira lâka ra karnika ba alki bribia.

²⁴ Karnakira pali takbia, sakuna witin pali ai karnika ni lika apia, uya pali sauhki tikan kabia, bara diara sut daukbia ba yamni takbia. Waitna karnakira nani ba âpu daukbia, baku sin Gâd uplika nani ailal ra.

²⁵ Ai âuya mâira lâka bara ai kuninka lâka ba mita pura luan lâka bribia, praut lâka ni aibanhwan takbia, upla ailal witin ra kasak luki ba sut rayaka tikan kabia, king nani kingka luhpia mapara bubia, sakuna witinka ba bui âpu daukan kabia.

²⁶ ‘Diara aihka kaikram ba tutni bara titan wal tânka ba pat param mamrikan, bara baha ba kasak sa; sakuna man lika diara aisaras sâp katma, kan baha ba piua ailal lubia bara tnata alkan kabia.’

²⁷ “Yang Daniel, daihra walri karnika âpu baku kapri, bara yu ailal siknis kapri. Baha ningkara mahka buri bara king dukia daukaia kapri ba mahka daukri. Sakuna kupi ra uya turban pali bri katna, baha diara aihka kaikri ba dukiara, kan baha sip tânka ba briras kapri.