Daniel 7 - DAWAN BÎLA AISKA

Daiwan saura tara walhwal lilka kaikan ba

¹ Belsasar ba Babilon ra pas mani king aimakan ba piua ra, Daniel yaprisauhkan ra diara aihka kum kaikan. Yapan wina ai kupia krawan ba ra, diara aihka nani ai yaprika ra kaikan ba ulban, naha sika ulban ba:

² “Yang yapriki ra kaiki kapri pâsa mapa walhwal ba wina krawi kan, bara kabu laya tara ba klahbi kan.

³ Tisku kan, kabu wina daiwan tara walhwal uli balan, kumi bani ba sât aihka kan.

⁴ Pas ba layan baku kan, sakuna ai tnawa nani bri kan yakal baku. Kau ban kaiki kapri ba ra, ai tnawa nani ba daikan, bara ban tasba wina yan buan; mina tani ba upla baku kan, bara kupia lukra ba upla baku kata.

⁵ “Wâlka ba lika wingku baku kan, tnaya kumi ba kau purara bukan kata, tnaya mina nani yumhpa bri kan ai bîla ba walri wi kan ba: ‘¡Man bui wînam nani sut pis, dîa sip sma ba kat!’

⁶ “Yumhpika ba lika limi bulni baku kan, ai nina tani ra tnawa walhwal bri kan, bara kaikri lal sin walhwal bri kan bara karna kaia lâka ba yabi kan.

⁷ “Daiwan saura tara walhwalka kaikri ba lika saura sibrinkira pali kata, karnakira pali kata. Ai napa nani ba ayan baku bri kata, sut ra pi âpu sin dauki kan, kau tâka ba ai mina ni taibi kan. Baha daiwra ba ai lal ra aringka matawalsip bri kan.

⁸ “Kau yang aringka nani ra kaiki kapri, aringka nani tila ba wina aringka sirpi kumi urhwi takan, aringka nani ba wina yumhpa daiki sakan kata wala bal takuya ba dukiara, baha ba upla nakra nani baku bri kan, bara ai bîla ni diara tara nani aisi kan.

Gâd lâ daukaia ba

⁹ “Ban kaiki kapri, king iwaika nani bri si mangki swin ba kat, bara almuk kumi wih iwan. Ai prâka ba wahmuk pinhka baku kan, ai tâwa ba sîp taya tâski âpu ba baku kan, ai king iwaika bara wilwaika ba pauta klauhan ba baku kan,

¹⁰ bara ai mawan ba wina pauta klauhan awalka baku bal taki kan, tausin nani ailal bui ai dukia dauki kan, milian nani ailal ba, witin mawanra bûi banhwi kan, lâ iwaika ra iwi ba aidrubanka ba mahka tâ krikan, bara wauhkataya nani ba kwâkan.

¹¹ “Bamna yang ban kaiki kapri, aringka sirpi ba ai bîla saki diara tara nani aisi kan ba mita, ban kaiki kapri, daiwra saura ba ikan, bara ai wîna ba pîs pîs ra dauki pauta ra mangkan amaia.

¹² Daiwan saura wala wâl ba wina lika karnika ba sakan kata, sakuna ikras ban swin raya kaia ai piua aimakbia ba kat.

¹³ “Tihmia ra yang naha diara aihka na ban kaiki kapri, bara tisku kan: “Kaikri, kasbrika nani tilara upla kum aula kan, upla luhpia waitna talia kan. Witin lika Almuk bâra kan ba kat wan, bara yan witin ai lamara wan.

¹⁴ Bara witin ra yan karnika, prana ba bara king lâka ba sin, bara upla sâtka bani ba sut, bîla sât sât aisi ba sut ra sin yan dukia dauki kan. Ai karnika ba ban kaia ra sa, ai kingka lâka ba sauhki tikan kabia apia.

¹⁵ “Bara yang, Daniel sibrin lâka ba bui puri lui kata, diara nani kaikri ba dukiara kupi ra turban ai muni kata.

¹⁶ Bahara ai mina ra bûi kan ba kum lamara wari, bara makabi walri baha diara nani ba tânka wirâ ai wibia, witin âu takan ai wiaia, bara ai win:

¹⁷ ‘Baha daiwan tara walhwal ba sika tasba kingka tara walhwal naha tasba karnika alkbia ba.

¹⁸ Sakuna baha ningkara, king lâka Gâd Laih Purara iwi ba uplika nani mihta ra mangkan kabia, bara ai dukia kabia ban kaia ra.’

¹⁹ “Yang bui daiwan tara walhwal ba kau tânka brin ai dauki kata, kan baha kau sât aihka pali kata wala nani sut ba wal, kan ai mawan ba saura pali kata, ai napa nani ba ayan kata, ai asmala nani ba bras kata, sut ra pi kan bara pîs ra baman dauki kan, kau tâka ba ai mina ni taibi kan.

²⁰ Baku sin tânka briaia brin ai dauki kan aringka matawalsip bri kan ba; bara aringka sirpi ba nakra nani bri kan, bara diara tara nani aisi kan, ban kaikan kata aringka wala nani sut ba wal kau tara baku kan, bara baha ba wala watlika yaia dukiara aringka yumhpa sin kauhan kata.

²¹ Bara kaikri baha aringka ba, Gâd uplika nani mapara aiklabi kan sin pura lui kata;

²² Almuk ba balan ba ra, kasakka lâka kat Gâd Laih Purara iwi ba uplika nani lâka ba daukan, bamna piua ba aimakan kata Gâd uplika nani ba king tasbaya ba alki briaia.

²³ Bara win: ‘Daiwan tara walhwalka ba sika king tasbaya walhwal naha tasba ra kabia ba, bara wala nani sut wal kau sât aihka pali sa, bara tasba aiska ba pibia, ai mina ni taibia bara sin langkbia.

²⁴ Aringka matawalsip ba sika, king matawalsip baha king tasbaya ra king aimakbia ba, ningkara wala kumi uli bal karnika ba alki bribia, bara baha lika sât aihka kabia wala nani ba wal, witin bui king nani yumhpa ra batakan kabia.

²⁵ Gâd Laih Purara iwi ba swira dauki kabia, bara uplika nani ra sin âpu dauki kabia, ban trai munbia Gâd lâka ba lakaia, baku sin Gâd lilia yua tara daukaia ba, Gâd uplika nani ba ai karnika mununhtara kabia mani yumhpa pura bakriki.

²⁶ Sakuna lâ wihtka ba, yua tara lâ daukan kabia, bara ai karnika sakan kabia, bara âpu pali daukan kabia.

²⁷ King lâka, karnika bara prana lâka naha tasba aiska kingka lâka ba sut Gâd Laih Purara iwi ba uplika nani ra yan kabia, ai king lâka ba ban kaia ra ban kabia sa, naha tasba uplika nani sut bui ai dukia dauki kabia, bîla sin wali kabia.’

²⁸ “Naha kat bîla nani ba prakisa. Bara yang Daniel kupi uya pali turban kata, ban sin maiwan ba pihni pali takri kata, sakuna naha diara kaikri ba dukiara upla kumi ra sin wiras kupi ra ban bri katna.”