Daniel 6 - DAWAN BÎLA AISKA

Daniel layan nani watla ra

¹ King Darío ba aitani lukan ai kingka tasbaya ra tâ briaia uplika nani 120 mangkaia, baha nani bui ai king tasbaya tâ bri kabia dukiara.

² Baha nani ba purara pura kakaira yumhpa mangkan, baha nani bui wihta nani mangkan nani ba purara aihwaki kaiki kaia, baku mika king mapara diara watawi kumi sin takbia apia dukiara. Pura kakaira nani yumhpa ba wina kumika ba Daniel kata.

³ Daniel ra sika upla sut bui aitani kulkan kata pura kakaira wala nani bara tasba pîska bani wihtka nani sut ba purkara kaia, kan witin ba sip pali kan ba mita. Bara king bui sin ai tasbaya aiska lalka mangkaia lukan.

⁴ Bamna pura kakaira nani bara wihta nani bui yabal kum plikan Daniel ba dahra kwahkaia, baha king tasbaya lâka kulkanka ba wal, ban sakuna Daniel ba waitna yamni kan ba mita, witin ra watawanka kumi sin sakras kan, baha mita dahra kwahkaia dukia diara kumi sin sip sakras kan.

⁵ Ban sakuna, witin nani ai kupia ra luki si, aisi kaiki banhwan: “Yawan diara kumi sin sâkbia apia Daniel dahra kwahkaia, diara kumi wal lika, ai Dawanka lâka ba wal kaka lika sip kabia.”

⁶ Baku bamna, pura kakaira nani bara wihta nani ba sut aitani lukan, baha lukanka wal king Darío ra wih aisaia, bara witin nani king mawanra wih bûi naku aisi banhwan: —¡King ba ban raya kabia piua bani ra!

⁷ Baha kingka tasbaya wihtka nani ba sut asla takanka kumi brin, baha asla takanka ra lâ kumi dauki banhwan, yu 30 ba kat, upla kumi sin ai gâdka ra sapa, upla ra sapa sin ai pura sunan kaia apia, king ra baman lika, ya naha bîla na kulkras kabia kaka, layan nani watla ra lulkan kabia.

⁸ Baku bamna, king tara, naha lâka na aitani kulki ninam uls, naha lâka na slingban kabia apia dukiara. Media bara Persia wal lâka ba kat dauks, lâka na krikan kabia apia dukiara.

⁹ Bamna king Darío naha lâka daukan na yamni kulkan, bara ai nina sin ulbi mangkan.

¹⁰ Daniel walan baha lâka ba ulbi daukan, witin ai watla ra wih ai yapaika windarka ba sakan, baha windarka ba Jerusalem tani ra kan, bamna witin ai lula kriki Gâd ra ai pura suni mayuni kan, naha na witin dauki kan yu bani aima yumhpa, baku witin dauki kata piua bani.

¹¹ Bamna baha waitnika nani asla taki, Daniel watla ra wih dimi banhwan, bara kaiki banhwan Daniel ai lula kriki, Gâd ra ai pura suni mayuni kan ba.

¹² Ningkara witin nani king ra wan lâ mangkan ba dukiara aisaia, bara aisi banhwan: —King, man lâ kumi dauki wan maisa pakram, bara baha lâka ba naku daukan sa: ani uplika naha yu 30 na ai gâdka ra sapa, yaura sapa ai pura sunbia ba, king ra lika apia, baha uplika ba layan nani watla ra lulkan kabia. ¿Baha ba kasak sa apia? King ba bui pana win: —Âu, baku pali sa, bara baha lâka ba daukan kaia sa, Media bara Persia wal lâka ba kat, lâka ba lakan kabia apia.

¹³ Bamna witin nani ban aisi, win: —Daniel lika, priski Juda wina brih balan ba tila wina kumika sa, witin ba man ra king mai kulkras sa, man lâ mangkram ba sin kulkras, witin yu bani aima yumhpa ban ai pura sunisa.

¹⁴ King naha walan ba ra sari pali takan, bara yabal plikan Daniel ba swaki sakaia, ban yu dimaia kat dîa sip ba kat trai munan,

¹⁵ sakuna baha waitnika nani kli king ra wih, naku win: —King, man kasak pali kaikisma, Media uplika nani bara Persia uplika nani lâka ra diara kum mapara aisisa kaka, apia kaka lâ kumi ra king ai nina ulbi mangkan ba, sip apia sa krikaia.

¹⁶ Bamna king bui win, Daniel ba bri sal layan nani watla ra lulkan kabia. Sakuna kau layan nani watla ra lulkras kan ba ra, king bui Daniel ra win: —¡Gâdkam, man witinka dukia kasakka tânka ra daukisma ba mita, swaki mai sâkbia!

¹⁷ Daniel layan nani watla ra kan wal baku, walpa kumi bri sal layan watla ba pura prakan, bara king ai sîlka ba ni prakan, bara ai tasbaya wihtka tara nani sîlka ba sin prakan, baku mika Daniel ra takan tânka ba ban swin kaia apia ba mata.

¹⁸ Baha ningkara king mahka wan ai watla ra, bara plun sin piras ai krikrika ra aitnikan, miusik kangbaia dukia nani sâtka kumi sin yan ai mawanra brih balras kan, baha tihmika aiska king ba yapras kan.

¹⁹ Titan pali ra king ba buan, bara pat pali layan nani watla ra wan.

²⁰ Bara layan nani watla ba lamara auya kan ba ra, king ba sarikira wal ai bîla saki Daniel ra wini, win: —Daniel, Gâd rayakira dukia dadaukra sma ba, ¿baha Gâdka kasak tânka ra dukia daukisma ba, layan nani wina swaki mai sakan sa ki?

²¹ Bara Daniel bui pana win: —¡King piua bani ban raya kama ba!

²² Yang Gâdki bui ai insalka blikan, bara layan nani bîla ba prakan yang ra dîa kra ai munbia sîa, kan Gâd kaikisa yang na pâtkas sna, bara sin, king, man mampara sin saura kumi sin daukras sna.

²³ Bamna king ba lilia pali takan, bara win Daniel ba layan nani watla wina sâkbia. Witin nani sakan, bara kaikan Daniel wîna ra insauhkan lupia kumi sin âpu kata, kan witin ai Gâdka ra kasak luki kan ba mita.

²⁴ Baha ningkara, king bui win Daniel dahra kwahkan waitnika nani ba wih brih balbia, ai maya nani, ai luhpia nani aikuki layan nani watla ra lulkan, baha nani ba kau tasba ra iwras kan taim, layan nani ba mita alki drusbi pin.

²⁵ Bamna king Darío bui upla nani ra, nisan sâtka bani ra, bara bîla sât sât aisi ba sut ra ulbi naku win: “Kupia kumi lâka ba manis man nani ra kabia bara pâwanka ba sin,

²⁶ bara lâ mangki maisa pakisna, yang kingki tasbaya ra upla nani sut Daniel Gâdka ra bawan kabia, bara kulkan kabia sin. “Kan witin lika Gâd rayakira sa, bara witin ba ban kaia ra sa, ai king lâka ba sauhki tikan kabia apia, ai karnika ba sin tnata âpu sa.

²⁷ Witin ba swaki sasakra bara dakbi sasakra sa, sain aihkakira dadaukra sa, kasbrika purara naha tasba ra sin witin bui Daniel ba swaki sakan, layan nani asmala nani ba wina sin.”

²⁸ Daniel ba king Darío tasbaya ra ban kulkan lâka ba alki kata, bara king Ciro Persia kingka aimakan ba piua ra sin.