Daniel 5 - DAWAN BÎLA AISKA

Utla tnaya ra ulbanka ba

¹ Babilon kingka Belsasar, witin pata tara kum dauki baha kuntri wihtka tara nani 1,000 paiwan. Plun ba pi kan piua ra, king bara paiwan uplika nani ba wal wain uya pali dih banhwan kan.

² Wain ba bui king Belsasar ra munan, ai aisika Nabucodonosor Jerusalem ra Gâd watla ba wina gul bara silbar kapka tara bara sirpi nani brih balan ba, win wih brih balbia.

³ Bamna kapka tara bara sirpi nani ba wih bri balan, bara baha kapka nani ra wain dih banhwan, king, ai maya nani, ai mairka nani bara paiwan uplika nani ba sut aikuki.

⁴ Sut ba wain dih ai aidul nani ra mayuni banhwan, baha dawanka nani ba paski daukan kan gul, silbar, bras, ayan, dus bara walpa wal.

⁵ Baha pali piua kat upla mihta kum bal takan, kiandil ami kan ba ingnika ra, bara mihta tâ ba mahka ulbi kan, baha aidrubaia watla tnaya pihni ba ra. King baha mihta ulbi kan ba kaikan ba ra,

⁶ sibrin mita mawan ba pihni takan kata, bara wîna aiska ba tatatwi kan.

⁷ Ningkara ai bîla baikra tara winan, diara kakaira nani, sins lâka kakaira nani, bara slilma tânka plaplikra nani Babilon ra banhwi ba sut paiwaia, bara witin nani ra win: —Bahara ulban ba ya aisi kaiki bara tânka saki ai wibia ba, kwalka balianta ba yaka dimbia, ai nana ra gul ni paskan sînka kum bri kabia bara yang, king aimakisna ba iwaika ra, karnika yumhpika ba witin alki kabia.

⁸ Sinskira nani sut aidrubaia watla ra balan, sakuna upla kumi sin baha ulbanka ba sip aisi kaikras kan, bamna tânka sin sip briras kan king ra wiaia.

⁹ Bamna king Belsasar sibrin pali takan ba mita, ai mawan ba pihni pali takan. Bara king uplika tara nani bâra kan ba dîa daukaia sapa sin tânka briras kata.

¹⁰ Bamna king yaptika kwin ba, ai luhpia king winanka ba mita, bara king uplika tara nani baha paiwanka ra banhwi kan ba tâka mita sin, witin pata tara watla ra dimi wih, naku win: —¡King ba ban raya kabia! Kupiam uya turban yarka takbiara, mamwan sin ban pihni pali takbiara,

¹¹ Man kingkam tasbaya ra waitna kumi bâra sa, Gâd holikira spiritka ba witin wal sa. Bamna man aisikam king aimaki kan piua ra, baha waitnika ba bui marikan kata nahki witin ai sinska lâka tânka ba, witin ba sinskira, diara tânka kakaira pali sa, dawan nani ba baku. Baha mita, man aisikam king Nabucodonosor, baha waitnika sinskira nani, sins lâka kakaira nani, bara slilma tânka plaplikra nani, baha tasbaya ra ba sut lalka mangkan kata.

¹² Daniel ba king mita Beltsasar mâkan ba, witin sika spirit aihka tara kum bri kan, diara tânka kaikaia lâka, sins lâka sin bri kan, yaprisauhkan nani tânka kaikaia, bîla aihka nani tânka bara aihkakira wala nani tânka sakaia sin nu sa. Bamna king, Daniel ba paiws, bara witin bui baha utla tnaya ra ulban ba tânka mai wibia.

¹³ Bara Daniel ba king mawanra brih wan, bara king bui makabi walan: —¿Man ba Daniel, yang aisiki king Nabucodonosor bui Ju nani bri sal silak ra bri kan ba kumika sma ki?

¹⁴ Upla ai win, Gâd spiritka ba man brisma, man sin sins yamnikira pali brisma, man ba sin âuya mâira bara diara tânka kakaira pali sma.

¹⁵ Baku bamna, naha tasbaya ra upla sinskira nani ba nâra sa baha ulbanka ba aisi kaiki ai tânka ba ai wiaia dukiara, sakuna witin nani tânka briras pali sa.

¹⁶ Ban sakuna, walri man sip sma twisa sât wala aisi ba lakaia, bara diara karna nani sin wapni ra laki mangkaia. Bamna man sip sma kaka baha bîla nani ba aisi kaiki, bara ai tânka nani ba sin ai wima kaka, yarka kwala balianta ba mai dingkan kaia, namna ra sin gul ni daukan sînka ba mangkan kabia, bara yang, king aimakisna tasbaya purara, karnika alki ba yumhpika ba man kama.

¹⁷ Bamna Daniel bui pana win: —Wan Kingka sma ba, dîa mana luha aikaia wisma ba ban swis, bara man wamtla ra kulkanka lâka tara briaia ba upla wala ra yas. Ban sakuna, yang bui man king tara ra wimna, baha bîla nani utla tnaya ra ulban ba tânka.

¹⁸ “Gâd Laih Purara iwi ba bui king lâka aisikam Nabucodonosor ra yan, kulkanka lâka tara bara prana, bara mayunra lâka ba sin.

¹⁹ Baha karnika yan ba mita, upla nani sut, nisan wala nani bara bîla sât wala aisi nani sut ba bui tara kulkan, bara sîa sin yabi kan. Bara witin yaura ikaia lukan ba ikan, purara bukaia kan ba bukan, bara wala nani ra batakaia kan ba sin batakan.

²⁰ Sakuna ai kupia ra pura luan lâka ni banhwan, ai kupia karna daukan, ai wîna kulkanka lâka sin brin. Bamna karnika bara prana kulkan lâka king bri kan ba, witin wina sakan.

²¹ Upla nani tila wina sakan bara daiwan baku takan, biriku wail nani wal baku takan, bîp nani baku twi pin bara diwas laya ba ai taya purara buski kan; baha piua kat witin kaikan, Gâd Laih Purara ba naha tasba kingka nani sut purkara karnika brisa, bara witin bui yaura king lâka yaia ba yabi kan.

²² Bara king Belsasar, man ba baha kingka luhpia sma, bamna dîa dîa takan sut ba man tânka brisma, sakuna man lika Dawan ra bawras sma.

²³ Kau ni mapara sma, man king, Gâd Laih Purara iwi ba lawaska kikram sa, tibilkam ra brih balbia paiwram baha kapka sirpi nani bara tara nani Dawan watla ra bri kan ba; bara paiwram uplika nani wal bahara wain laiki dih banhram dawankam nani ra mayunra yaram baha nani gul, silbar, bras, ayan, dus bara walpa ni paskan ba, baha gâd nani sip kaikras, sip walras, bara diara sin tânka briras pali ba. Man mayunras kapram, baha Gâd mihta ra rayakam ba bâra sa, witin mihta ra sa man yabalkam nani sut ba sin.

²⁴ Baha mita, witin bui baha mihta ba blikan ulbaia:

²⁵ MENÉ, MENÉ, TEKEL bara PARSÍN,

²⁶ bara baha tânka nani ba naku sa: MENÉ: Gâd bui man kingkam lâka yua nani ba kulki kaikan, tnata ba alkan sa;

²⁷ TEKEL: Man kingkam lâka ba mâyara pali iwram sa;

²⁸ PARSÍN: Man kingkam lâka ba baiki sakan sa, bamna Media nani bara Persia uplika nani mihta ra mangkan sa.

²⁹ Baha ningkara, king Belsasar bui win Daniel ba kwala balianta nani wal dingkan kabia, ai nana ra sin mangkbia gul ni awa daukan ba, bara sin maisa pakan baha pali piua ra, Daniel ba ai king tasbaya ra karnika alki ba tilara yumhpika ba kabia.

³⁰ Baha sim tihmika ra, Caldea uplika nani kingka bui Belsasar ba ikan

³¹ bara Darío Media wina ba ai king tasbaya ba alki brin. Baha piua ra Darío ba 62 mani bri kan.