Daniel 3 - DAWAN BÎLA AISKA

Gul lilka ra pura suni mayunan ba

¹ King Nabucodonosor win gul ni lilka kumi daukan, yarika 90 pît bîla yahpika ba 9 pît, bara adar yaban, baha ba Dura langnika ra swin kabia Babilon tasbaya ra.

² Baha ningkara tasba pîska bani wihta lalka nani ba paiwan, suldiar dakni nani lalka ba; tasba pîska nani wihtka aimaki nani ba kupia krakraukra nani, lalah âialkra nani, wihta nani, baha tasbaya ra tâ bri wala nani ba sin, baha nani ba sut pali bâra kabia, witin baha lilka daukan ba upla sut ra marikaia baha ba kulki kaia sin.

³ Naha uplika nani kulkanka tara bri nani ba sut pali baha lilka daukan ba mawanra wih asla taki banhwan, yua ba lilia tara daukaia baha lilka param ra sakuya ba dukiara.

⁴ Baha warkka daukaia tâ bri kan uplika ba ai bîla baikra karna wini, win: “Aman wals, plis bani wina upla nani nâra banhwisma ba, nisan nani, bara bîla sât sât aisisma ba.

⁵ Trumpit binka man nani walma, bra, gitar sirpi, arp, gitar tara, agin sapa, nahmuna binka walma ba ra, baha lilka ra lulam kriki puram suni mayunma, baha lilka gul ni daukan ba king Nabucodonosor mita.

⁶ Baha lilka ra ai lula kriki mayunras ba sut, prak alki kubus kum pauta klauhan tara ba ra lulkan kabia.”

⁷ Baku bamna, bahara upla nani asla takan kan ba puhbaia dukia sât sât miusik binka ba walbia, bara upla sut pali ai lula kriki baha gul ni lilka daukan ba ra ai pura suni mayuni banhwan.

⁸ Baha piua ra tila Caldea uplika nani sans kum brin, Ju nani dusa kuhbaia king Nabucodonosor ra.

⁹ Bara naku win: —¡Man king tara, raya ban kama, bara piua bani man ninam ba wan kupia krauki kabia!

¹⁰ Man king tara adar yabram, miusik kangbaia puhbaia dukia nani binka walbia piua ra mahka pali upla sut ai lula kriki gul ni daukan lilka ba ra ai pura suni mayunbia,

¹¹ bara ani uplika baku daukras kabia ba, pauta klauhan tara ba ra lulkan kabia.

¹² Baku bamna, tila Ju nani bâra sa, baha uplika nani ba man king tara bui Babilon tasbaya pura kaikaia mangkram ba, witin nani man king tara dîa lâ daukisma ba kulkras sa, gâd nani ra bawi kulkanka yaras sa, bara man wiram gul ni lilka dauki bapan ba ra bawi mayunras sa, baha nani ba sika Sadrac, Mesac bara Abed-negó.

¹³ King Nabucodonosor kupia baiwan, bara win Sadrac, Mesac bara Abed-negó ba, witin ra brih wabia. Baha nani witin ra brih wan kan ba ra,

¹⁴ king baha nani ra makabi walan: —¿Baha ba kasak sa ki, man nani gâdki nani ra bawi kulkanka yaras sma, bara yang mita wîri gul ni lilka dauki bapan ba ra sin bawras sma?

¹⁵ ¿Man nani ba wilin pali sma ki, baha miusik kangbaia dukia nani ba binka walma ba ra, yang mita wîri lilka dauki bapan ba ra bawi mayunaia? Man nani bawi mayunras sma kaka, nanara baha kubus pauta klauhan tara ba ra mai lulkan kabia; ¿ani gâdka swaki mai sakaia sip kabia?

¹⁶ Wahma yumhpa ba pana win: —Naha dukiara diara aisaia âpu sa.

¹⁷ Yang nani Gâdki, witin ra mayuni banhwisna ba sip sa baha kubuska pauta klauhan tara ba wina, bara dîa saura wala kra sin, man king tara, ai munaia lukma ba wina swaki ai saki banhwaia.

¹⁸ Ban kra baha daukras kabia kra, sakuna man naha na pain tânka bri bas, yang nani lika gâdkam nani ra baha lilka man daukram ba ra sin bawi mayuni banhwamna apia.

Wahma yumhpa ba pauta klauhan tara wina swaki sakan

¹⁹ Nabucodonosor naha bîla nani walan ba ra, wahma yumhpa ba mapara lawi kan ba mita, ai mawan ba pauni pali takan kan. Bamna win kubus ba kau aima 7 taim kau lapta daukbia kainara kata ba wal kau karna pali.

²⁰ Baha ningkara suldiar nani tila wina kau waitna karna nani ra win Sadrac, Mesac bara Abed-negó ba alki priskbia bara kubus pauta klauhi ba ra lulkbia.

²¹ Wahma yumhpa ba Babilon tasbaya ra lalka kaia mangkata kwalka yan ba kau ban dimi kan, bamna witin nani ba priskan bara kubus lapta klauhi ba kat lulkan.

²² King bui win, dîa witin aisin ba pat pali daukan kabia, kubus ba yan lapta pali takan kan, wahma yumhpa priski kubus laptikira ra lulkan, bara suldiar nani ba pauta klauhan laptika mita sut pruan.

²³ Wahma yumhpa priskan ba, kubus klauhan ra lulkan.

²⁴ Bamna Nabucodonosor pat pali ai iwaika wina bui tâ iwan pali taki wan, bara ai kupia krakraukra nani tâ uplika ra win: —¿Yawan bui waitna yumhpa baman priski pauta ra lulkan apia? Bara baha nani pana win: —Kasak pali sa.

²⁵ —Sakuna yang kaikisna waitna walhwal bâra ba, pauta klauhan ba lilapas ra wapi taukisa; pauta ba bui diara kumi sin munras pali sa, waitna walhwalka ba mawan ba lika insal baku sa.

²⁶ Nabucodonosor naha aisi si kubus untika ba lamara wih bara winan: —¡Sadrac, Mesac bara Abed-negó, Gâd Laih Purara ba albika nani, taki nahara bal! Wahma yumhpa ba pauta klauhan ba wina bal takan,

²⁷ baha kuntri ra karnika alki nani bâra kan ba sut naha wahma yumhpa lamara aidrubi balan, baha nani wîna tara ba pauta ba diara munras kan, bara tânka pliki kaikan tâwa mina kumi sin amras kan, ai prâka nani ba sin amras kan, baha purkara pauta aman kîa sin taya ra âpu kan.

²⁸ Baha pali minitka ra, Nabucodonosor wini aisin: “Sadrac, Mesac bara Abed-negó Gâdka ra mayunan kabia, witin ai insalka blikan ai napakan kasakkira nani ba swaki sakaia, witin nani king dîa lâ mangkan ba kulkras, kanra yamni lukan pruaia gâd nani ra bawi mayunaia kaka, baha nani witin nani ai Gâdka pali apia ba.

²⁹ Bamna nanara adar maikisna ya naha wahma nani Gâdka mapara saura aisabia ba, klaki pîs ra baman daukamni, ai watla nani ba lika slingbi yakaban kabia, ani tawanka uplika kabia, bîla ani nisanka kra kabia, twisa sât wala aisi ba kabia kra, gâd wala âpu sa baku swaki sakaia.”

³⁰ Baha ningkara king bui naha wahma yumhpa ra Babilon tasbaya aiska ra kau tara pali mangkan.