Daniel 12 - DAWAN BÎLA AISKA

Lâs awarka ba

¹ ‘Baha piua ra Maikel ba latan takbia, witin sika insal tara pali uplika nani kaina kahbi ba. ‘Baha piua ba lika kupia wirha piua kabia, upla nani iwan ba piua wina kau baha sât piua ba âpu kata, nisan nani bâra ba tilara. Baha piua ba aimakbia ba ra, man uplikam nani ba sut swaki sakan kabia, man wauhkamtaya ra ai nina ulbi mangkan nani ba.

² Raiti ra yapi banhwi ba ailal pali kli buan kabia: manis raya ban kaia lâka ba bribia, bara wala nani ra lika swira lâka bara pât ban kaia ra takbia.

³ Upla sinskira nani ba, baha nani upla ailal yabal wapni bâk brih impaki kan ba, kasbrika purara ingwi kabia; ¡slilma nani ba baku, ban kaia ra ingwi kabia!

⁴ ‘Sakuna, man Daniel, naha wauhkataya diara nani na yukuki bara sîl mangks, piua balbia ba kat. Upla ailal lika nahara bukra tauki kabia, ai sinska lâka kau briaia wisi.’

⁵ “Bara yang Daniel, kaikri waitna wâl bûi kan, awala baila wala ba bani ra.

⁶ Bara waitnika wâl ba wina kumika bui linin kwalka nani dimi awala purara bûi ba waitnika makabi walan: ‘¿Ahkia naha diara aihka pali na tnata alkbia ki?’

⁷ Bara linin kwalka dimi waitnika ba, ai mihta nani kasbrika purara buki, Gâd rayakira ba nina mâki swer taki win: ‘Piua yumhpa pura bakriki ba kat, Gâd uplika sauhki tiki nani karnika ba dakbi sakan kabia ba kat, bâra mika naha diara nani na tnata alkan kabia.’

⁸ “Dîa aisi kan ba walri, sakuna tânka lika briras katna. Bara makabi walri: ‘Wihtki, ¿naha diara nani ningkara dîa takbia ni?’

⁹ Bara witin bui ai win: ‘Ban yabalkam ba nina bliki bas, Daniel, bamna naha diara nani na yukuwan ra ban bri kabia piua tnata alkbia ba kat.

¹⁰ Upla ailal lika pât saura wahwaia aisin ba bâk luaia sa, bara baha wina klin bara kasak aihwakira kulkan kabia. Watawikira nani ba lika ban saura nani dauki kabia, dîa taki ba dukiara tânka sin briras kabia, sakuna upla sinskira nani ba lika diara sut tânka ba bri kabia.

¹¹ Yu nani 1,290 ba lubia, yu bani daiwan wîna sakripais dauki Dawan ra yaia ba takaskbia, saura lâka kabia Dawan tempelka ra daukbia ba.

¹² Lilia pali kabia baha upla kasak luki bîla kaiki kabia ba, 1,335 mani lubia ba kat.

¹³ Sakuna man, Daniel, tâm kat ban wapi bas bara ris bris, kan tnata yua nani ra buma mamna ba briaia dukiara.’ ”