Daniel 11 - DAWAN BÎLA AISKA

¹ Yang bui sin kupia buki tâ baikri, baha piua ra Darío Media kingka ba pas mani king aimaki kata.

² Bara nanara maikrika diara kasak ba tânka brima: ‘Kau Persia king yumhpa king aimaki kabia, baha ningkara king walhwalka ba king aimakbia, witin ba king yumhpa ba sut wal kau yuyakira pali kabia. Ai yuyaka ba ni karnika tara alkan kabia, ai karnika aiska ni Grik tasbaya kingka tasbaya mapara bubia.

Yahbra bara waupasa kingka nani ba

³ Sakuna baha ningkara king kum aimakbia bara war aiklaklabra pali ai karnika ba ni king tasbaya tara kum pura lubia, bara diara sut witin dauki kabia ba ai brinka kat baman kabia.

⁴ Ban sakuna, ai king lâka ba bapbia, sakuna ai king lâka ba âpu daukan kabia, bara ai kingka lâka tar baiwi walhwal ra daukan kabia. Baha king lâka karnika ba ai kiamka nani ra laki yan kabia apia, bara ai king lâka ba kaina piua ra karna kan ba baku kabia apia, kan baiki sakan kabia ba mita, ban sin upla wala witin ai watlika ra king aimakan kabia ba tâka.

⁵ ‘Muna tani kingka ba karna pali kabia, sakuna ai war aiklaklabra lalka nani ba wina kumi ba kau karna pali takbia witin ba wal, bara ban karnakira kabia, ai king lâka ba sin tara kabia.

⁶ Mani kum kum lubia ningkara king tasbaya wâl ba aikuki lâ kumi daukbia, bara muna tani kingka ba bui yahbra tani kingka ra ai luhpia mairin wal maya baikbia, baha ba king tasbaya baikanka wâl kata ba nanara wal kupia kumi takan ba tânka. Sakuna baha lukanka ba bahki ra tawbia, kan baha mairka ba, luhpia waitna, maya waitna ba bara albika nani sut lika ikan kabia.

⁷ Ban sakuna, ai kiamka tila ba wina kumi king kan kahbaika pliska ba alkbia, bara witin war aiklaklabra daknika brih yahbra kingka mapara aiklabaia wabia, bara king lâka karnika ba alki bribia, ai aiklaklabra daknika nani ba.

⁸ Baha purkara, ai gâdka nani sut ba Idsip ra brih wabia, bras ni lilka nani dauki bapan nani ba, bara gul wihki silbar ni diara nani paski daukan ba sut sin brih wabia. Mani kum kum ningkara lika, baha king tasbaya wâl ba war âpu iwi kabia.

⁹ Yahbra tani kingka ba bui muna tani kingka ra aiklabi pura luaia munbia, sakuna yaka witin nani mahka ai ninara taki wabia.

¹⁰ ‘Sakuna yahbra tani kingka luhpia nani ba, war aiklabia bubia, bara aiklaklabra daknika tâ kum sin asla daukbia. Witin nani ai tila wina kumi waupasa tani ra aiklabaia pura lubia, bara sauhki tikbia lisamra dingki sauhki bal baku; ningkara kli balbia bara waupasa tani kingka kan kahbaika pliska ba sin dakbi bribia.

¹¹ Yahbra tani kingka ai war aiklaklabra aikuki bal kutban ba mita muna tani kingka ba ai kupia sauhkbia, bara witin taki wabia ai waihla tara ba mapara aiklabaia bara sauhki tiki pura luan kabia.

¹² Witin pura luanka brin ba, bara ai waihla nani ailal pali pruan ba kaiki purara kaia lukanka ni aibanhwan kabia, sakuna ai karnika ba piua wihka wabia apia.

¹³ Yahbra tani kingka ba kli war aiklaklabra waitnika nani asla daukan kabia, kainara kata ba wal kau dakni tara, bara mani kum kum ningkara, ai war aiklaklabra daknika tara brih muna tani mapara aiklabaia wabia, aiklabaia dukia ailal pali ba wal.

¹⁴ ‘Naha diara takbia piua ra, muna tani kingka mapara ailal bubia, baha nani tilara Israel uplika saura nani sin bâra kabia, diara aihka kaikan ba tânka kat sa, sakuna kauhan kabia.

¹⁵ Yahbra tani kingka balbia bara tawan karnakira ba kir ai yukuwaika pliska daukbia, bara sin pura luan kabia. Muna tani war aiklaklabrika kau pain ba bui sin sip ai waihla ba alki takaskbia apia.

¹⁶ Aiklabi dimi aula ba dîa ai brinka ba kat daukbia pura lui taiban nani ra, upla sin âpu kabia mawanra buaia, bara Tasba Pranakira ra takaskbia.

¹⁷ Baha purkara, ridi taki buan kabia muna tani tasbaya aiska dakbi briaia, baha wal aisi kupia kumi taki ai luhpia mairin baha kingka wal maya baikan kabia, kingka tasbaya ba sauhki tikaia lukanka brih, sakuna baha lukanka ba bahki ra tawbia.

¹⁸ Baha ningkara kabu un tani ra tawan nani ba mapara aiklabia bara baha nani wina ailal ba ai karnika mununhtara kauhan kabia, sakuna war lalka nani ba wina kumi bui naha swira lâka na yaka takaskbia, baha swira lâka ba kir laki yahbra tani kingka ra laki yabia.

¹⁹ Baha pali wina, king bui baha kan kahbaika pliska nani sut ba sakan kabia, sakuna ai rayaka ra pât kum alkbia ba bui ai mina prukan kabia, bara witin dukiara kli sin diara walbia apia.

²⁰ ‘Ai watlika ra king wala aimakbia, lal mana wawahbra kum blîkbia ai king tasbaya ba yuyakira daukaia dukiara; sakuna yu kum kum ningkara ikan kabia, baha ba aiklabaia pliska pali ra lika apia kabia.

²¹ ‘Witin ba ningkara ai watlika ra saura kulkan waitnika kum king aimakbia, witin ba king lâka alki briaia aitani apia kan, ai lukanka saura nani ba yukuki kunin lâka ni king lâka karnika ba alki bribia.

²² Ai karnika dîa bri ba sut lika âpu daukan kabia, baha purkara wal lâ daukan lalka ba ikan kabia.

²³ Kunin munbia baha nani ra latwan lâka wisi aikuki wal asla taki lâ daukan ba, baku bamna mapara wabia bara ban sin pura lubia.

²⁴ Upla kumi sin lukras kabia piua ra, baha tasbaya ra ani pliska nani kau yuya bri ba sâtka ra dimi wabia bara ai aisika nani, ai damika nani daukras kan dukia nani ba daukbia, war aiklaklabra nani bui aiklabi dakban dukia ba, bara yuyaka nani sut sin war aiklaklabra nani aikuki yui bribia. Tawan karnakira nani mapara aiklabaia waia lâ daukbia, baha ba yu kum baman kabia kra.

²⁵ ‘Ai paunka bara ai kupia karnika ba bara war aiklaklabra ailal karnika ba wal, muna tani kingka mapara aiklabia. Muna kingka ba bui ai kupia karnika wal pana mapara aiklabia, bara mapara dimi wabia, war aiklaklabra ailal karnika wal, sakuna kunin muni waihla mihta ra mangkbia, bara sip kabia apia baha waihla ai mapara aiklabi ba mapara buaia.

²⁶ Baha nani sut ai tibilka ra plun piaia paiwan ba sauhki tikan kaia ba dukiara bubia, ai war uplika nani ra pura lubia, manis pali sin ikan kabia.

²⁷ Bamna king wâl ba, diara sauhkaia dukiara baman luki ba aikuki asla tibil kumi ra iwbia plun piaia, bara pana pana kunin aisabia, sakuna wâl ba wina kumi sin diara luki ba bribia apia, kan piua ba kau sa bamna.

²⁸ Yahbra tani kingka ba ai tasbaya ra kli tawi wabia war aiklabi diara nani dakban ba kira. Bamna wal aisi lâ daukan holikira ba mapara bubia dîa daukaia luki ba dauki tnata alkbia, baha ningkara ai tasbaya ra wabia.

²⁹ Baha piua mangkan ba aimakbia ba ra, witin war aiklaklabra nani bri ba blîkbia, sakuna tâura dimi wih pura luata ba baku kabia apia.

³⁰ War aiklaklabra nani bri ba mapara muna tani daknika slaupku brih balan ba bui aiklabia, sibrin tara daukbia ba ra, war aiklaklabra daknika bri ba sâkbia. Bamna kli tawi balbia, bara wal lâ daukan holika lâka ba mapara bubia, ban ai kupia lâka kat baman daukbia, baha nani lâ daukan sunuka lâka mapara banhwi ba wal ni asla takbia.

³¹ ‘Suldiar nani bui tempel ba sauhki tiki bahki kulkan, baha karnika ba sin yu bani Gâd ra sakripais yaia lâka ba kli daukbia apia win, baha watlika ra saura lâka ni daukbia lâ mangkan.

³² King ba yabal plikbia wal aisi lâ daukan lâka krakrikra nani ba maisa kapi kupia alkbia, sakuna Gâd ra kaiki uplika nani ba ban bapi bûi kabia, bara baha lâka ba mapara sin bubia.

³³ Upla sinskira nani tawan ra ba bui upla ailal ra smalkbia, sakuna piua wiria ningkara baha nani sut ra ikbia, bara pauta ra angkbia, diara nani bri ba sut sin implikbia, tasba kakaira apia nani ra yaka alba nani takbia. Baha ba baku kabia piua kumi ra.

³⁴ Rausauhkan piua ba aimakbia yua ra, hilp wiria bribia, dîa dîa yamnika briaia dukiara aikuki asla taki banhwan kabia sakuna.

³⁵ Baku sin upla nani ra smalki kan ba kum kum ra nina bliki rausauhkan kabia, baku mika tânka ba pliki kaikan kabia, sut ba holi bara kasak lâka daukbia, baha piua mangkan ba tnata alkbia ba kat.

³⁶ ‘Yahbra tani kingka diara sut ba daukbia, witin ai brinka ba kat. Baha ba aimayunanka saura witin lukisa ba gâd nani sut purkara sa, Gâd kasakkira ba mapara saura pali ba aisabia, bara diara sut ba ai mapara yamni takbia, Gâd mita klala blîkbia ba kat; kan Gâd lika dîa daukaia luki ba kat daukbia sa.

³⁷ Naha kingka na ai damika nani gâd nani bri kan ba nani ra kulkras takan, mairin nani ba ni mayuni gâdka nani kumi ra sin apia, kan witin bui lukisa witin ba kau tara sa gâd nani sut ba wal.

³⁸ Ban sakuna, kan kahbaika pliska nani gâdka ra mayunbia, ai damika nani bui tânka briras kan ba gâdka ra mayunbia, bara sin yabia gul, silbar, walpa manakira nani bara diara mana tara bri nani ba sin.

³⁹ Kau kulkanka yabia, gâd bahki nani ra mayuni gâdka nani bribia, ai aisika nani mayunras kata ba bara naha kingka ra mayuni ba sin, witin bui mayunra tara daukbia, tara kulkan lâka ba yabia, ai mana baku wisa tasba nani sin yabia.

⁴⁰ ‘Ban sakuna, piua ba balbia ba ra, muna tani kingka ba yahbra tani kingka mapara aiklabia, bara naha na taki wabia wal prawaia, muna tani mapara bubia skwal saura baku, war aiklabaia wagin ni lisamra baku dimi wabia, aras âiulra daknika nani bara slaup nani kira sin.

⁴¹ Baku sin Tawan Pranakira ra dimi wabia bara upla ailal pali ikan kabia, sakuna Edom bara Moab wal tasbaya iwi uplika nani ba swaki sâkbia, bara Amón tasbaya piarkika ra iwi nani ba aihkika sut pali sin.

⁴² Ai war aiklaklabra nani ba kuntri wala nani sin alki bribia, Idsip ba sin swak takbia apia.

⁴³ Ai yuyaka nani ba sut pali brih wan kabia, gul, silbar bara Idsip ra diara manakira nani ba sut; ningkara Libia bara Etiopía wal piua ba sin aimakbia.

⁴⁴ Sakuna lalma wina bara yahbra tani wina bîla blikan ba walbia bara sibrin iwbia, ban ai kupia baiwanka wal taki wabia, upla ailal pali ikaia lukanka ba brih.

⁴⁵ Ai tintka watla ba bapan kabia kabu ba wina Tasba Pranakira ilka holikira ba kat. Sakuna baha pali kat, witin pruaia awarka ba aimakbia, upla âpu kabia witin ra hilp munaia.