Daniel 10 - DAWAN BÎLA AISKA

Tigris awalka un ra Daniel diara aihka kaikan ba

¹ Persia kingka Ciro mani yumhpa king aimaki kan piua ra, Daniel nina wala Beltsasar mâki ba, diara aihka kum kasak pali kan kaikan ba, sakuna tânka ba briaia karna pali kata, sakuna baha dukiara Daniel kasak pali tânka pliki kan, bara sip kan diara aihka kaikan ba tânka pain briaia.

² “Baha yua nani ra, yang Daniel, wik yumhpa uya pali sari katna.

³ Plun auhni nani piras katna, wîna bara wain sin kangbras katna, isint sin wîni ra mangkras katna baha wik yumhpa luan ba kat.

⁴ Mani pas 24 katka ra, yang lika Tigris awalka tara ba un ra katna.

⁵ Bara pat pali kaikri, waitna kumi linin kwalka dimi kan ai maisa wila ba gul aihwa ni daukan bri kata.

⁶ Ai prâka ba lipi kan walpa lalahni manakira lipi ba baku kan, ai mawan ba lipi kan imyula lipi ba baku, ai klahkla nani bara ai mina nani ba lipi kan bras lipi ba baku, ai bîla baikra binka ba upla ailal aisi ba baku kan.

⁷ “Diara aihka kaikanka ba yang baman baha kaikri, upla nani yang wal kan ba diara kumi sin tânka briras kata, kan witin nani sibrin bui pura luan yukuwaia wisi plapi banhwi kan.

⁸ Yang yakan kapri piua ra naha diara aihka kaikanka tara na kaikri. Yang ban pihni pali aihwa takri kata, ban daira wali kapri, karniki nani ba sin âpu pali baku katna.

⁹ Aisin walri piua ra, ban swapni pali taki tasba kat kauhi ban prawi kapri.

¹⁰ Baha ningkara mihta kum bui ai alki ai bukan, ban karnika aikan mihti nani wal ban luli ra bûi kaia.

¹¹ Baha ningkara ai win: ‘Daniel, Gâd bui latwan pali mai kaiki ba mita, dîa mai wiaisna na pain ai wali bas: bus, kan man ra ai blikan sa mai wiaia.’ “Naha bîla nani aisin ba ningkara, mahka pali yang tatatwi ban buri.

¹² Bara ai win: ‘Daniel, man si bripara, kan baha pas yua diara karna nani tânka briaia munatna ba, bara Gâd ra mâyara bawatma ba piua ra, witin puram sunra ba walan. Baha mita sika yang balri na.

¹³ Persia kingka luhpia waitna ba, yu 21 yang maipara kan, sakuna Maikel, insal tâ aimaki nani ba wina kau king luhpia baku ba bal taiban kan, bara ban bahara takaskri Persia kingka nani wal.

¹⁴ Baku bamna balri, naika piua ra man uplikam nani ra dîa takaia tânka ba mai wiaia, kan man diara aihka kaikram ba baha piua dukiara sa.’

¹⁵ “Kau naha diara na ai wi kan ba ra, yang diara kumi sin aisaras naikra ba ban tasba kat aman pali kaiki katna.

¹⁶ Pat pali upla kum balan, baha upla luhpia waitna baku kan, witin bui uni nani ra kangban. Bara maiwanra bûi kan uplika ba ra wîri: ‘Dawanki, naha diara aihka kaikri na bui kupi wirha takan bara sin swapni sin takri.

¹⁷ ¿Nahki sip kabia man wal aisaia naha man dukiam dadaukra na, karnika nani âpu pali aihwa sna, baha purkara wingki kunhku pali brisna na?’

¹⁸ “Baha uplika upla luhpia waitna talia baku kan ba bui ai kangban, bara kli karnika raya aikan.

¹⁹ Bara ai win: ‘Si bripara, kupiam sin turban takpara. Gâd bui man ra latwan mai kaikisa. ¡Karna bas bara kupiam sin karna bris!’ “Kau ai aisi kan bara daihra walri karnika brisna, bara wîri: ‘¡Dawan, ai aisas, kan man bui karniki ba aikram sa!’

²⁰ Bamna witin bui ai win: ‘¿Nu sma ki dîa muni man ra balri sa? Kan nanara kli Persia kingka luhpia waitna ba wal aiklabaia sna. Witin ba wal aiklabi tnata alkamna piua ra, baha insalka Grik tasbaya kingka luhpia waitna ba balbia.

²¹ Bamna nanara mai wiaisna baha wauhkataya kasak ba ra dîa ulban ba: Witin nani ba mapara aiklabaia sna ba Maikel hilpka ba baman brisna, wan kingka luhpia ba.